I Yesus kasaba' Mabunu Lrou Sabat 1 Du'ngkulru'nu ene', i Yesus lra'mpang-lra'mpang lrimi'mpa su atahennu sangkoi pinasuanen gandum naitana' su lrounu Sabat, bo tuma'-tu'hu' tuma'-tu'hu'Ne kasaba' mahu'tungte, bo si'de nana'humpu'ntenu nani'po' pangkoi-pangkoinu gandum, bo kina'n nsi'de. 2 Tou manen ingene, sadanu toumata-toumatanu Farisi nakabuanu ene', si'de nabahiga' si Sie' kasaba': "Selrei, tuma'-tu'hu' tuma'-tu'hu'Nu nangalri'mu'te apanu ta'ya pinabanar (ta'ya mu'a'lri' kalrimu'a'n) su lrou Sabat." 3 Manen ingene', i Yesus nangu'lri' si si'de kasaba': "Apabo kumu' ta'yaken namaca' apanu kinalri'mu'ni Daud sadanu i sie' bo si'de a'i'ngka'ne kinabo'hoka'ntenu hu'tung, 4 kasaba' i sie' simu' su hu'a'ngnu Sinagoganu Mabuduata bo kima'n hotinu tu'mbalra' kasaba' ta'ya bo'bodo'ne kalri'mu'a'n mapakika'n si Sie', ingene lragi agenu si'de a'i'ngka'ne, apabo ene' galre' bo'bodo'ne kalri'mu'a'nnu si'de mangangi'moho' ? 5 Manga'se', apabo kumu' ta'yaken namaca' su hu'a'ngnu Sanihi'nu Tourat, tou su lrou Sabat, si'de mangangi'moho'nu Sinagoganu Mabuduata kasaba' nano'ngkaha' su lrou Sabat bo si'de ta'yamai sisa'lra'ne ? 6 Tou manen ingene, Iya' mapabo'ka' si kumu' tou mangka'lra'mo' lrume'mbo su kalra'mo'a'nnu Sinagoganu Mabuduata kasaba' pai susie'. 7 Manen ingene, adabo kumu' mati'ho'tenu ti'a'sa'ne iye' kasaba': "Iya' makako'a'nu manggilridi' bo iye' ta'yamai naihe'ken su babi'heiKu", kumu' dongka ta'yamai mapahe'po'nu toumata kasaba' ta'ya si sa'lra'ne. 8 Yoka, Ana'nu Toumata kasaba' i Mabu lrounu Sabat". I Yesus Napapi'a'nu Panyaki su Lrou Sabat. 9 Pa'lrusu'nu nati'mbusu' bua'nu tampa ene', i Yesus naida'o' su sinagoga nsi'de. 10 Selrei, pai toumata mahu'a'nei kasaba' lri'ma ku'a'nenne lrima'lraite. Bo, si'de naki'na' si Yesus agenu bahi'ga' kasaba': "Apabo ta'ya si sa'lra'ne mapapi'a'nu panyaki' su lrou Sabat ?" palretene' si'de masi'bi'nu mapansa'lra' si Yesus. 11 Bo, i Sie' nabo'ka' si si'de kasaba': " I sainu toumata su salra' ngkumu' makatagu'a'n domba insau, bo sadanu domba ene' nana'bo su hu'a'ngnu po'mpong naitana' su lrou Sabat, apabo i sie' ta'ya madadao bo mapalro'a'ngne ? 12 Apabo ti'a'sa'nu toumata ta'ya lrume'mbo su ti'a'sa'nu domba ene ? Yoka ingenebo, ta'yamai si sa'lra'ne sadanu mangalri'mu' apanu mapi'a' naitana' su lrou Sabat." 14 Pa'lrusu'ne ene', i Yesus nabo'ka' su toumata ene' kasaba': "O'ngkohai nai lri'manu". Toumata ene' nango'ngkoho' lri'mane bo pinapi'a' tangada' o'ngkamai lri'manu toumata tu'tu' ba'lrine'. 