Sa'nihi'nu Mabuduata bo A'data'nu Toumata ¹ Pa'lrusu'ne ene', manenpi'da toumatanu Farisi bo papandeinu Torat bua'nu Yerusalem sinaini Yesus bo nabahi'ga' kasaba': ² Nakudabo tuma'-tu'hu' tuma'-tu'hu'Nu nano'ngkaha' su a'data'nu gagudang po'na ? Yoka, si'de ta'yamai nangu'hasa' lri'ma sadanu kuma'n hoti !" ³ Bo, i Yesus nangi'ndo' agenu bahi'ga' si si'de kasaba': "Bo, nakudabo kumu' nano'ngkaha' su parentanu Mabuduata su sa'i'nu a'data' ngkumu' ? ⁴ Yoka Mabuduata nangu'lri' kasaba': " Panilri' si papa bo si mama ngkumu". bo isainu nabo'boho' si papa managa'se' si mama ngkumu', kasaba' dongka he'po'annu papatei". ⁵ Manen ingene, kumu' nabo'ka': " I sainumay mabahi'ga' si papa manga'se' si mamane kasaba': "Apamainu babi'hei bini'hei si kumu' ene' kasaba' pinatu'mbalra'te su Mabuduata," ⁶ i sie' ta'yate bo'bodo'ne mani'lri' si papa manga'se' si mamane. Palretene', kumu' mapalri'sa' bahi'ga'nu Mabuduata su sa'i'nu a'data' ngkumu'. ⁷ Kumu', toumata-toumata kulre'hi', tangada' ta'ya si sa'lrane apanu pinaba'lro'teni Yesaya su kagagio ngkumu' kasaba': ⁸ Bangsa iye' mani'lri' si Sia' agenu mo'hong nsi'de, tou atei nsi'de kasaba' madau bua'ni Iya'. ⁹ Bo, ta'yamai si katana'nne nsi'de masu'ba si Sia' yoka si'de mapatu'ntu' parenta-parentanu toumata." ¹⁰ Bo, i Yesus namokei toumata da'kelre' bo nabahi'ga' kasaba': "Di'ngihai bo silrigaite ! ¹¹ Diming apanu sumu' su hu'a'ngnu ti'a'n kasaba' mapasu'lremoko'nu toumata, tou apanu lrumo'a'ng bua'nu mo'hongne, ene'nu mapasu'lremoko' su toumata." ¹² Pa'lrusu'ne ene', tuma'-tu'hu' tuma'-tu'hu'ni Yesus sinai bo naki'na' si sie' kasaba': "Apabo i Kau mati'ho' tou toumata-toumatanu Farisi natingkau'pi sadanu nakadi'ngihi' apanu pinakitato'n ene' ?" ¹³ Manen ingene', i Yesus nangi'ndo' agenu bahi'ga' kasaba': "Hunti'a'nu sasuan ta'ya sinuanni YamaKu kasaba' su dompakon, dongka bubulra'n agenu maya ha'mu'-ha'mu'ne. ¹⁴ Pabaya'te si'de. Si'de kasaba' mapati'ntudo-mapati'ntudo buta bua'nu toumata-toumata buta. Bo, adabo toumata buta mapati'ntudo su toumata buta, si'dedua dongka mana'bo su po'mpong madi'nga'-di'ngan." ¹⁵ I Petrus nabo'ka' si Sie' kasaba': " Pasa'lrisigi'ken nai si'ndigi' ene' si kami'." ¹⁶ I Yesus nangu'lri': "Apabo kumu' ta'yakenmai makasa'lrisigi' lragi ? ¹⁷ Apabo kumu' ta'ya mati'ho' tou maya apamainu sumu' su hu'a'ngnu mo'hong dongka mi'ntuhu' su hu'a'ngnu ti'a'n bo dongka palro'mbo su ka'kusu' ? ¹⁸ Tou manen ingene, apanu lrumo'a'ng bua'nu mo'hon nabo'lroso' bua'nu atei, bo ene'nu makasu'lremoko' a'o'nu toumatama. ¹⁹ Yoka bua'nu atei lrimotou i'mun-i'mun dalrai, pamamu'no'n, pahilri'o'ngan, dosa-dosanu seks, panekosa'n, sahi'di mangkedo, bo hahi'nu (bahi'ga' gau). ²⁰ Apamai apamainu iye'tenu makasu'lremoko' su toumata, yoka kuma'n agenu ta'yamai mangu'hasa' lri'ma ene' ta'ya makasu'lremoko' su toumata". I Yesus Natulrung Si Tou Babi'neinu Kanaan. ²¹ Pa'lrusu'nu ene', i Yesus nati'mbusu' bua'nu tampa ene' bo na'konu Distriknu Tirus bo Sidon. ²² Bo, i tou babi'neinu Kanaan bua'nu Distrik ene' sinai bo nakakui: " Gilridainai iya' Mabu, kasaba' Ana'ni Daud ! Yoka ana'ku babi'nei kinaho'ho'ntenu hanga'-hanga'nnu dalrai bo mangkadadi'ha." ²³ Tou manen ingene, i Yesus ta'yamai nami'hei simbo'ka' si tou babi'nei ene'. Bo, tuma'-tu'hu' tuma'-tu'hu'Ne sinai bo nanesege' si Sie' agenu bahi'ga' kasaba': "Ingka'te i sie' pati'mbusu' yoka i sie' tumana' su mango'mbalra'-ngo'mbalra' su lri'kudu' ngkite". ²⁴ Senebo, i Sie' nangi'ndo'agenu bahi'ga' kasaba': " Iya' galre' nii'ngka' su domba-domba kasaba' nalro'mbote bua'nu tahana'nu Israel." ²⁵ Pa'lrusu'nu ene', i tou babi'nei ene' lrimapa' bo naisu'mpuhuku' su hiba'ni Yesus, agenu bahi'ga' kasaba': "Mabu, tulrungainai iya' !" ²⁶ Manen ingene, i Yesus nangi'ndo' agenu bahi'ga' kasaba': " Ta'ya mapi'a' (bo'bodo'ne) manga'lra' hoti apedenu ana'-ana'nu Israel bo pama'lreng su kapuna-kapuna". ²⁷ I tou babi'nei ene' nangi'ndo' kasaba': "Tangada' Mabu, yoka kapuna-kapuna ene' kumaka'n lrembei-lrembeinu hoti kasaba' nana'bo bua'nu salrangkani tou makatagu'a'nne". ²⁸ Pa'lrusu'ne ene', i Yesus nabahi'ga' si sie' kasaba': " Selrei babi'nei, parca'yanu mangkalra'mo' ! Nu'a'lri'te si kau o'ngkamai su apanu kasibi'nu". Singkakoa, ana' babi'nei ni tou babi'nei ene' kasaba' napi'a'. I Yesus Napapi'a'nu Ngasa' Toumata. ²⁹ I Yesus nati'mbusu' bua'nu tampa ene', bo nanu'suhu' pandihi'nu Danou Galilea. Bo, sadanu na'bi su ti'mbounu bu'kidi', i Sie' himo'mpong su sene'. ³⁰ Senebo, ko'mpolro' lra'mo'nu toumata sinai si Sie' nani'ngan toumata-toumata kasaba': pelrong, apker, buta, gugu', bo toumata da'kelre' ba'lrine'. Senebo, si'de napalroka toumata-toumata ene' su ti'lro'ni Yesus bo pinapi'a'Ne ha, ³¹ palretene' toumata da'kelre' ene' pasikakilringa'nmai sadanu si'de nakabua: si tou gugu' nabahi'ga'te, si tou apker napi'a'te, si tou pelrong lrima'mpangte, bo si tou buta nakabuate. Bo, si'de napatinanum su Mabuduatanu Israel. I Yesus Napakika'n Ti'a'nu Toumata Lrume'mbo su Mpa'-Hibu Ngkatau. ³² Senebo, I Yesus namokei tuma'-tu'hu' tuma'-tu'hu'Ne bo nabahi'ga' kasaba': " Iya' gumilridi' tangada' su toumata-toumata ene' yoka si'de timuhu'-tu'hu'te si Sia' sangkungnu tulru' lroute bo kinasueantenu kakanen. Bo, Iya' do'i' mapabei si si'de agenu kahutuman palretene' si'de ta'ya mapalao su tolro'a'danu dalren. ³³ Pa'lrusu'nu ene', si'de tuma'-tuhu'Ne nabahi'ga' si Sie' kasaba': " Bua' nunte kite dongka makade'a hoti nga'sa' su tampa ta'yamai si toumata iye' kasaba' mapabi'ha' kanga'sa'nu toumata iye'." ³⁴ I Yesus naki'na' si si'de kasaba': " Pida kanga'sa'nu hoti pai si kumu ?" Si'de nangi'ndo' kasaba': " Pi'tu', bo manenpi'da ki'nasa' kokonio". ³⁵ Senebo, i Yesus namarenta toumata da'kelre' ene' kasaba' humo'mpong su tana'. ³⁶ Pa'lrusu'ne ene', i Sie' nanga'lra' mayanu pi'tu' hoti agenu ki'nasa'-ki'nasa' ene. Bo, sadanu nami'hei tabeapa, i Sie' napamasa'-masa'ne, bo bini'hei su tuama'-tu'hu'Ne, bo ene' pinaida'o nsi'de su toumata da'kelre' ene'. ³⁷ Si'de mayane' kima'n bo nabi'ha'. Senebo, si'de napaha'hi'mungken papoto'a'n-papoto'a'n nalrembei, kasaba': Pi'tu'kennu balre' nahe'me'. ³⁸ Si'de ha'nusu' kima'n kasaba': "Mpa'-hibu ha'nusu' mahu'a'nei, ta'ya naisu' su babi'nei bo ana'-ana'. ³⁹ Senebo i Sie' nangi'ngka' toumata da'kelre' ene pabeite. I Yesus sima'kei su saka'en bo na'konu Distriknu Magadan.