I Yesus Natingkababua Ageni Musa bo I Elia ¹ Pa'lrusu'nu nung lroumai, i Yesus nanga'ha' si Petrus, si Yakobus, bo si Yohanes tu'hangni Yakobus, yobo nani'ngan si si'de na'bi su kantangnu bulrudu' malrangkasa' pai su sene'. ² Senebo, a'o'ni Yesus nahimbalrui su hongo'-hongo'an nsi'de. Duhu'Ne suma'hansa'ng o'ngkamai matanulrou bo lra'ku'Ne nambi'da o'ngkamai bida'nu sa'hansa'ng. ³ Bo, selrei, nakiti'ngkababua si si'de kasaba' i Musa bo i Elia, kahaga'sa'nu bahi'-bahi'ga' ageni Yesus. ⁴ I Petrus nabo'ka' si Yesus kasaba': "Mabu, mante pi'a'ne yoka kite pai su sie', bo iya' dongka mamangon tatulru' sasulrungan (gonggulrang)su sie' kasaba': insau si Kau, insau si Musa, bo insau si Elia." ⁵ Sadanu i Petrus kahaga'sa'kennu bahi'-bahi'ga, singkabua suayanu binaba nanulrubu' si si'de, bo selrei, pai pulrung bua'nu binaba ene' agenu babo'ka'en kasaba': " Iye'tenu Ana'Ku kagilridiKu, si Sie'nu Iya' makako'a. Padadi'ngihi' si Sie'." ⁶ Sadanu tuma'-tu'hu' tuma'-tu'hu'Ne nakadi'ngihi' si Sie', si'de naisumpu'huku' agenu duhu' nsi'de su tana' bo tima'ku' tumani. ⁷ Manen ingene, i Yesus sinai bo nanu'lri' si si'de agenu bahi'ga'Ne kasaba': " Te'ngede'te bo adi'e'i tuma'ku'-ta'ku'. ⁸ Sadanu si'de nangi'a'ng duhu' nsi'de, si'de ta'te nakabua i sainu pai su sene', tou diming i Yesus su pasingkataumai. ⁹ Sadanu si'de ni'ntuhu'mai bua'nu bulrudu' ene', i Yesus namerenta si si'de agenu bahi'ga'Ne kasaba': "Adi'e'i mapabo'ka'nu apamainu kinabuate ngkumu' su sie' su toumata singkataumai naida'o su lrou Ana'nu Toumata kasaba' pinabi'a'ha'mai bua'nu salra'nu tounatei." ¹⁰ Bo, tuma'-tu'hu' tuma'-tu'hu'Ne naki'na si Sie' kasaba': "Nakudabo papandei-papandeinu Torat nabo'ka' tou i Elia dongka nai su papo'naNe ? ¹¹ I Yesus nangi'ndo' kasaba': "I Elia tangada' sinao su po'nane' bo dongka mapato'mpodo'nu mayane'. ¹² Manen ingene, Iya' mabo'ka' si kumu' tou i Elia kasaba' sinaite, tou si'de ta'yamai nakakilra'lra' si sie' bo napakalri'mu'ne nantu'hu' si sibi' nsi'de. Ingene lragi Ana'nu Toumata dongka lrubage'n madadi'ha' su lri'ma nsi'de". ¹³ Pa'lrusu'nu ene', si'de tuma'-tu'hu'Ne buhu' nakasi'lrigi' tou i Sie' nabo'ka' si si'de su kagagioni Yohanes Mananaha'ni'. Ana' Singkatau Dongka Pamu'lre' (Polrosa'n) Bua'nu Hanga'-Hanga'n Dalrai. ¹⁴ Sadanu i Yesus bo tuma'-tu'hu' tuma'-tu'hu'Ne nabalri' su toumata da'kelre' ene', i tou mahu'a'nei singkatau sinaini Yesus bo naisu'mpuhuku' si hibaNe agenu bahi'ga' kasaba': ¹⁵ "Mabu, gilridainai ana'ku yoka i sie' kinaboho'kantenu saki (mati-mati ayang) bo nadadi'ha'te tumani. I sie' madimatenu mana'bo su