Si'ndigi'nu Toumata Kinau'ndang su Hu'a'ngnu Lrimbunu Pakabingan 1 I Yesus nabahi'ga' kasau si si'de agenu si'ndigi'-si'ndigi'Ne, kasaba': 2 " Komalrigi'nu Dompakon kasi'ndigi' su o'ngkamai i tou dika singkatau kasaba' nanga'lri'mu' lri'mbunu pakabingan su ana' mahu'a'neine. 3 Bo, i sie' (i dika) nangi'ngka' si'de a'i'ngkane kasaba' mamokei su toumata-toumata kinau'ndangte su lri'mbunu pakabingan ene', tou si'de kasaba' do'i' sinai. 4 Senebo, i dika nangi'ngka'ken lragi a'i'ngka'-a'i'ngka'ne ba'lrine', kasaba': " Pangu'lri'te su toumata-toumatanu kinau'ndangte ene', "Selrei, iya' napata'kede'tenu mayanu kakane'n su ti'mbounu papamangkean (meja manai). Sapi-sapi bongko bo kumakaho'a'-kumakaho'a' malrongo' kasaba' mayane' niha'ta'te ha, bo maya'ne' nata'kede'te ha. Bo'tete' nai su lrimbunu pakabingan iye'." 5 Tou manen ingene, si'de galre' ta'yamainu mabohei (makahe'ken) bo nani'ndenan kasaba' singkatau na'konu sangkoine, singkatau ba'lrine' na'konu babelrenanne, 6 bo ba'lrine' lragi kasaba' galre' naho'go' si si'de a'i'ngka-a'i'ngkani dika ene', yobo nalru'baga' nadadi'ha bo namu'no si si'de. 7 Ingenebo i dika kasaba' nati'ngkaupi', bo nangi'ngka soldado'-soldado'ne, kasaba' napapatei su si'de mamamu'no'-mamamu'no' ene', bo agenu nanutu'ng Banua nsi'de. 8 Pa'lrusu'nu ene', i sie' nabahi'ga' su si'de a'i'ngka'-a'i'ngka'ne kasaba': " Lrimbu mapi'a'nu pakabingan nata'kede'te, tou toumata-toumatanu niu'ndang ene' kasaba' ta'yamai bo'bodo'ne. 9 Ingenebo, a'kote kumu'nu dalren-dalren lra'mo' bo u'ndangte (a'ha'te) manenpi'da su kanga'sa'nu toumata pai su sene' bo pokeinai si'de su lri'mbu pakabingan iye'." 10 Senebo, si'de a'i'ngka'-a'i'ngka'ne ene' na'konu dalren-dalren bo napaha'nsa'nu maya toumata kasaba' kinahu'mpa nsi'de, naihe'ken su si'de toumata mapi'a' manga'se' toumata dalrai. Bo, tampanu lri'mbu pakabingan ene' kasaba' nahe'me' agenu si'de lrupu'-lrupu' ene'. 11 Tou manen ingene, sadanu i tou i Dika simu' bo nahisabu' agenu maya lrupu'Ne ene, i Sie' nakabau singkatau su sene, kasaba' ta'yamai nagilra'ku' agenu lra'ku'nu (heka'nu lenan mabi'da) lri'mbu pakabingan. 12 I Sie' nangu'lri' si sie' kasaba': "Nakudabo i kau simu'te su hu'a'ngnu lri'mbu pakabingan iye' bo ta'yamai nagilra'ku' agenu lra'ku'nu lri'mbu pakabingan ?". Bo i tou toumata ene' galre' napada'nga'mai. 13 Senebo i Dika ene' namerenta su a'i'ngka'-a'i'ngka'Ne kasaba': " Ha'pusu'te lrima bo ti'lro'ne, yobo pamalre'ng su hu'a'ngnu po'mpong malri' madalrung. Su sene' kasaba' dongka pai kaha' agenu kahi'so'nu isi'." 