Si'ndigi' Kagagionu Si'de Mamambelre' Sangkoinu Anggur ¹ " Yoka, Komalrigi'nu Dompakon kasaba' o'ngkamai si tou makatagu'a'n sangkoi kasaba' su mahi'malrouken na'kote nande'a si'de mamambe'lre'nu sangkoinu anggurne. ² Sadanu i sie' napata'dusu'tenu baba'ehe'ne (tata'nda'nne) si si'de kasaba' naitana' sidinar silrou, i sie' nangi'ngka'mai si'de mambelre' su sangkoinu anggurne. ³ Bo, su hahama'nu pu'kulru' tatu'lru' mahi'malroumai i sie' na'ko bo nakabua mamambelre' ba'lrine' kahaga'sa'nu tenge'-tengede' su tampa pahisabua'nu toumata kasaba' ta'ya sibelrenan. ⁴ Senebo, i sie' nabo'ka' si si'de kasaba': "Kumu' lragi naha' a'kotenu sangkoinu anggurku bo kumu' dongka makade'a tatanda'n bo'bodo'ne bi'heiku si kumu'." Bo, si'de lragi na'ko nambelre'. ⁵ Ka'pasa'ken, su hahama'nu pukulru' nung madalri'mai bo pu'kulru' siou madalri'mai, i sie' na'ko bo nanga'lri'mu' su apamainu mapada'-pada'. ⁶ Bo, su hahama'nu pukulru' mapulro'-sa, i sie' na'ko bo nakade'aken mamambelre' ba'lrine' kahaga'sa'nu tenge'-tengede'ken lragi (ta'ya sibelrenan), bo i sie' nabo'ka' si si'de kasaba': "Nakudabo kumu' galre' napate'ngede'mai su sangkungnu lrou iye' yoka ta'ya siinsaumainu mapambelre' ngkumu' ?" ⁷ Si'de nangi'ndo' si sie' kasaba': "Yoka ta'yakenmai si insaunu mapambe'lre' si kami'." Senebo i tou makatagu'a'n sangkoi ene naboka' si si'de kasaba': "Kumu' a'kote lragi pambelre' su sangkoinu anggurku." ⁸ Sadanu lrou sumada'temai, i tou makatagu'a'n sangkoi ene' nabo'ka' su tuma'-tu'hu'nu mambabe'lre'ne kasaba': "Pokeitenai mayanu si'de mamambe'lre' ene' bo bi'heite tata'nda'n nsi'de su kagagionu ti'a'en kasaba' manu'suhu' bua'ni tou mambabelre' su samu'di'ne naida'o si tou mamambelre' su sa'humpu'nne." ⁹ Sadanu si'de pinata'nda'n bua'nu pu'kulru' mapulro'sa'ne sinai, hunti'a' nsi'de bineha'n su he'kennu sindinar lragi. ¹⁰ Sadanu si'de ha'nusu' pinatata'nda'n su sa'humpu'nne sinai, pini'kihi' nsi'de, si'de dongka makade'a' tata'nda'n mangkanga'sa' kasaba' lru'membo su tata'ndannu ha'nusu' mamambelre' su samu'di'ne. Tou pi'lrasa'ne, hunti'a' si'de kasaba' galre' lragi nakade'a tata'nda'nu sindinar (1 dinar). ¹¹ Sadanu manirimamainu tata'nda'nne, si'de kasaba' namapa'ha' (namrotes) si tou makatagu'a'n sangkoi. ¹² Si'de nangu'lri' kasaba': "Toumata-toumata hanusu' nambelre' su he'kennu galre' sinjam, nakudabo si'de nakade'a' tata'nda'nnu mapada'-pada'nu tata'nda'n ngkami', sadanu kami' nambelre' nabu'sa' bo kinahe'gentenu i'ha'nu matalrou sangkungnu silrou." ¹³ Tou manen ingene', i tou makatagu'a'n sangkoi ene' nangi'ndo' agenu bahi'ga' su singkatau bua'nu salra' nsi'de kasaba': "Nage, iya' ta'yamai si sa'lrane si kumu'. Apabo kumu' kasaba' ta'ya mantu'hu'su apanu tata'nda'n pinata'dusu'te ngkite kasaba' sindinar silrou ? ¹⁴ A'lra'te tata'nda'n a'pede' kumu' bo a'kote, tou iya' kasaba' nami'hei tata'nda'n su ha'nusu' mambabe'lre' samudi iye', kasaba' mapada'-pada'nu tata'nda'n ngkumu'. ¹⁵ Apabo iya' ta'ya pinabanar (ta'yamai si sa'lrane) yoka mangalri'mu' apanu pahikudaku naitana' su manga'tasa' mayanu a'pede'ku ? Manga'se', apabo mata ngkumu' dalrai bo yoka iya'nu mapi'a' ? ¹⁶ Yoka i tou su samu'di'ne dongka mu'a'lri' si tou sa'humpu'nne, bo i tou sa'humpu'nne dongka mu'alri' si tou samu'di'ne." I Yesus Nangi'ba'kennu Nabahi'ga'nu Kagagionu PapateiNe. ¹⁷ Sadanu i Yesus ma'komainu Yerusalem, i Sie' nani'ngan