¹ Sadanu i Yesus nami'hei parenta su mapulro'-dua tuma'-tu'hu'Ne, i Sie' na'ko napatu'ntu' bo nabo'ka' su Banua-Banua nsi'de. I Yesus bo i Yohanes Mananaha'ni' ² Su galre'-galre' i, sadanu i Yohanes, kasaba' su hu'a'ngkennu hahe'po'a'n, nakadi'ngihi'tenu kinakalri'mu'-kinakalri'mu'ni Kristus, i sie' napanga'lri'nu lrilring su tuma'-tu'hu' tuma'-tuhu'ne, ³ bo nakina' si Sie' kasaba': Apabo i Kaunu dongka nao ene, manga'se' apabo kami' mahalra'ken si tou ba'lrine' ?." ⁴ I Yesus nangi'ndo' bo nabahi'ga' si si'de, kasaba': "A'kote bo paida'o'te si Yohanes (Mananaha'ni') apanu kinadi'ngihi'te bo kinabuate ngkumu' kasaba': ⁵ toumata buta simelrei, toumata pe'lrong lrima'mpangte, toumata kusta napi'a'te, toumata be'ngelre' nakadi'ngihi'te, toumata natei nabi'a'ha'te, bo toumata taulrebo' kinabi'ha'ntenu Injil. ⁶ Bo, kinaka'mpete'mai toumata kasaba' ta'ya kinatada'nKu." ⁷ Bo, pa'lrusu'nu si'de nati'mbusu'temai, i Yesus nana'humpu'ntenu nabahi'ga' su ngasa' toumata kagagioni Yohanes kasaba': "Apanu kasibi' kabua ngkumu' su atahe'nnu lrabanen ? Mpu'kayu insau kahaga'sa' ko'koha'nnu pi'pihi' ? ⁸ Kumu' na'ko yoka masibi'nu sumelrei apa ? Apabo kumu' masibi'nu sumelrei toumata nagilraku'nu lra'ku' malrono' ? Yoka si'de nagagilra'ku'nu lraku' malrono' galre' pai su komalrigi'-komalrigi'nu di'ka. ⁹ Kumu' na'ko yoka apanu kasibi'nu selre'an kumu ? Sibi'nu sumelrei si tou mababa'lro' insau ? Tangada', Iya' mabahi'ga' si kumu' kasaba' kalra'mo'ne lrume'mbo su kalra'mo'nu mababa'lro' singkatau. ¹⁰ Yoka, i sie'nu toumata kasaba' kagagione pinamo'he' su po'naken kasaba': "Selreite ! Iya' napanga'lri'tenu a'i'ngka'Ku su po'naNuken. I sie'nu dongka mapata'kede'nu dalren si Kau su hiba'anNu". Bukni Maleakhi 3: 1. ¹¹ Iya' mapabo'ka'nu tutu'ne si kumu', kasaba': su salra'nu si'de toumata naba'ntehe' bua'nu kalrubaennu babi'nei, ta'ya si insaunemainu lrume'mbo su kalra'mo'ni Yohanes Mananaha'ni'. Tou manen ingene, i sainu ingkakokonio su hu'a'ngnu Komalrigi'nu Dompakon, kasaba' mangka'bagai' su kabagaine. ¹² Putunu taonni Yohanes Mananaha'ni' naidao su galre'-galre' i kasaba' Komalrgi'nu Dompakon nahudodoitenu dadalrai, bo toumata-toumata matingkai (dalrai) ene' kasaba' napakalri'mu'te agenu a'i'ntoi. ¹³ Yoka, mayanu mababa'lro' bo Sa'nihi'nu Torat kasaba' napaba'lro'te naida'o' su lrou kinatoumatanni Yohanes Mananaha'ni'. ¹⁴ Bo, adabo kumu' makakoa manirima si sie', i sie'nu i Elia su kasaduanen ene. ¹⁵ I sainu pai ti'ngkahi'a' kasaba' mandi'ngihi', i sie' galre'tebe madadi'ngihi' ! ¹⁶ Manen ingene, agenu apamainu dongkaKu pahi'a'a'pisi' kagagionu kinatoumata'nnu taha'na' iye' ? Si'de ene' o'ngkamai ana'-ana' kokonio kasaba' ho'mpong-ho'mpong su tampa-tampa da'kelre', kasaba' nanga'ha' sinage' nsi'de, ¹⁷ bo