I Sainu Ingkalra'mo' Su Hu'a'ngnu Komalriginu Dompakon ? ¹ Du'ngkulru'nu ene', tuma'-tu'hu' tuma'-tu'hu'Ne kasaba' sinaini Yesus bo naki'na': "I sainu Inkalra'mo' su hu'a'ngnu Komalriginu Dompakon ? " ² Senebo, i Yesus namokei ana' kokonio singkatau bo pinoso'Ne su tolro'a'da nsi'de, ³ bo nabahi'ga' kasaba': "Iya' mangu'lri'nu tu'tu'ne si kumu', adabo kumu' ta'ya mahimbalrui bo mu'a'lri' o'ngkamai ana'-ana' iye', kumu' ta'yamai sumu' su hu'a'ngnu Komalriginu Dompakon. ⁴ I sainu mapahi'ndanu a'o'ne o'ngkamai i tou ana' iye' kasaba' ingkalra'mo' su hu'a'ngnu Komalrigi'nu Dompakon. ⁵ Bo, i sainu nanirima si tou ana' kokonio iye' su sa'i'nu adenKu, i sie' kasaba' nanirimate si Sia'." Ti'ntudo' Tumalrede' Bua'nu Makana'bo su Dosa. ⁶ "Tou manen ingene, i sainu mapasa'lriba'nu singkatau bua' salra'nu ana'-ana' kokonio kasaba' namarca'yate si Sia' iye', pi'a'ne si sie' adabo i sie' i'ki'a'nnu talri' bo paha'pusu' agenu batu bagai (ba'baha') yobo pamalreng su lra'o'do a'kene' ingkadalrung". ⁷ Nabodi'tote' dunia yoka masasa'lriba'-masasa'lriba' (mababo'dito') kasaba' paite su hu'a'ngne ! Yoka, mapaku'lrehi' galre'tebe mualri', tou i tou mapakalri'mu'ne kasaba' mangkabo'dito'te. ⁸ Adabo lri'manu manga'se' ti'lro'nu kasaba' mapakalri'mu'nu su dosa, ene' pi'a'ne kotoha'n bo lro'mbote. Yoka pi'a'ne i kau sumu' su dompakon agenu lri'ma po'kolro' manga'se' pelrong apabo i kau nakatagu'a'n lri'ma dadua bo ti'lro' dadua tou pi'lrasa'ne i kau dongka lro'mbo su hu'a'ngnu pu'tungnu naraka kasaba' ta'yamai si a'ngkede'ne. ⁹ Adabo matanu kasaba' makabardosa si kau, ene' pi'a'ne sogelra'n bo lro'mbo. Yoka pi'a'ne kumu' sumu' su dompakon agenu mata nabu'tate, manga'se' makatagu'a'n mata dadua tou pi'lrasa'ne dongka lro'mbo su hu'a'ngnu pu'tungnu naraka." ¹⁰ " Pama'tese'te pakapi'a', adi'e'i kumu' mamandang enteng (ta'ya mamo'so' su he'kenne) su singkataumai bua'nu ana'-ana' kokonio iye'. Yoka, Iya' mapabahi'ga' si kumu' kagagionu toumata-toumatanu kalrutuan su dompakon kasaba' madimatenu tumo'ntong-to'ntong duhu'ni YamaKu su hu'a'ngnu dompakon", ¹¹ [Yoka, Ana'nu Toumata kasaba' sinaote napasalra'mata'tenu toumata bardosa (nalro'mbo')] Si'ndigi' Kagagionu Domba Nalro'mbo. ¹² Yo kakudanu mantu'hu' su pi'kihi' ngkumu' ? Adabo singkatau kasaba' makatagu'a'n maha'tusu'nu (100) domba, tou insau su salra' nsi'de kasaba' lrimengko'te, apabo i tou makatagu'a'n ene' ta'ya manulrau siou mpulro'-siounu domba-domba ene' bo ma'ko mande'a si tou insau kasaba' lrime'ngkote' ene ? ¹³ Bo, adabo i sie' nakahu'mpa'te si tou nalro'mbo ene', Iya' tanga'-tangada' mapabo'ka' si kumu' kasaba' i sie' lrimi'a'ga' tumani ni tou lrime'ngkote ene' adabo pahasa' su he'kennu siou-mpulro'-siounu domba kasaba' ta'ya lrime'ngko' ene'. ¹⁴ Ingene lragi, sibi'ni Yama ngkumu' su dompakon kasaba' i Sie' galre'te makahe'kennu mapasalra'mata' adabo pai singkatau bua'nu salra'nu ana'-ana' kokonio iye' kasaba' mapogo'. " Mapati'mumu'n su Toumata Nakapasa'lrate. ¹⁵ " Adabo tu'hang ngkumu' nabardosate, a'ko bo pakiselrei apanu kinasa'lranne su ha'nusu' kumudua ngkatau. Adabo i sie' madadi'nghi' si kau, i kau kasaba' nakade'a'ken si tou tu'hangnu ene'. ¹⁶ Tou manen ingene, adabo i sie' kasaba' ta'yamai madadi'ngihi' si kau, i kau panga'ha' singkatau manga'se' duangkatau toumata ba'lrine' agenu palretene' agenu mo'hongnu sahi'di' duangkatau manga'se' tulru'ngkatau, hunti'a'nu apamainu pinabo'ka' kasaba' pangatase'n. ¹⁷ Adabo i sie' nano'ngkaha' madadi'ngihi' si si'de, ene' galre'tebe' paida'o' su ho'ho'nu gahe'da. Bo, adabo i sie' tumana' su mano'ngkaha' su apanu pinabo'ka'tenu ho'ho'nu gahe'da, pabayate i sie' kasaba' nu'a'lri'te o'ngkamai bangsa-bangsa