I Yesus Nihalra'en O'ngkamai i Tou Madika Singkatau ¹ Sadanu si'de malrapa'tenu Yerusalem bo nasupu'tesu Betfage, su Bu'kidi'nu Zaitun, i Yesus nangi'ngka' duangkatau tuma'-tu'hu'Ne; ² Agenu bahi'ga'Ne si si'dedua kasaba:" A'kotenu banua (desa) pai su kasaduanen kumu', bo kumu' dongka makadapata' Keledai insau kahaga'sa'nu ni'iki' agenu ana'ne su sene. Polro'sa'i a'i'ki'ne ene' bo di'ngannai Keledai dadua ene' si Sia'. ³ Adabo pai toumata mapabo'ka'nu apamai si kumu', kumu' galre'te mangu'lri' kasaba': "Mabunu mapamakene', bo i Sie' dongka galre'-galre' mapasaulre'ne. ⁴ Apamainu iye' kasaba' mapato'mpodo'nu apatenu pinaba'lro'nu mababa'lro' su po'nane' : ⁵ "Pabo'ka'te su boki'nu Sion, kasaba': "Selereite, i Dika kumu' sinaite ngkumu', i Sie' ateiNe kahi'nda, simakei su Keledai Insau, agenu Keledai ana'ne mangudaken, ana'ni tou Keledai lralrudanen". Bukni Zakharia 9: 9. ⁶ Tuma'-tu'hu' tuma'-tu'hu'Ne timo'ndo' bo nangalri'mu' o'ngkamai su apanu pinarentate'ni Yesus si si'de. ⁷ Si'de nani'ngan Keledai agenu ana'ne ene', bo su lri'kudu'nu Keledai dadua ene' ni'a'mpahe'n agenu kaya malra'mbing nsi'de, palretene' i Yesus himo'mpong su ti'mboune. ⁸ Lrobo-lrobonu toumata da'kelre' ene' napa'a'mpaha'nu maya kaya malra'mbing nsi'de su dalren, bo toumata sangka' nango'toho' panga'-panga'nu mpukayu, bo pinasalru'a'ndang su dalren. ⁹ Nga'sa' toumata lrima'mpang su po'naNe bo su samu'di'Ne, nango'mbalra'-ngo'mbalra' kasaba': "Dayou (Hosana) su Ana'ni Daud !" "Kina'mpeta'nmai i Sie' kasaba' Sinai su Adennu Mabu. Dayou su tampa Ingkalra'ngkasa' !" Buknu Mazmur 118: 25-26. ¹⁰ Sadanu i Yesus simu' su Yerusalem, maya Banua su ti'ku'ne natata'hibi'. Si'de naki'na' kasaba': " I sai i Sie' iye' ?" ¹¹ Bo, toumata da'kelre' ene' nangi'ndo' kasaba': " I Sie' kasaba' i Mababa'lro' Yesus, bua'nu Nazaret su Distriknu Galilea." I Yesus Nangu'saha' Sinagoganu Mabuduata. ¹² Senebo, i Yesus simu' su Sinagoganu Mabuduata bo nangu'sehe' toumata-toumata kahaga'sa'nu mahimbalru'a'n su sinagoganu Mabuduata, i Sie' kasaba' napahi'kalri'u' meja-mejanu panganga'husa'n do'iti bo haho'mpongan-haho'mpongan (bangku-bangku) mababa'lru'nu tuma'-talra' tuma'-talra' tarkuku. ¹³ I Sie' nabo'ka' si si'de kasaba': " Paite naibo'he', balreiKu dongka panga'de'n su balreinu o'mpu', " tou kinalri'mu'te ngkumu' nu'a'lri' da'humu'nu si'de maha'hampa'sa'." ¹⁴ Bo, toumata buta agenu toumata lralrai sinaini Yesus su sinagoganu Mabuduata, bo pinapi'a'Ne si'dedua. ¹⁵ Manen ingene, sadanu si'de mangangi'moho' makati'mbonan bo