mapulro'-duanu tuma'-tuhu'Ne kasaba' ta'ya singkadi'nganen. Sangkunngnu su tolro'a'danu dalren, i Sie' nabo'ka' si si'de kasaba': ¹⁸ "Selreite, kite kahaga'sa'tenu sumu' su Yerusalem bo Ana'nu Toumata dongka bi'hei su mangangi'moho'-mangangi'moho' makati'mbonan bo papandei-papandeinu Torat. Si'de dongka mapahe'po'Ne agenu papatei. ¹⁹ Senebo, si'de dongka mami'hei si Sie' su bangsa-bangsa ba'lrine' bo kasaba' dongka: hahinu'a'n, pahesa'n, bo mapagantongNe su salib. Bo, su lrou katu'lru'mai, i Sie' kasaba' dongka pabi'a'ha' kasau." Pangkelreanni Mamanu Ana'-Ana'ni Zebedeus. ²⁰ Pa'lrusu'nu ene', i mamanu ana'-ana'ni Zebedeus nadi'nga'-di'ngan agenu ana'-ana'ne kasaba' sinaini Yesus bo naisumpuhuku' agenu ngkelreannu apamai si Sie'. ²¹ Bo, i Yesus naki'na' si sie' kasaba': "Apanu kasibi'nu ?". I sie' nangi'ndo' kasaba': " Bihainai parenta palretene' ana'ku duangkatau dongka humo'mpong masihei su hu'a'ngnu Komalrigi'Nu, singkatau humo'mpong su ku'a'nenNu bo singkatau humo'mpong su ku'ihi'Nu." ²² Tou manen ingene, i Yesus nangi'ndo' kasaba': "I kau ta'yamai makasi'lrigi' su apamainu pangkelre'annu. Apabo kumu' makapo'ha' su manginung bua'nu "cawan" kasaba' dongka inumanKu ?" Si'de nangi'ndo' si Yesus kasaba': " Ode,...kami makapo'ha'." ²³ I Yesus nabo'ka' si si'de kasaba': "Kumu' tangada' dongka manginung bua'nu CawanKu, tou i sainu humo'mpong su ku'a'nenKu manga'se' su ku'ihi'Ku, ene kasaba' ta'ya pangatase'n si sia', yoka i sainu maiho'mpong su ku'a'nen manga'se' su ku'ihi'Ku, ene' dongka pana'kede' (pasadia) ni YamaKU". ²⁴ Sadanu mapulro' tuma'-tu'hu' ba'lrine' nakadi'ngihi' apanu pinangkelre'a'nne, si'de kasaba' matingkoupi' su duangkatau sinage' nsi'de ene'. ²⁵ Manen ingene, i Yesus namokei si si'de bo nabahi'ga' kasaba': " Kumu' mati'ho'te tou si'de manganga'tasa'nu bangsa-bangsa ba'lrine' namerentate si si'de, bo toumata-toumata lra'mo' nsi'de napato'ndo'tenu a'toho' si si'de. ²⁶ Bo'bodo'ne ta'ya ingene' a'toho'ne su salra' ngkumu', yoka i sainu masibi'nu mu'a'lri' lramo' su salra' ngkumu', i sie' galre'te po'na mu'a'lri' mananu'su' ngkumu'. ²⁷ Bo, i sainu masibi'nu mu'alri' sa'humpu'nne su salra' ngkumu', i sie' galre'te po'na mu'a'lri' a'i'ngka' ngkumu', ²⁸ O'ngkamai Ana'nu Toumata sinaotenu dunia kasaba' ta'yamai sinalrangka'nnu toumata, tou su pi'lrasa'ne sinao nanalrangka' bo nami'hei bihu'a'Ne yoka mapasalra'mata'nu nga'sa' toumata." Duangkatau Toumata Buta Pinapi'a'Ne. ²⁹ Bo, sadanu si'de nani'ndenante Yerikho, ko'mpolro'nu toumata da'kelre' kasaba' timu'hu'-tu'hu' si Sie. ³⁰ Bo, duangkatau toumata buta kahaga'sa'nu ho'mpong-ho'mpong su pandihi'nu dalren, sadanu sidedua nakadi'ngihi' tou i Yesus dongka lru'mimpa' su sene', si'dedua nango'mbalra' kasaba': "Mabu, Ana'ni Daud, gilridainai kami' !." ³¹ Toumata da'kelre' ene' nane'po'ho' si si'dedua palretene' si'dedua kumu'ntung. Tou manen ingene, si'dedua nangi'ba'-ngiba' nangombalra agenu mangkalre'a'ngne kasaba': "Mabu, Ana'ni Daud, gilridainai kami' !". ³² Senebo, i Yesus timanga'ng bo namokei si si'dedua. I Sie' nabo'ka' kasaba': "Apanu kasibi'nu kalrimu'a'nKu si kumu ?" ³³ Si'dedua nangi'ndo' si Sie' kasaba': "Mabu, kami' masibi' adabo mata ngkami' mabi'ka'." ³⁴ I Yesus kasaba' ateiNe kimoho'a'nu gilridi' si si'dedua, bo nanulri' mata nsi'dedua, kasaba' singkahingku' mata nsi'dedua nabi'ka' kasau, bo si'dedua timu'hu'-tu'hu' si Yesus.