Tatu'ntu'annu Mata'hede' ¹ Sadanu i Yesus nakasueite nabahi'ga'nu babo'ka'en-babo'ka'en iye', i Sie' nani'ndenan Galilea bo na'konu Distriknu Yudea, kasaba' su si'mbaka'nu Ake'nu Yordan. ² Bo, ko'mpolro' lra'mo'nu toumata da'kelre' kasaba' timuhu'-tu'hu' si Sie', bo i Sie' napapi'a' nsi'de su sene'. ³ Manenpi'de toumatanu Farisi sinaini Yesus yoka manu'ka' (mama'ndang) si Sie' agenu bahi'ga' kasaba': " Apabo ta'ya sina'lra adabo mahu'anei mapata'hede'ni yangkungne agenu apamai apamainu sa'i'ne ? ⁴ Senebo, i Yesus nangi'ndo' agenu bahi'ga' kasaba': " Apabo kumu' ta'ya nama'ca tou i Sie'nu napaku'a'lri' nsi'de bua'nu sa'humpu'nnu papo'naken napakalri'mu' nsi'de kasaba' mahu'a'nei bo babi'nei, ⁵ bo i Sie'nu lragi nabahi'ga' kasaba': " Ingenebo mahu'a'nei galre'te mani'ndenan si papa bo si mamane', bo mu'a'lri' tibatu ageni yangkungne, bo si'dedua ene' dongka mu'a'lri' a'o' singkatau ? ⁶ Senebo, sidedua ta'yatemainu kasaba' dadua, tou nu'a'lri'te a'o' singkatau. Ingenebo, apanu nipasu'insa'utenu Mabuduata, kasaba' ta'ya mu'alri' paha'enu toumata". ⁷ Si'de nabo'ka' si Yesus, kasaba': "Nakudabo i Musa nami'hei parenta agenu nami'hei bo'he'nu ta'hede' bo mapata'hede'ni yangkung ?" ⁸ I yesus nabahi'ga' si si'de kasaba': "Yoka su sa'i'nu kalranu'nu atei ngkumu', i Musa nami'hei kalru'ase'nne si kumu' mapata'hede'ni yangkung ngkumu'. Tou manen ingene, bua'nu sa'humpu'nne kasaba' ta'yamai ingene. ⁹ Bo, Iya' mangu'lri' si kumu' kasaba': "i sainu mapata'hede'ni yangkungne su diming sa'i'nu salri'ba (nahilri'o'ng), bo i sie' maha'me' kasau agenu babi'nei ba'lrine', i sie' kasaba' mahi'lri'o'ng (mangalri'mu' zinah)." ¹⁰ Tuma'-tu'hu' tuma'-tu'hu'Ne nabahi'ga' si Sie' kasaba': "Adabo o'ngkamainu iye'nu kagagioni bulroi bo i yangkungne, pi'a'ne naha' ta'ya maha'me'." ¹¹ Manen ingene, i Yesus nabahi'ga' si si'de kasaba': "Ta'ya mayanu toumata kasaba' makasi'lrigi'nu bahi'ga' iye', tou diming su ha'nusu'nu si'de kasaba' bini'ha'nKute si'lrigi'ne. ¹² Yoka, pai ha'nusu'nu toumata kasaba' ta'yamai maha'me' yoka si'de naba'ntehe'te ingene bua'kennu kalrubaenni mama nsi'de, bo pai ha'nusu' toumata ta'yamai maha'me' yoka si'de pinaba'nto'tenu toumata ba'lrine', bo pai lragi ha'nusu' toumata kasaba' ba'nto' yoka napaba'nto'nu a'o' mbatangen, yoka su sa'i'nu Komalrigi'nu Dompakon. Adabo i sainu kasaba' nakatarima apamainu iye', pabayate i sie'nu manarimane ". I Yesus bo Ana'-Ana' Kokonio. ¹³ Pa'lrusu'nu ene', manenpi'da ana' kokonio nidi'ngan si Sie' palretene' i Sie' mapaka'mpete'nu lri'maNe su ana'-ana' ene' bo mango'mpu' si si'de. Tou manen ingene, tuma'-tu'hu' tuma'-tu'hu'Ne nane'poho' su toumata-toumata kokonio ene'. ¹⁴ Manen ingene, i Yesus nabo'ka' kasaba': " Pabaya'te ana'-ana' kokonio ene'. Adi'e'i malrabe'-lrabe' si si'de naini Iya' yoka Komalriginu Dompakon kasaba' Kinakatagu'a'nennu toumata-toumata o'ngkamai su kagagionu ana'-ana' kokonio iye'. " ¹⁵ Pa'lrusu'ni Yesus nanga'mpete'nu lri'maNe su ana--ana' ene, i Sie' kasaba' nati'mbusu' bua'nu tampa ene. Su Kagagionu Mande'a I'dopo' Su Ta'ya si A'kaha'ne. ¹⁶ Senebo, sinai singkatau si Yesus bo