papandeinu Torat nakabuate kaha'mata'-kaha'mata' nikalri'mu'teni Yesus bo nakabuate lragi si tou ana'-ana' nango'mbalra-ngo'mbalranu: "Dayou su Ana'ni Daud", si'de natingkaupi. ¹⁶ Senebo, si'de naki'na' si Yesus kasaba': " Apabo i Kau nakadi'ngihi'te su apanu pinabo'ka'nu ana'-ana' iye ?" Bo, i Yesus nangi'ndo' si si'de kasaba': "Ode. Apabo kumu' ta'yaken namaca' hohonu baba'lro' su po'naken kasaba': "Bua'nu mo'hongnu ana'-ana' buhu' natoumata bo ana'-ana' kahaga'sa'kennu manu'su si mamane, i Kau napata'kede'tenu dayou su A'o' Mbatangen ?". ¹⁷ Pa'lrusu'nu ene', i Yesus nani'ndenan si si'de bo lrimo'a'ng bua'nu Banua ene' na'konu Betania bo natulrau sihibi' su sene'. I Yesus Napakiselrei Kaha'mata'nu Parca'ya. ¹⁸ Su galre'-galre' i, naitana'ken su mahi'malrou, sadanu i Yesus nabeite na'konu Banua, i Sie' kasaba' mahu'tungte. ¹⁹ Bo, sadanu nakabuamai mpu'ngkayunu Ara su pandihi'nu dalren, kasaba' ta'yamai napalro'a'ngnu bu'ane, sumea su galre' daung-daungne ha. Bo, i Sie' nabahi'ga' su mpu'kayu ene' kasaba': "i kau ta'yate makapabo'lroso'nu bu'ane bua'nu sini bo tamai !" Ta'yamainu nano', mpu'kayunu Ara ene' kasaba' himangu'. ²⁰ Sadanu tuma'-tu'hu' tuma'-tu'hu'Ne nakabua apamainu iye', si'de galre' nakakilring-kilringan su pasingkataumai bo naki'na' kasaba': " Nakudabo mpu'kayunu Ara ene' himangu' su singkahi'ngku'nemai lragi ?" ²¹ Bo, i Yesus nangi'ndo' si si'de kasaba': " Tanga'-tangada' Iya' mabo'ka' si kumu', adabo kumu' pai parca'ya bo atei ngkumu' ta'yamai kumi'ko', kumu' ta'ya galre' makakalri'mu' su apamainu kinalri'mu'Kute su mpu'kayunu Ara iye', bo adabo kumu' mabo'ka' su bu'lrudu' iye' kasaba': "Naki'angte bo Naisu'mpuhuku'te su hu'a'ngnu lra'odo", enenu dongka mu'a'lri'. ²² Bo, maya apanu to'ngko'a'n ngkumu' si Sia' su hu'angnu o'mpu' ngkumu', pamarca'yate , ene'nu dongka katirima (kade'a) ngkumu'." Makati'mbonannu Yahudi Kasaba' Kima'ta'nu Kaha'mata'ni Yesus. ²³ Sdanu i Yesus simu'mai su Sinagoganu Mabuduata, si'de mangangi'moho' makati'mbonan bo si'de gagudang-gagudangnu Bangsa Yahudi kasaba' sinai naki'na' si Sie' tou i Sie' kahaga'sa'kennu mapatu'ntu' su toumata ba'lrine', kasaba': "Agenu kaha'mata' apa i Kau makakalri'mu' su apamai-apamainu iye' ?" Bo, i sainu nami'hei kaha'mata' iye' si Kau ?". ²⁴ I Yesus nangi'ndo' si si'de kasaba': " Iya' lragi dongka maki'na'nu apamainu insau si kumu', bo adabo kumu' makapangi'ndo'nu ene', Iya' lragi dongka mami'hei si kumu' kasaba' agenu kaha'mata' apa Iya' mapakalri'mu' mayanu apamainu iye'. ²⁵ Bua' nunte