Toumatanu Farisi bo Toumatanu Saduki Namanda'ng si Yesus ¹ Pa'lrusu'nu ene', toumata-toumatanu Farisi bo Saduki sinai mamanda'ng (manuka') si Yesus. Si'de nangkelrei mante i Yesus mapakiselrei si si'de kasaba' bo'basa' insau bua'nu dompakon. ² Manen ingene, i'ndo'ni Yesus kasaba': "O'lrasa'nu humibi'mai, kumu' mangu'lri' "Cuaca matingkasa' yoka lrangi himendengte". ³ Bo, su tahibi' madalrimai, "Lrou iye' dongka mami'pihi' madapa' yoka lrangi mahendeng bo malri'." Kumu' mati'ho' kagagionu mapasisei (mapaha'e) duhu'nu lrangi, tou ta'yamai makapasiseinu bo'basa'-bo'basa' po'ndolro'nu dunia. ⁴ Taha'na-bu'hu' dalrai bo mahilri'ong iye' kasaba' mangkelrei bo'basa' insau, tou ta'ya siinsaumainu bo'basa' bini'hei si si'de, tou diming bo'basa'ni Mababa'lro' i Yunus." Senebo, i Sie' nanindenan si si'de. Mapasa'lrisigi' Kagagionu Hapa'ngnu Toumata Farisi bo Saduki. ⁵ Sadanu tuma'-tu'hu' tuma'-tu'hu'ne nasobamai su simbakanu lrinou, si'de nakalrupa nani'ngan hoti. ⁶ Bo, i Yesus nabo'ka' si si'de kasaba': "Patesai pakapi'a' bo panega'ng su hapa'ngnu toumata-toumata Farisi bo si'de Saduki." ⁷ Bo, si'de nana'humpu'ntenu mapabahi'ga'nu kagagione su salra'nu ha'nusu' nsi'de agenu bahi'ga' "yoka kite iye' ta'ya nani'ngan hoti". ⁸ Manen ingene, i Yesus mati'ho'nu apamainu ene' bo nabo'ka' kasaba': "Ona', kumu' toumata ta'yamai naganang parca'yane, nakudabo kumu' mahimbo'ka'ente su ha'nusu' ngkumu' su kagagionu yoka ta'ya nani'ngan hoti ?" ⁹ Apabo kumu' ta'yakenmainu makasi'lrigi' bo lragi ta'ya makata'hunungnu galre' lri'ma hoti kasaba' napakika'nnu lri'ma-hibu ngkatau, bo pida'mainu ba'lre'ken kasaba' nalrembei pinahahi'mung ngkumu ? ¹⁰ Manga'se', galre' pi'tu' hoti kasaba' pinakika'n su mpa'-hibu' ngkatau, bo kasaba' pida'mbalre'ken nalrembei pinaha'hi'mung ngkumu' ? ¹¹ Kakudanu kagagio ngkumu' kasaba' ta'yamai makasi'lrigi' tou Iya' ta'yamai kahaga'sa'nu mabahi'ga' si kumu' su kagagionu hoti ? Tou manen ingene, kumu' galre'te panega'ng su hapa'ngnu toumata-toumata Farisi bo si'de Saduki." ¹² Pa'lrusu'nu ene', si'de kasaba' nakasi'lrigi'te tou i Sie' ta'ya napabo'ka'nu panega'ng su hapa'ngnu hoti tu'tu'ne, tou manega'ng su tatun'tu'annu toumata-toumata Farisi bo si'de Saduki. I Yesus Kasaba' i Mesias. ¹³ Sadanu i Yesus naida'o'mai su Distriknu Galilea, i Sie' naki'na' su tuma'-tu'hu' tuma'-tu'hu'Ne kasaba': " Mantuhu' su babo'ka'nu toumata, i sainu kasaba' Ana'nu Toumata ene' ?" ¹⁴ Si'de nangi'ndo': " Manenpida nangu'lri' si Kau kasaba' i Yohanes Mananaha'ni', ba'lriine' nakasaba' i Kau i Elia, bo ba'lrine' lragi nabgu'lri' i Kau i Yeremia, manga'se' su salra'nu si'de mababa'lro'. " ¹⁵ Senebo, i Yesus naki'na' si Petrus kasaba': " Tou manen ingene, mantuhu' si kau Petrus, i sainu Iya' iye' ?" ¹⁶ I Simon Petrus nangi'ndo' kasaba': " I Kau kasaba' i Mesias, Ana'nu