ba'lrine' bo o'ngkamai si'de manganga'lra' bilyet. ¹⁸ Iya' mapabo'ka'nu tu'tu'ne si kumu' tou apanu kinaha'pusu'te ngkumu' su tana bo lrangi kasaba' ene' dongka kaha'pusu' su dompakon. Bo, apanu pinolro'so'te ngkumu' su tana' bo lrangi', ene' kasaba' dongka polro'sa'n lragi su dompakon". ¹⁹ Ka'pasa'ken, Iya' mangu'lri' si kumu' tou adabo pai duangkatau su salra' ngkumu' kasaba' natibatute su atei su apanu pangkelre'a'n sidedua su tana' bo lrangi', ene' kasaba' dongka mu'alri' si sidedua yoka bini'heiteni YamaKu bua'nu dompakon. ²⁰ Yoka, su tampa kasaba' pai duangkatau manga'se' tulru'ngkatau naha'nsa' nadingan yoka mapanu'su'nu adenKu, Iya' kasaba' pai su tolro'a'da nsi'de. Si'ndigi' Kagagionu Mapa'ampung. ²¹ Pa'lrusu'nu ene', i Petrus sinaini Yesus bo naki'na' kasaba': "Mabu, su pida'nu di'ma'ne iya' bo'bodo'ne mapa'ampung su tu'hangku sadanu i sie' nanga'lri'mu'te dosa si sia' ? Apabo maida'o' su pi'tu' ngkipi' ?" ²² I Yesus nangi'ndo' si sie' kasaba': "Iya' ta'ya nangu'lri' si kumu' maida'o su pi'tu' ngkipi' tou maida'o su pi'tu'-pulro' su kipi'ne bo kipi'a'nken su pi'tu' ngkipi'. ²³ Yoka ingenebo, Komalrigi'nu Dompakon pinasi'ndigi' o'ngkamai i tou dika singkatau kasaba' nahi'hahe'ken agenu si'de a'i'ngka'ne. ²⁴ Sadanu i sie' nana'humpu'ntenu mahi'hahe'ken, toumata nakabalra'sa' (nangu'tang) su kanga'sa'nu mapulro'-hibu (10.000) su talentane kasaba' pinokei (nidi'ngan) su hiba'ne. ²⁵ Yoka i sie' kasaba' ta'yate makaba'ehe', i tou makatagu'a'nne nami'hei parenta palretene' i sie' paba'lru' ageni yangkung bo ana'-ana'ne, yobo maya apanu a'pede'ne, bo ene' dongka pama'ehe' (panubu'su') su mayanu binalra'sa'ne (utangne). ²⁶ Mante, i tou a'i'ngka' ene' naisumpuhuku' bo nasu'bate si tou makatagu'a'nne, bo'ka'ne kasaba': " Panabarken si sia' yoka iya' dongka mama'ehe' mayanu binalra'sa'ku si kau." ²⁷ Pa'lrusu'nu ene', i tou makatagu'an si tou a'i'ngka' ene' kasaba' ateine nadodounu gilridi', bo napamolro'so'tenu utangne yobo lragi napami'heitenu a'a'mpung su apanu binalra'sa'ne ene. ²⁸ Tou manen ingene, sadanu i tou a'i'ngka' ene' lrimo'a'ngmai bua'nu hahe'po'a'n bo nahisabu agenu a'i'ngka' ba'lrine' kasaba' nakaba'lra'sa' maha'tusu' (100) su dinar si sie', i sie' naho'go' si sie' agenu nangi'mbisi' he'he'ni tou a'i'ngka' ene' bo nabo'ka' kasaba': "Ba'ehai kasau doiti binalra'sa'nu si sia'." ²⁹ Mante, i tou a'i'ngka' nakaba'lrasa' ene' naisu'mpuhuku'te agenu ngkelre'an si sie' kasaba': " Panabar po'na si sia' yoka iya' dongka mapangu'lre' (mama'ehe') maya apanu bi'nalra'sa'ku si kau." ³⁰ Tou manen ingene, i sie' nano'ngkaha' bo napahe'po'ni tou sinage'ne ene' su hahe'po'an naida'o su i sie' nakaba'ehe' mayanu binalra'sa'ne. ³¹ Sadanu a'i'ngka-a'i'ngka' ba'lrine' nakabua apanu kinalri'mu'ne ene', atei nsi'de nadodou ingenebo si'de na'ko napa'ida'o si tou makatagu'a'nne kasaba' maya apanu kinakalri'mu'ne. ³² Pa'lrusu'nu ene', i tou makatagu'a'n namokei si tou a'i'ngka sa'humpu'nne bo nabo'ka' si sie' kasaba': "I kau a'i'ngka dalrai. Iya' napa'a'mpungtenu (napalri'sa'tenu) maya' apanu bi'nalrasa'nu si sia' yoka i kau tumana' su mangkelreinu makitu'lrung si sia'. ³³ Apabo i kau' kasaba' ta'yamai si gilridi' su ha'nusu' sinage'nu a'i'ngka mbatangen, o'ngkamai su apanu lragi iya' nami'heite gilridi' si kau ?" ³⁴ Bo, i tou makatagu'anne, agenu haha'ngu'a'nnete, nami'hei si sie' su si'de malralru'baga' naida'o' su i sie' nama'ehe'te kasau maya apanu bi'nalrasa'ne si sie'. ³⁵ I YamaKu su dompakon kasaba' dongka lragi mangalri'mu' o'ngkamai mapada'-pada'nu apamainu kinalri'mu'te kumu' su ha'nusu'nu tu'hang ngkumu', adabo kumu' kasaba' ta'ya mapa'a'mpung su tu'hang ngkumu' bua'nu hu'a'ngnu atei ngkumu'."