kasaba' saha'ni'ni Yohanes (mananaha'ni') ? Apabo ene' bua'nu dompakon manga'se' bua'nu toumata ?" Sadanu si'de pasimbahi'ga'nmai su salra' nsi'de, u'lri' nsi'de : "Adabo kite mangu'lri' bua'nu dompakon, i Sie' dongka maki'na' nakudabo kumu' ta'ya namarca'ya si Yohanes ?" ²⁶ Tou manen ingene, adabo kite mangi'ndo': "bua'nu toumata." Kite mata'ku' su toumata da'kelre' yoka si'de mayane' nangatei tou i Yohanes kasaba' i tou Mababa'lro'." ²⁷ Ingenebo si'de nangi'ndo' si Yesus kasaba': "Kami ta'ya mati'ho'." Bo, i Yesus nabahi'ga' (nangi'ndo') kasaba': "Adabo ingene Iya' lragi ta'ya mangu'lri' si kumu' agenu kaha'mata' apa Iya' mapakalri'mu'nu mayanu apamai-apamainu iye'." Si'ndigi' Kagagionu Ana' Duangkatau. ²⁸ "Tou ingenebo, apanu pi'kihi' ngkumu' ? Pai toumata kasaba' makatagu'a'n su ana' mahu'anei duangkatau, bo i sie' sinaini tou ana' guda-gudang agenu bahi'ga' kasaba': "Anaku, a'ko bo pambelre su sangkoinu anggurku su lrou iye'." ²⁹ Bo, iya' nangi'ndo' kasaba': "Ode papa", tou pa'lrusu'ne i sie' ta'ya na'ko nambelre'. ³⁰ Pa'lrusu'nu ene', i papa nsi'dedua na'koni tou ana' kaduane bo napangu'lri'nu apamainu mapada'-pada' o'ngkamai si tou ana' guda-gudang. Ana' ene' nangi'ndo' kasaba': "Do'i' ma'ko", tou pa'lrsu'ne i sie' nahimbalrui bo na'kobe nambelre. ³¹ I sainu bua'nu duangkataunu ana' ene' kasaba' nantu'hu' si papa nsi'dedua ?" Si'de nangi'ndo' kasaba': " I tou samu'dine ". I Yesus nangu'lri' si si'de kasaba': " Ene' butul, ingenebo Iya' mangulri' si kumu' tou si'de manganga'lra' bilyet bo babinei mababa'lru'nu a'o' nsi'de dongka maipo'na sumu' su hu'a'ngnu Komalrigi'nu Mabuduata adabo pasihei age ngkumu'. ³² Yoka, i Yohanes sanai si kumu' su dalrennu kabanaran bo kumu' ta'yamai namarca'ya si sie', tou su pi'lrasa'ne, si'de manganga'lra' bilyet bo babi'nei pelacur ene' kasaba' namarca'ya si Yohanes. Bo, sadanu kumu' nakabuate su apamainu iye' tou palrusu'ne kumu' ta'yamai nahimbalrui, ingenebo kumu' ta'ya namarca'ya si sie'." Si'ndigi' Kagagionu Makatagu'a'n bo Matata'nda'nnu Sangkoinu Anggur. ³³ "Padadi'ngihi'te su si'ndigi'nu ba'lrine'. Pai makatagu'a'n sangkoi kasaba' nasasuan su sangkoinu anggur insau, bo nama'gehe' nakati'ku', bo nakalri' tampa pama'maha'n bu'anu anggur, bo napate'ngede'nu taingan malrangkasa' (menara). Pa'lusu'nu ene', i sie' kasaba' napata'nda'nnu sangkoine ene' su manenpi'de mambabelre'nu sangkoi, bo i sie' na'ko sime'ngko su Banua ba'lrine'. ³⁴ Sadanu o'lrasa'mainu panani'pon bu'ane, i sie' nangi'ngka' si si'de a'i'ngka'-a'i'ngka'ne su