Mabuduata kasaba' i Tou Bi'a'ha' !." ¹⁷ I Yesus nabahi'ga' si sie' kasaba': "Kina'mpete'mai i kau, i Simon ana'ni Yunus, yoka ta'ya sibi'nu lre'oso' bo da'ha' napasaba'nu iye' si kau, yoka ene' nabo'lroso' bua'ni YamaKu su dompakon. ¹⁸ Bo, Iya' lragi mangu'lri' si kau kasaba' adennu i Petrus. Yoka su ti'mbounu batu iye', Iya' dongka mamangon tuma'-tu'hu'nu gahe'daKu bo haha'mpede'-haha'mpede'nu Hades kasaba' ta'yamai makapakudane. ¹⁹ Iya' dongka mami'hei si kau kasaba' kakunsi-kakunsinu Komalrigi'nu Dompakon. Bo, apamainu ka'i'ki'nu su tana' bo lrangi, ene' dongka lragi ka'i'ki' su dompakon. Bo, apamainu kapo'lroso'nu su tana' bo lrangi, ene' dongka lragi mapo'lroso' su dongpakon". ²⁰ Senebo, i Yesus napata'hunu'ng su tuma'-tu'hu' tuma'-tu'hu'Ne palretene' si'de adi'e'i makasaba' su pasingkataumai tou i Sie'nu kasaba' i Mesias. I Yesus Mapabo'ka'nu Kagagionu PapateiNe. ²¹ Maida'o' su lrou ene', i Yesus nana'humpu'ntenu makiselrei su tuma'-tu'hu' tuma'-tu'hu'Ne tou i Sie' galre'tebe ma'konu Yerusalem bo mabu'sanu dadi'ha su nga'sa' apamai bua'nu si'de gagudang-gagudangnu Farisi, mangangi'moho'-mangangi'moho' makati'mbonan manga'se' papandei-papandeinu Torat, senebo buno'n bo dongka mabi'a'ha' kasau su lrou katulru'ne. ²² Pa'lrusu;nu ene', i Pterus nangi'ntoi si Yesus agenu nane'poho'si Sie' kasaba': "Mabu, adabo bo'bodo'ne Mabuduata mapada'uni Kau bua'nu apamainu ene' ! Yoka apamainu iye' kasaba' ta'yamainu mu'a'lri' si Kau." ²³ Tou manen ingene, i Yesus lrimingo' ko lri'kudu' bo nahe'ngge' si Petrus, kasaba': " Ta'lrangte i kau bua'nu duhu'Ku...bihisi' ! I kau kasaba' batu-katada'n si Sia' yoka su pi'kihi'nu i kau ta'ya nantu'hu' su apamai-apamai bua'nu Mabuduata, tou diming su apamai-apamai bua'nu toumata." ²⁴ Senebo i Yesus nabo'ka' su tuma'-tu'hu' tuma'-tu'hu'Ne kasaba': " Adabo painu masibi' tumu'hu' si Sia', i sie' galre'te mapalri'sa'nu sibi' mbatangen, mama'sa'n salibne, bo tumu'hu' si Sia'. ²⁵ Yoka i sainu masibi'nu mapasa'lramata'nu hi'mukudu' mbatangen kasaba' dongka kata'yannu bihu'a'ne. Tou manen ingene, i sainu kata'yannu himikudu'ne yoka su sa'i'nu kagagioKu, i sie' kasaba' dongka makatagu'a'nne kasau. ²⁶ Apanu u'ntungne adabo kumu' kasaba' makatagu'a'n su maya ho'ho'nu dunia, tou p'ilrasa'ne dongka kata'yannu hi'mukudu'ne ? Manga'se', apamainu dongka kabi'heinu toumata singkatau yoka panga'husu' su kata'yannu hi'mukudu'ne ? ²⁷ Yoka, Ana'nu Toumata dongka nao (kasau) su hu'a'ngnu tinanumanni YamaNe agenu si'de toumatanu kalrutuanNe bo si'de kasaba' dongka mamo'sada' su hunti'a'nu toumata mansulrungnu kinakalri'mu' nsi'de. ²⁸ Iya' mapabahi'ga'nu tu'tu'ne si kumu', yoka manenpi'da toumata kasaba' tenge'-tengede'ken su sie' kasaba' bi'a'ha'ken yoka si'de dongka makabua si Tou Ana'nu Toumata kasaba' nao su hu'a'ngnu Komalrigi'Ne. "