naki'na' kasaba': " Me'tehe', mapi'a' apamainu galre'te kalri'mu'a'nku palretene' iya' makade'a' i'dopo' ta'ya si a'kaha'ne ?" ¹⁷ Bo, i Yesus nangi'ndo' si tou toumata ene' kasaba': "Nakudabo i kau maki'na'nu apamainu mapi'a' ? Yoka galre' pai Singkataunu mapi'a'. Manen ingene, adabo i kau masibi'nu sumu' su hu'a'ngnu i'dopo' ta'yamai si a'kaha'ne, i kau galre'te mantu'hu' su parenta-parenta ene'." ¹⁸ Toumata ene' naki'na' kasau si Yesus, kasaba': "I tou Parenta unte ?" I'ndo'ni Yesus kasaba': "Adi'e'i mamu'no', adi'e'i mahi'lri'ong (masa'lriba' su kabing), adi'e'i mane'koso'-ne'koso', adi'e'i mami'hei sahi'di mangkedo, ¹⁹ pani'lri' si papanu bo si mamanu', bo gilridai su ha'nusu' toumata o'ngkamai gumilridi'nu o'a' mbatangen." ²⁰ Toumata dodio' (mangu'da'ken) ene' nabo'ka' si Sie' kasaba': "Maya apamainu ene' nikantu'hu'kute, yo apakennu ta'ya sito'mpodo'ne ?" ²¹ I Yesus nabahi'ga' si sie' kasaba': "Adabo i kau masibi'nu to'mpodo'ne, a'kote bo paba'lru'te maya apanu kinatagu'a'nennu. Senebo, ene' dongka bi'hei su hanusu' toumata taulrebo', kaenenu i kau dongka makade'a i'dopo' su dompakon, yobo botebo' tumu'hu' si Sia'." ²² Manen ingene, sadanu i tou toumata dodio'ken ene' nakadi'ngihi'mai su apanu pinabo'ka'Ne, i sie' na'ko nani'ndenan agenu atei nadodou, yoka i sie' kasaba' mangkaho'ko'. ²³ Yo, i Yesus nabo'ka' su tama'-tu'hu' tuma'-tu'hu'Ne kasaba': "Iya' mangu'lri'nu tu'tu'ne si kumu' tou masu'kada' su toumata maho'ko' sumu' su hu'a'ngnu Komalrigi'nu Dompakon. ²⁴ Ka'pasa'ken Iya' mengu'lri' si kumu' tou kasaba' mangkalru'a'sa'nu kumakahoa o'ngkamai Onta insau sumu' su po'mpongnu dadahu'ng adabo pasi'hei su suka'nu toumata maho'ko' sumu' su hu'a'ngnu Komalrigi'nu Mabuduata." ²⁵ Sadanu si'de tuma'-tu'hu'Ne nakadi'ngihi' su apanu pinabo'ka'Ne ene', si'de kasaba' nakakilringan tumani, bo nabo'ka' kasaba': "Adabo ingene, i sainu dongka pasalra'mata' ?" ²⁶ Senebo i Sie' timo'ntong si si'de bo nabo'ka' kasaba': "Su pi'kihi'nu toumata iye', ene' ta'yamai mi'naha', tou su pi'kihi'nu Mabuduata, mayane' ene' galre'te mi'naha'". ²⁷ Pa'lrusu'nu ene', i Petrus nabahi'ga' si Sie' kasaba': "Selreite, kami' nani'ndenante mayane' bo timu'hu'-tu'hu'te si Kau. Yo, apanu dongka kade'a' ngkami ?" ²⁸ Bo, i Yesus nabahi'ga' si si'de kasaba': "Iya' mangu'lri'nu kagagione si kumu' tou kumu'nu ha'nusu' tuma'-tu'hu' si Sia' su hu'a'ngnu dunia bu'hu' (Kerajaan 100 tahun Milenium di Bumi), sadanu Ana'nu Toumata kasaba' hi'mompongte su Dompakonnu kalra'mo'Ne (Tahta Kerajaan Milenium), kumu' lragi dongka humo'mpong su mapulro'-duanu dompakonNe yoka mapagoguta su mapulro'-dua Tanaha'nu Israel. ²⁹ Bo, hunti'a'nu toumata kasaba' nani'ndenante: balreine, tu'hangne mahu'a'nei, tu'hangne babi'nei, i papane, i mamane, bo ana'-ana'ne manga'se' sangkoine yoka su sa'i'nu adenKu kasaba' dongka makade'a' babi'hei su maha'tusu'nu kipi'ne bo dongka makade'a' i'dopo' (ko'ti') su ta'yamai si a'kaha'ne. ³⁰ Tou manen ingene, nga'sa' toumata kinahe'kenken su sa'humpu'nne kasaba' dongka mu'a'lri' kahe'ken su samudine, bo kinahe'kenken su samudine kasaba' dongka mu'a'lri' su papo'nane'."