mamambelre'-mamambelre'nu sangkoine ene' yoka manga'lra' bu'ane. ³⁵ Bo, si'de mambabelrenu sangkoi kasaba' naho'go' si si'de a'i'ngka'-a'i'ngka'ne ene' bo namo'ga' si tou singkataune, bo namu'no' si tou singkataune, bo i tou singkatau ba'lrine' kasaba' pinalre'ng nsi'de agenu batu. ³⁶ Ka'pasa'kenmai, i tou makatagu'a'n sangkoi ene' nangi'ngka' si si'de a'i'ngka'-a'i'ngka' ba'lrine' kasaba' ti'a'ne lrimembo su ti'a'nu po'nane'. Bo, si'de mamambelre'nu sangkoi ene' kasaba' nangalri'mu' apamainu mapada'-pa'da si si'de. ³⁷ Pi'lrasa'ne, i tou makatagu'a'n sangkoi ene' nangi'ngka' ana' su pasingkaune si si'de agenu bahi'ga' kasaba': "Si'de dongka mani'lri' su ana'ku. " ³⁸ Tou manen ingene, sadanu si'de mamambelre sangkoi ene nakabuamai ana' nsi'de, si'de nahimbahi'ga'n su ha'nusu' mbatangen kasaba': " I Sie'nu bundu'ne, batebo bu'no'n yobo ha'mpase'n bundu'Ne." ³⁹ Senebo, si'de nahogo' si tou ana'nu makatagu'a'n sangkoi ene', bo pinama'lreng palro'a'ng bua'nu sangkoinu anggur ene', yobo binu'no' nsi'de. ⁴⁰ Yoka ene'bo, sadanu i tou makatagu'a'n sangkoinu anggur ene' naisupu'mai, apanu dongka kalri'mu'a'nne su si'de mamambelre-mamambelre'nu sangkoi ene' ?" ⁴¹ Si'de nabahi'ga' si Sie' kasaba': "I sie' dongka mapapa'teinu toumata-toumata dalrai ene' su kagagionu madadi'ha tumani, bo lragi dongka mapata'nda'nnu sangkoinu anggurne su mamambelre-mamambelrenu sangkoi ba'lrine', kaene'nu mpu'kayu ene' dongka mapabo'lroso'nu bu'ane naitana'mai su o'lrasa'nu pananipo'nne." ⁴² I Yesus naki'na' si si'de: " Apabo kumu' ta'yakenmai namaca' hoho'nu Ka'olro' kasaba' "Batu tinongkaha'nu (nilro'mbonu) mamambelre-mamambelre'nu balrei nu'alri'te batunu si'ku (penjuru). Apamainu iye' nu'a'lri' su sibi'nu Mabu, bo apamainu iye' naisu'ken su kaha'mata'nu mata ngkite. Buknu Mazmur 118: 22-23. ⁴³ Yoka ene'bo, Iya' nabo'ka' si kumu' kasaba': "Komalriginu Mabuduata dongka a'lra'en bua' ngkumu' bo ene' dongka bi'hei su toumata-toumata ha'nusu' napabo'lroso'tenu bu'ane. ⁴⁴ Bo, i sainu nana'bote su ti'mbounu batu iye' kasaba' dongka mapasa'-pasa' su ti'mpigi'ne; bo i sainu kana'bo'nnu batu iye' kasaba' dongka mahudodoi." ⁴⁵ Sadanu mangangi'moho'-mangangi'moho' makati'mbonan bo toumata-toumatanu Farisi nakadi'ngihi'may si'ndigi'-si'ndigi'Ne, si'de nakasi'lrigi' tou i Yesus kahaga'sa'nu bahi'-bahi'ga' si si'de. ⁴⁶ Tou manen ingene, sadanu si'de makako'atenu maho'go' si Yesus, ene' ta'ya naitu'mpa yoka si'de mata'ku'nu toumata da'kelre' yobo lragi toumata da'kelre' ene' nangatei tou i Yesus kasaba' mababa'lro'.