I Herodes Nakadi'ngihi' Lrilringnu Kagagioni Yesus ¹ Du'ngkulru'nu ene', i Herodes, kasaba i Dikanu Distrik, nakadi'ngihi' lrilring-lrilringnu kagagioni Yesus. ² Bo, i sie' nabahi'ga' su a'i'ngka'-a'i'ngka'ne kasaba': " Iye'tenu i Yohanes Mananaha'ni'. I sie' nabi'a'ha'te bua'nu salra'nu toumata natei yoka ene'nu kaha'mata'-kaha'mata' iye' kasaba' nambelre su hu'a'ngnu a'o'Ne." Kagagionu Papateini Yohanes Mananaha'ni'. ³ Yoka, i Herodes kasaba' naho'go'te si Yohanes, i sie' nii'ki' bo pinasu' su hahe'po'an yoka i Herodias, i yangkungni Filipus, tu'hangni Herodes. ⁴ Yoka i Yohanes kasaba' nabahi'ga' si sie' kasaba': " Ta'ya banar i kau makatagu'a'n si Herodias." ⁵ Bo, manen i Herodes masibi'nu mamu'no' si Yohanes, i sie' mata'ku' su toumata da'kelre' yoka si'de nakahe'ken' tou i Yohanes kasaba' mababa'lro'nu Mabu. ⁶ Tou manen ingene, sadanu naitana'mai su lrou kinatoumatanni Herodes, ana' babineini Herodias nanayang (nadansa) su hiba' nsi'de, bo ene' nakapi'a' mpanamen ateini Herodes, ⁷ palretene' i si'e mate'ba' kasaba' mami'hei apamainu maya pangkelre'anni tou babi'nei manguda ene'. ⁸ Senebo agenu pinaksani mamane', i tou mabi'nei manguda ene' nabo'ka', bi'heite si sia' su sie', kasaba' ti'mbonanni Yohanes Mananaha'ni' su ti'mbounu baki". ⁹ Manen ateini dika nadodou, tou i sie' kina'i'ki'tenu te'ba'ne bo lragi ene' pinabahi'ga'ne su hiba'nu toumata-toumata kima'n agene, i sie' kasaba' nami'hei parenta palretene' ene' galre'tebe bi'hei. ¹⁰ I sie' nangi'ngka' mangoto'ho' ti'mbonanni Yohanes su hu'a'ngnu hahe'po'an. ¹¹ Bo, ti'mbonanni Yohanes pinoso' su baki' bo nidi'ngan bini'hei si tou babi'nei manguda ene' bo ene' pinaida'one simamane'. ¹² Pa'lrusu'ne, tuma'-tu'hu' tuma'-tu'hu'ni Yohanes sinai nanga'lra' a'o'ne, bo nilribing nsi'de. Senebo, si'de na'ko nakasaba' si Yesus. Lri'ma Hoti bo Dadua Ki'nasa' Pinakika'n su Lri'ma Hibu Toumata. ¹³ Sadanu i Yesus nakadi'ngihi'mai nu ene', i Sie' nati'mbusu' bua'nu tampa ene' agenu saka'en, na'konu tampa malrana' ta'ya si toumata ba'lrine'. Bo, sadanu toumata-toumata nakadi'ngihi' su kagagioNe, si'de kasaba' natatu'hu' si Sie' agenu lrima'mpang bua'nu Banua-Banua nsi'de. ¹⁴ Sadanu i Yesus naisoba'mai, i Sie' nakabua ko'mpolro'nu toumata nga'sa', bo ateiNe nadodounu gilridi' si si'de, bo i Sie' napapi'a'nu saki' nsi'de. ¹⁵ Sadanu matanulrou sumada'mai, si'de tuma'tu'hu' sinaini Yesus bo naki'na' kasaba': " Tampa iye' malrana' bo matanulrou kahaga'sa'tenu humibi'. I'ngka'te toumata da'kelre' ene' pati'mbusu' ma'konu banua-banua palretene' si'de dongka malru'a'n kaka'nen batangen su banua-banua ene'." ¹⁶ Manen ingene', i Yesus nangulri' si si'de kasaba': "Si'de ta'ya bo'bodo'ne pati'mbusu'. Kumu'nu mapakika'n si si'de." ¹⁷ I'ndo' si'de si Sie' kasaba': " Su sie' kami' galre' pai lri'ma hoti bo ki'nasa' dadua". ¹⁸ Bo, i Sie' nangu'lri' si si'de kasaba': "Di'ngannai ene' si Sia'". ¹⁹ Senebo i Sie' nangi'ngka