13 Tou manen ingene, toumata-toumatanu Farisi nati'mbusu' bua'nu tampa ene' bo si'de nasui'nsautenu mano'ngkaha' si Sie', su kagagionu nanga'ntigi'tenu mamu'no' si Sie'. 15 Manen ingene, i Yesus, sadanu nati'ho'tenu apamainu iye', i Sie' nati'mbusu' bua'nu tampa ene'. Nga'sa' toumata timu'hu'-tu'hu' ageNe bo i Sie' napapi'a'nu maya saki' nsi'de, 16 bo napata'hundu'ng si si'de palretene' kina'supu'a'nNe ta'ya kati'ho'annu toumata ba'lrine' su sene. 17 Yoka apanu nu'a'lri' su sene' kasaba' mapahe'me'nu apamainu pinaba'lro'teni Bababa'lro' Yesaya su po'nane' kasaba': 18 "Selreite, i Tou a'i'ngkaKu pini'lre'Ku, kagilridi'Ku, kasaba' si Sie'nu bihu'aKu makakoa. Iya' dongka mamo'so' maindotoKu si Sie', bo i Sie' dongka makitato'nnu katulridanne su bangsa-bangsa ba'lrine'. 19 I Sie' ta'ya namapaha', manga'se' nango'mbalra', bo ta'ya si insaunumai nakadi'ngihi' pu'lrungNe su dalren-dalren. 20 Telring naba'de dongka ta'yaNe pata'dusu' (papo'to'), bo dadeke'an kodioken napada' dongka ta'ya pada'e'nNe, maida'o su i Sie' mapa'u'ntungnu katulridanne, 21 bo su hu'a'ngnu adenNe bangsa-bangsa ba'lrine' dongka mango'lrang". Bukni Yesaya 42: 1 - 4. Kaha'mata'ni Yesus Nabo'lroso' bua'nu Maindotonu Mabuduata. 22 Pa'lrusu'ne ene' pai toumata singkatau kasaba' ni'aduku'nu hanga'-hanga'n ndalrai, bo nu'a'lri'te buta bo gugu', kasaba' nidi'ngan si Yesus. Bo, i Yesus napapi'a'ne mante toumata buta bo gugu' ene kasaba' nakabuate bo nakabahi'ga'te. 23 Maya toumata su sene' nakakilringan bo naki'na': "Apabo mi'naha' i Sie' iye' kasaba' Ana'ni Daud ?" 24 Manen ingene, sadanu toumata-toumatanu Farisi nakadi'ngihi' si Sie' , si'de nabo'ka' kasaba': "Toumata iye' ta'yamai mi'naha'nu mamu'hou (mangu'sehe') su hanga'-hanga'nnu dalrai ageni Beelzebul kasaba' i tou makati'mbonannu maya hanga'-hanga'nnu dalrai." 25 I Yesus nakabi'ti' su apanu pini'kihi' nsi'de bo nabahi'ga' si si'de kasaba': " Hunti'a'nu komalrigi kasaba' natahe'-ta'hede' bo mahinti'mpalre'n agenu a'o' mbatangen, kasaba' dongka tandenan. Bo, hunti'a'nu Banua manga'se' balrei kasaba' napasa'-pasa' (natahe'-tahede') bo hinti'mpalren agenu a'o' mbatangen, kasaba' ta'yamai makasukun (makata'hang). 26 Bo, adabo i bihisi' mamuhou (mangu'sehe') si bihisi', i sie' dongka mapasa'-pasa' (matahe'-ta'hede') hinti'mpalren agenu a'o' mbatangen. Adabo ingene, kakudanu komalrigi'ne kasaba' makata'hang ? 