hu'a'ngnu putung bo su hu'a'ngnu ake. ¹⁶ Iya' nani'ngante si sie' su tama'-tu'hu' tuma'-tu'hu'Nu, tou si'de ta'yamainu nakapi'a'ne." ¹⁷ I Yesus nangi'ndo' kasaba': "Ona...kumu' kasaba' taha'na' buhu' ta'yamai namarca'ya bo lrime'ngkote ! Pidanu lroumai Iya' dongka mahaha'ge'ken age ngkumu' ? Pidanu lroumai Iya' galre'te manabar si kumu' ? Di'ngannai ana' ene' si Sia'." ¹⁸ Senebo i Yesus nahengge' si tou hanga'-hanga'n dalrai ene' naida'o' su i sie' lrimo'a'ng bua'nu ana' mahu'anei ene', bo su galre'-galre' i ana' ene' kasaba' napi'a'. ¹⁹ Pa'lrusu'nu ene' si'de tuma'-tu'hu'Ne sinaini Yesus sadanu toumata ba'lrine' nati'mbusu'temai ageNe, bo naki'na' kasaba': "Nakudabo kami' ta'yamai maka'u'sehe' si tou hanga'-hanga'nnu dalrai ene' ?" ²⁰ Bahi'ga'Ne si si'de kasaba': "Yoka parca'ya kumu' kokonio. Iya mapabo'ka'nu tutu'ne si kumu' kasaba' adabo kumu' makatagu'a'n parca'ya o'ngkamai kabagainu mbenenu sesawi, mante kumu' makaba'hi'ga' su bulrudu' iye' kasaba': "Pame'ho'te bua'nu tampane iye' ma'konu tampa ba'lrine' !" bo bulrudu ene' dongka mape'ho'. Ta'ya siapamainu ta'ya mi'naha' si kumu'. ²¹ [Manen ingene, kagagioni tou hanga'-hanga'n dalrai iye' dongka ka'u'sehe' agenu o'mpu bo maha'da'n hutung"] I Yesus Nabahi'ga' su Kagagionu PapateiNe. ²² Sadanu i Yesus bo tuma'-tu'hu' tuma'-tu'hu'Ne kahaga'sa'kenu nako'mpolro' su distriknu Galilea, i Sie' nabo'ka' si si'de kasaba': "Ana'nu Toumata dongka o'ngkoho' (bi'hei) su lri'manu toumata, ²³ bo si'de dongka mamu'no si Sie', bo i Sie' dongka pabi'a'ha' kasau naitana'mai su lrou katulru'ne." Bo, si'de tuma'-tu'hu'Ne kasaba' nadodou atei nsi'de. Tatu'ntu'a'nnu Mama'ehe' Bilyet. ²⁴ Sadanu si'de naida'o'te su Kapernaum, si'de' manganga'lra' bilyetnu 2 dirham sinaini Petrus bo naki'na' kasaba': " Apabo i me'tehe' ngkumu' ta'ya nama'ehe' bilyet 2 dirham ?" ²⁵ I Petrus nangindo': "Ode". Sadanu i sie' simu' su hu'a'ngnu balrei, i Yesus nabahi'ga' po'na si sie' kasaba': "Kakuda su pi'kihi'nu Simon ? Bua'ni sainu si'de dika-dikanu dunia kasaba' manga'lra' ongkos bo bilyet ? Apabo bua'nu ana'-ana' mbatangen manga'se' bua'nu toumata ba'lrine' ?" ²⁶ Sadanu i Petrus nangi'ndo' kasaba': "Bua'nu toumata ba'lrine', i Yesus nabo'ka' si sie': "Adabo ingene, ana'-ana'ne kasaba' napo'lroso'te. ²⁷ Tou manen ingene, palretene' kite ta'ya makati'ngku' pandamen nsi'de, a'kotenu lrinou bo pango'pasa' su sene. A'lra'te ki'nasa' kina'o'pasa' su sa'humpu'nne bo sadanu i kau mami'ka' mo'hongne, i kau dongka makadapata' gobang insau. A'lra'te doiti ene' bo bi'hei si si'de, su sa'i'nu si Sia' bo si kau lragi".