toumata da'kelre' ene' humo'mpong su duku', bo ni'a'lra'Ne lri'ma hoti bo ki'nasa' dadua ene' agenu timanga'da lrangi, i Sie' nami'hei silri'nu ti'a'denan bo napamasa'-masa'nu hoti ene'. Pa'lrusu'ne ene', i Sie' nami'hei ene' su tuma'-tu'hu' tuma'-tu'hu'Ne, bo pinatati'aha'nu tuma'-tu'hu' tuma'-tu'hu'Ne su toumata da'kelre' ene'. ²⁰ Bo, si'de mayane' kima'n naida'o su nabi'ha' ha (naheme'). Senebo si'de napaha'nsa'nu papoto'an-papoto'an nalrembei, kasaba' mapulro'-duaken su balre'ne naheme'. ²¹ Bo, ti'a'nu si'de kimaka'n o'ngkamai lri'ma hibu toumata mahu'anei, ta'ya naihe'ken si'de babi'nei bo ana'-ana' nsi'de. I Yesus Lrima'mpang su Ti'mbounu A'ke. ²² I Yesus nanahi'oko' nangi'ngka tuma'-tu'hu' tuma'-tu'hu'Ne simu' su saka'en bo napamo'na nsi'de namu'ndalra' nani'mbaka' su tasi' ene', sangkungnu' i Sie' nangi'ngka toumata da'kelre' ene' pati'mbusu'te (pabeite). ²³ Bo, pa'lrusu'nu i Sie' napabeinu toumata da'kelre' ene', i Sie' su pasingkataumai na'bi su ti'mbounu bulrudu' bo nango'mpu naida'o su babolroute. ²⁴ Manen ingene, saka'en sinake'anu tuma'-tu'hu' tuma'-tu'hu'Ne kasaba' simengko' madaute bua'nu salroyon, kahaga'sa'tenu mahikalri'u yoka kinahu'mpagentenu balrada' bo nahinti'mpalrentenu pi'pihi' (wagata'). ²⁵ Bo, naitana'mai su pukulru' pa'nu hibi' ene', i Sie' natatu'hu' si si'de agenu lra'mpang-lra'mpang su ti'mbounu tasi. ²⁶ Sadanu si'de tuma'-tu'hu'Ne nakabua si Sie' lra'mpang-lra'mpangte su ti'mbounu tasi, si'de kinabo'ho'kantenu ta'ku' bo nangu'lri' "Ene' Himukudu' !". Senebo si'de nango'mbalra'-ngo'mbalra' yoka mata'ku'te. ²⁷ Tou manen ingene, i Yesus pada'lrese' nabo'ka' si si'de kasaba': "Totogai atei ngkumu' ! Iye' Iya', adi'e'i tuma'ku'-ta'ku'." ²⁸ Bo, i Petrus nabo'ka' si Sie' kasaba': "Mabu, adabo ene' tanga'-tangada' i Kau, i'ngka'nai iya' ma'koni Kau su ti'mbounu tasi". ²⁹ I Yesus nangi'ndo' kasaba': "Botete !". Senebo i Petrus timu'mpa bua'nu saka'en bo lrimao' su ti'mbounu tasi, na'koni Yesus. ³⁰ Manen ingene, sadanu i sie' nakabua balrada', i sie' tima'ku' bo kahaga'sa'tenu tumagong. I sie' nango'mbalra': "Oh Mabu, tulrungainai iya' !". ³¹ I Yesus padalrese' nango'ngkoho' lri'maNe, namelre'n si Petrus, bo naba'hi'ga' kasaba': "I kaunu ta'yamai namarca'ya tangada', nakudabo i kau kima'ta' ?" ³² Sadanu si'dedua simakei su sakaen, pi'pihi' kasaba' na'ngkede'. ³³ Senebo, si'de (mayane') su hu'a'ngnu saka'en nasu'ba si Yesus bo nabahi'ga' kasaba': "Tanga'-Tangada', i Kau kasaba' Ana'nu Mabuduata !". I Yesus Napapi'a'nu Toumata-Toumata Masaki'. ³⁴ Pa'lrusu'nu nani'mbaka', si'de naida'ote su tana'nu Genesaret. ³⁵ Sadanu toumata-toumata su tampa ene' nakakilra'lra'mai si Sie, si'de napalrilring bahi'ga' su maya distriknu tampa ene' bo nani'gan maya toumata masaki' si Yesus. ³⁶ Si'de nakitato'n si Yesus palretene' mu'a'lri' manu'lri' po'ndolro'nu kaya malrambingNe, bo maya toumata kasaba' nanu'lri' lra'kuNe nu'a'lri' napi'a'.