nabahi'ga': "Kami' napaso'ngo'tenu sasongo'n si kumu', tou kumu' ta'ya nadansa. Kami napaka'ntartenu lri'mbu dalrai, tou kumu' ta'ya lrimo'lro' kute." ¹⁸ Yoka i Yohanes sinai kasaba' ta'yamai kima'n, bo ta'yamai nangi'nung, bo ulri' nsi'de kasaba': "i sie' niho'ho'ntenu hanga'-hanga'n dalrai". ¹⁹ Tou manen ingene, sadanu Ana'nu Toumata sinai senebo kima'n bo nangi'nung, ulri' nsi'de kasaba': "Selreite, i tou magaga'nsoko' bo tebelron, sinage' si'de manganga'lra' bilyet bo toumata-toumata bardosa." Yoka manen ingene, timumun kasaba' pinabanar (pinatulridi') agenu kalri'mu'ne." Te'poho' su Toumata Kasaba' Ta'ya Masibi'nu Mangiman. ²⁰ Pa'lrusu'ne i Yesus nana'humpu'ntenu nahaha'ng si'de Banua-Banua kasaba' tampa pinangalri'mu'anNe nga'sa' kaha'mata' yoka si'de ta'yamai nahimbalrui. ²¹ " Nabodi'to'te i kau Khorazim, Nabodi'to'te i kau Betsaida ! Yoka, adabo kaha'mata'-kaha'mata' kasaba' nu'a'lri'te su salra' ngkumu', ingene lragi nahampei su Tirus bo su Sidon, si'de kasaba' nano'te nasalra'mata' agenu nagilra'ku'tenu lri'mbu dalrai bo abu. ²² Tou manen ingene, Iya' mapa'i'da'o si kumu' tou naitana'mai su lrounu pagagogutan, i Tirus bo i Sidon kasaba' dongka makapo'ha' tou diming kumu' (Khorazim bo Betsaida). ²³ Bo, kumu', Kapernaum, apabo kumu' pina'a'bi naida'o su lrangi ? Tangada' ta'ya, yoka kumu' dongka pai'ntuhu' su hu'angnu dunia toumata natei, yoka adabo kaha'mata'-kaha'mata' kasaba' nu'a'lri'te su salra' ngkumu' ene' nu'a'lri' lragi su Sodom, kasaba Banua ene' ta'yamai malri'sa' putunu lrou iye'. ²⁴ Tou manen ingene, Iya' mapabo'ka' si kumu' kasaba' su lroumainu pagagogutan, tana'nu Sodom kasaba' dongka makapo'ha' lrume'mbo si kumu'." Kalru'a'se'n su Toumata Kasaba' Sinaini Yesus. ²⁵ Du'ngkulru'nu ene' i Yesus nabahi'ga' kasaba': "Iya' natinanum si Kau, Yama, kasaba' Mabunu lrangi bo tana', tou i Kau mapabu'ni'nu mayane' iye' bua'nu toumata-toumata tumatimumun bo papandei, bo dongka mapalri'kasa'ne su ana'-ana' kokonio". ²⁶ Ode, Yama, yoka o'ngkamai ene'tenu kasibi'nu hiba'Nu. ²⁷ Yoka mayane' kasaba' bini'hei'teni YamaKu si Sia'. Bo, ta'ya si insaumainu toumata kasaba' makakilra'lra' su Ana', tou diming i Yama; bo lragi ta'ya si insaumainu toumata kasaba' makakilra'lra' si Yama tou diming i Ana' bo hunti'a'nu toumata kinakako'a'teni Tou Ana' kasaba' dongka palri'kasa'Ne. ²⁸ Botebo nai si Sia', maya si'de kasaba' nangeneite bo lrimuntoite yobo nangi'dopo'tenu mabaha', bo Iya' dongka mami'hei kapapi'a'nu pandamen. ²⁹ Pamasa'ntenu baba'ha' (kuk) kasaba' pinoso'Ku, bo patu'ntu'te si Sia' yoka Iya' kasaba' atei malromei bo atei kahi'nda, bo kumu' dongka makade'a' lri'ndigi' su hu'a'ngnu himu'kudu' ngkumu'. ³⁰ Yoka, papasa'nen (gongga) pinoso'Ku ene' kasaba' malru'a'sa' bo babaha'Ku ene' kasaba' maha'n."