27 Bo, adabo Iya' nangu'sehe' hanga'-hanga'nnu dalrai agenu Beelzebul, yo ageni sainu ana'-ana' ngkumu' kasaba' nangu'sehe' si side ? Yoka ingenebo, si'denu dongka mu'a'lri' goguta (mananu'tu') ngkumu'. 28 Manen ingene, adabo agenu Maindotonu Mabuduata, Iya' mangu'sehe' maya hanga'-hanga'nnu dalrai, ti'a'sa'ne ene Komalrigi'nu Mabuduata kasaba' sinaote si kumu'. 29 Manga'se', kakudanu toumata kasaba' makasu' su hu'a'ngnu balreinu toumata ma'uha' bo maha'mpasa' apamai-apamainu pai su sene' adabo i sie' ta'ya maha'pusu' po'na si tou toumata ma'uha' ene' ? Senebo, i sie' dongka makaha'mpasa' ho'ho'nu balrei ene'. 30 I sainu ta'ya mahaha'ge'nu ageKu, kasaba' mani'mpalra' si Sia'. Bo, i sainumai ta'ya mapaha'hi'mung su kadi'nganenKu kasaba' dongka mapata'hede'-ta'hede'. 31 Yoka ingenebo, Iya' mapabo'ka' si kumu' kasaba' hunti'a'nu dosa bo do'lra'nu toumata dongka pa'a'mpung, tou do'lra' (hahi'nu') su Maindoto kasaba' ta'yamai si a'mpungne. 32 Bo, i sainu mapasaba'nu apamai mani'mpalra' su Ana'nu Toumata dongka ka'a'mpungan, tou i sainumai mabahi'ga' mani'mpalra' su MaindotoNe kasaba' ta'yamai ka'a'mpungan, apabo ene' naitana' su galre'-galre' i manga'se' naitana'ken su dongka kasaduanen." Mpukayu Kakilra'lra' bua'nu Bu'ane. 33 " Adabo mpa'kayu ene' mapi'a', bu'ane lragi dongka mapi'a'. Manga'se', adabo mpu'kayu ene' ta'ya mapi'a', bu'ane lragi dongka ta'ya mapi'a'. Yoka, mpu'kayu kakilra'lra' bua'nu bu'ane. 34 Ona', kumu' bo'lroso'nu u'lre' kulre'hi', apabo mi'naha' kumu'nu nakabelren dadalrai mapabo'ka'nu apamai-apamainu mapi'a' ? Yoka bua'nu apanu lrimo'a'ng bua'nu atei ngkumu', ene'nu pabo'ka'nu mo'hong ngkumu'. 35 Toumata mapi'a' mapalro'a'ngnu apamai-apamainu mapi'a' kasaba' lrumo'a'ng bua'nu ho'ko'nu mapi'a', bo toumata dalrai kasaba' mapalro'a'ng apamai-apamainu dalrai bua'nu ho'ko'nu atei dalrai. 36 Manen ingene, Iya' mapabo'ka' si kumu' tou hunti'a'nu bo'ka' ta'ya si katana'nne, pinakasaba'nu toumata, ene' dongka lrikasen su kagagionu bo'he' a'i'tu'an naitana'mai su lrounu pagagogutan. 37 Yoka bua'nu bahi'ga' ngkumu', kumu' dongka pambanaran, bo lragi bua'nu bahi'ga' ngkumu', kumu' dongka he'po'an. Toumatanu Farisi bo Papandeinu Torat Kasaba' Mangkelrei Bo'basa'. 38 Pa'lrusu'ne ene', manenpida papandeinu Torat bo toumata Farisi nabahi'ga' si Yesus kasaba': "Me'tehe', kami' masibi'nu sumelrei bo'basa' kasaba' bua'Nu". 39 Manen ingene, i Yesus nangi'ndo' bo nabahi'ga' si si'de, kasaba': "Taha'na'-buhu' kasaba' dalrai bo nahilri'o'ng iye' mangkelrei simbo'basa'. Bo ta'yamai simbo'basa'nenu dongka bi'heiKu si si'de, tou diming bo'basa'ni Mababa'lro' i Yunus. 