14 Yoka, nga'sa'nu kapo'kei, tou galre' kodionu kapi'lre'." Bo'toso'nu Si'de Makati'mbonannu Yahudi Mahogo'si Yesus. 15 Pa'lrusu'nu ene', toumata-toumatanu Farisi nati'mbusu' bo nanga'ntigi'tenu kakudanu si'de mambo'toso' si Yesus agenu bahi'ga'Ne. 16 Bo, si'de nangi'ngka' tuma'-tuhu' tuma'-tu'hu' nsi'de agenu toumata-toumatanu Herodian si Yesus. Si'de nabo'ka' kasaba': "Me'tehe', kami mati'ho' tou i Kau toumata matu'lridi' bo mapatu'ntu'nu dalrennu Mabuduata su hu'a'ngnu kabanaran. I Kau ta'yamai mata'ku'nu toumata singkataumai yoka i Kau kasaba' ta'ya sumelre'i su kalroinu toumata. 17 Adabo ingene', pangu'lri'te apanu pini'kihi'Nu si kami'. Apabo ta'ya si kadosa'nne adabo kami' mama'ehe' bilyet si kaisar manga'se' ta'ya mama'ehe' si sie' ?" 18 Tou manen ingene, I yesus mati'ho'nu imun dalrai nsi'de bo nangi'ndo' kasaba': "Nakudabo kumu' manu'ka' si Sia', ona.... toumata kulre'hi' ? 19 Pakiselreinai si Sia' gobangnu pamama'ehe' bilyet ene'." Senebo, si'de nami'hei singgobangnu dinar si Sie'. 20 Bo, I Sie' naki'na' si si'de kasaba': "Gambar bo bo'he'ni sai iye' ?" 21 Si'de nangi'ndo' kasaba': " Apede'ni Kaisar". Pa'lrusu'nu ene', i Yesus nabahi'ga' si si'de kasaba': " Ingenebo kumu' pama'ehe' si kaisar apamai-apamainu a'pede'nu kaisar, bo pa'ma'e'he' su Mabuduata apamai-apamainu kasaba' a'pede'nu Mabuduata." 22 Sadanu si'de nakadi'ngihi'temainu ene', si'de galre' nakakilrilringan-nakakilringan, bo na'ko nani'ndenan si Sie'. Kodounu Toumata Saduki Mambo'toso' si Yesus. 23 Naitana'mai su lrou mapada', toumata-toumatanu Saduki, kasaba' nabahi'ga'tenu ta'yamai si kabi'a'he'nNe, sinaini Yesus bo naki'na' si Sie'. 24 Si'de nangu'lri' kasaba': " Me'tehe', i Musa nabahi'ga'te tou adabo i tou mahu'anei singkatau nateitemai, bo ta'yaken napabo'lroso'nu ana'ne, tu'hangne mahu'anei ba'lrine' galre'te maha'me' si yangkungne bo mapabo'lroso'nu ana' su tu'hangne kasaba' nateite ene'. 25 Su galre'-galre' i, pai pi'tu'ngkatau singkatu'hang su salra' ngkami'. I tou sa'humpu'n naha'me', bo nahinsalra' ta'yamai napabo'lroso'nu ana'ne, bo nanulrau si yangkungne ene' agenu tu'hangne singkatau ba'lrine'. 26 Ingene lragi i tou tu'hang kadu'ane ene' kasaba' natei lragi, naidao su tuha'ng katulru'ne bo tu'hang kapi'tu'ne kasaba' natei ha lragi (sadanu si'de mayane' naha'me' ha ageni tou babinei insau ene'). 27 Pa'lrsu'nu mayane', i tou babi'nei ene' kasaba' natei lragi. 28 Naitana'mai su lrou pabi'a'he'nmai, i tou babinei ene' dongka mu'a'lri' i yangkungni sai su salra'nu pi'tu'nu singkatu'hang kasaba' nu'a'lri'te bulroine ene' ? Yoka, si'de mayane' kasaba' naha'me'te ha si sie'". 