40 Yoka, o'ngkamai i Yunus kasaba' nakabanuaken su hu'a'ngnu ti'a'nnu ki'nasa' bagai (Paus) sangkungnu tulru' lrou bo tulru' hibi', ingene lragi Ana'nu Toumata kasaba' dongka makabanua sangkungnu tulru' lrou bo tulru' hibi' su hu'a'ng ti'a'nnu tana'. 41 Toumata-toumatanu Ninewe dongka tume'ngede' mahahage' agenu tahana' bu'hu' iye' naitana'mai su lrou pagagogutan bo dongka mapahe'po' nsi'de yoka si'de kasaba' ta'yamai nahimbalrui sadanu nakadi'ngihi'te babo'ka'ni Yunus. Bo, selrei, i Tou Mangkalra'mo' lru'membo' si Yunus kasaba' pai su sie'. 42 I Boki bua'nu Sandangen dongka pabi'a'ha' bo pasupu' (paha'hi'mung) agenu ko'mpolro' bu'hu'nu taha'na' iye' su lrounu pagagogutan bo dongka he'po'a'n yoka su po'nane' i sie' kasaba' sinai bua'nu po'ndolro'nu tana' bo lrangi nadadi'ngihi' timumunni Salomo. Bo, selrei, i Tou Mangkalra'mo' bua'ni Salomo kasaba' pai su sie'. Bodito'nu Balrei Ta'ya Pinatulrauan. 43 "Sadanu hanga'-hanga'n dalrai lrimo'a'ng bua'nu toumata daalrai ene', i sie' lrimi'mpa su tampa-tampa ta'ya kaa'ken yoka masibi'nu tumanga'ng, tou ta'ya nakahu'mpa. 44 Senebo, i sie' nangu'lri' kasaba': "Iya' dongka mabei kasau su balreiku, su tampa pinalro'a'ngenku." Bo, sadanu o'lrasa'nete, i sie' nakadapata' balrei ene' ta'ya si ho'ho'ne (pampang), agenu sinaha'te bo tini'mono'te. 45 Senebo, hanga'-hanga'n dalrai ene' na'ko nande'a bo nani'ngan pi'tu' hanga'-hanga'n ba'lrine' kasaba' mangka'dalrai bua'ni tou nakadi'ngan, bo si'de simu' nadi'nga'-di'ngan bo nabanua su sene'. Su pa'lrusu'ne, kagagioni tou niaduku'nu ene' kasaba' nu'alri' ingkadalrai bua'nu po'nane'. Ingene lragi kagagionu dongka mu'a'lri' su taha'na' kasaba' dalrai iye'." Taha'na'ni Yesus Tu'tu'ne. 46 Sangkungnu i Yesus kahaga'sa'kennu bahi'-bahi'ga' agenu toumata da'kelre', selrei, pai tu'a'diNe bo i mamaNe kahaga'sa'nu tenge'-tengede' su lro'a'ngne, yoka makako'a'nu mabo'ka' ageNe. 47 Toumata singkatau nangu'lri' si Sie' kasaba': "Selrei, i mama bo tu'a'di-tu'a'diNu tange'-tengede' su lro'a'ngne, yoka masibi'nu mabahi'ga' ageNu". 48 Manen ingene, i Yesus nangi'ndo' su toumata nakasaba' si Sie' ene' kasaba': "I sainu i mamaKu bo i sainu kinaka'-tu'a'diKu ?" 49 Bo, i Sie' naha'na' (nanonde) lrimaNe su tuma'-tu'hu' tuma'-tu'hu'Ne, i Yesus nabo'ka' kasaba': " Iye'tenu i mamaKu bo kinaka'-tu'a'diKu ! 50 Yoka i sainu mangalri'mu' sibi'ni YamaKu su dompakon, i sie'nu tu'hangKu mahu'a'nei bo tu'hangKu babi'nei, bo i sie'nu i mamaKu".