29 Tou manen ingene', i Yesus nangi'ndo' agenu ba'bo'ka'en si si'de kasaba': "Kumu' toumata nailre'ngko'te, yoka ta'ya makasi'lrigi'nu Ka'o'lro'nu Mabu manga'se' kaha'mata'nu Mabuduata. 30 Yoka, su lroumainu pabi'a'he'n, si'de' kasaba' ta'yatemainu maha'me' manga'se' ta'yatemainu ha'me'an, yoka si'de kasaba' nu'a'lri'te su o'ngkamai toumata-toumatanu kalrutuan su dompakon. 31 Manen ingene', kagagionu pabi'a'he'n su toumata-toumata nateite, apabo kumu' ta'ya namaca' su apanu pina'ida'otenu Mabuduata si kumu', 32 " Iya'tenu Mabuduatani Abraham, Mabuduatani Ishak, Mabuduatani Yakup" ? Apabo i Sie' ta'ya i Mabuduatanu toumata natei, tou i Mabuduatanu toumata bi'a'ha' ?". 33 Sadanu toumata da'kelre' ene' nakadi'ngihi'mai su apanu pinabo'ka'Ne, si'de kasaba' galre' nakakilringa'n su apanu pinatu'ntu'Ne. Sa'nihi'nu U'ntemai nu Ingkasa'kata' ? 34 Manen ingene, sadanu toumata-toumatanu Farisi nakadi'ngihi'mai tou i Yesus kasaba' napakalri'mu'te su toumata-toumatanu Saduki naikuntu'ng, si'de kasaba' naha'nsa'. 35 Pa'lrusu'nu ene', singkatau bua' nsi'de kasaba' i tou pandeinu Sa'nihi'nu Torat naki'na' si Yesus yoka masibi'nu mama'nda'ng si Sie', kasaba': 36 "Me'tehe', parenta untenu ingka'te'tehe' (ingkasa'kata') su hu'a'ngnu Sa'nihi'nu Torat ?" 37 Bo, i Yesus nabahi'ga' si sie' kasaba': " Kumu' galre'te gumilridi'nu Mabu i Tou Mabuduata kumu' agenu atei nahe'me', bo agenu himu'kudu' ngkumu', bo agenu maya ta'huka' ngkumu'. 38 Iye'nu kasaba' parenta ingkalra'mo' bo naisu' su sa'humpu'nne. 39 Kaduane' kasaba' o'ngkamai iye': "Kumu' galre'te gumilridi'nu ha'nusu' ngkumu' su o'ngkamainu gumilridi'nu a'o' mbatangen." 40 Su hu'a'ngnu parenta dadua iye', mayane' ene' dongka pangata'sa' su Sa'nihi'nu Torat bo buk-buknu si'de Mababa'lro'." Kaki'na'en su kagagioni Mesias. 41 Su galre'-galre' i, si'de toumata-toumatanu Farisi kahaga'sa'nu naha'nsa', i Yesus naki'na' si si'de, kasaba' 42 "Kakudanu pi'kihi' ngkumu' su kagagioni Cristo ? Ana'ni sai i Sie' ?" Si'de nangi'ndo' si Sie' kasaba': "Ana'ni Daud". 43 I Sie' nabo'ka' si si'de kasaba': " Adabo ingene, nakudabo i Daud, su hu'a'ngnu MaindotoNe, kasaba' namokei si Sie' "Gudangne" o'ngkamai bahi'ga'ne 44 "Mabu nangu'lri' si Gudangne, kasaba': "Ho'mpongte su sindihi'nu kuanenKu, maidao su Iya' mapahudodoinu seke'-seke'Nu su a'lrung'nu ti'lro'Nu ?" Buknu Mazmur 110: 1. 45 Adabo i Daud namokei si Yesus kasaba' : "Gudangne", apabo bo'bodo'ne i Sie' kasaba' ana'ni Daud ?" 46 Ta'yamai si insaunu makai'ndo'nu singko'bo'mainu si Sie'. Bo, putu'nu lrou ene', ta'yamai si insaunu baha'nei mapaki'na'nu kaki'na'en-kaki'na'en ba'lrine' si Sie'.