I Yesus nangi'ngka Tuma'-Tu'hu' Tuma'-Tu'hu'Ne 1 Bo, i Yesus namokei mapulro-dua ngkatau tuma'-tu'hu'Ne bo nami'hei si si'de kaha'mata' humongo' bo mangu'sehe' hanga'-hanga'nnu kulre'hi' ene' bo lragi mapapi'a' maya apanu panyaki' manga'se' maya apanu makapidisi' (makasa'ki'). 2 Iye'tenu adennu mapulro'-dua ngkatatu mababo'ka' ene: i Simon kasaba' i Petrus, bo i Andres tu'hangne, i Yakobus ana'ni Zabedeus, bo i Yohanes tu'hangne, 3 I Filipus bo i Bartolomeus, i Tomas, i Matius manganga'lra' bilyet, i Yakobus ana'ni Alfeus, bo i Tadeus, 4 I Simon toumatanu Zelot, bo i Yudas Iskariot kasaba' nasalri'ba si Yesus. 5 I Yesus nangi'ngka' si'de mapu'-dua mababo'ka' ene' bo namerenta si si'de kasaba': "Adi'e'i ma'konu dalrennu Bangsa-Bangsa ba'lrine' manga'se' sumu' su hu'a'ngnu Banuanu Samaria, 6 Tou a'kotenu si'de domba-domba kasaba' natalro'ndei (lrime'ngko'te) su salra' tahana'nu Israel. 7 Bo, sangkungnu kumu' kahaga'sa'tenu lra'mpang-lra'mpang, pabo'ka'te agenu bahi'ga' kasaba': "Komalrigi'nu Dompakon Malrapa'te". 8 Papi'a'tenu masa'ki', pabi'a'ha'tenu toumata natei, pabalruitenu kusta, bo u'sehe' maya hanga'-hanga'nnu dalrai. Yoka kumu' kasaba' nanirimate agenu ta'ya si tata'nda'nne, ingene lragi ene' galre'te paida'o agenu ta'ya si tata'nda'nne. 9 Adi'e'i kumu' mani'ngan: bulraon, manga'se' bi'do, manga'se' kupang su hu'a'ngnu poroco (popoji) kumu', 10 manga'se' tas sangkungnu kumu' lruma'mpang-lra'mpang su dalren, manga'se' mapaba'lrun mapulro'-duanu pagilraku', manga'se' manu'he'nu sandal manga'se' mani'ngan tikin yoka adabo kumu' kasaba' mamambelre' natanga'da' kumu' bo'bodo'ne makade'a' kaka'nen ngkumu'. 11 Bo, su Banua manga'se' su Desa su apamai kasu'a'n ngkumu', panalri'sigi' i sainu bo'bodo'ne patulra'u'an ngkumu' su sene' maidao su kumu' mati'mbusu'. 12 Sadanu kumu' sumu' su balrei ene', kasaba': pami'hei tabe'apa' (silri'). 13 Bo, adabo balrei ene' bo'bodo'ne patulra'u'an, mante dame nabaya' tumu'mpa su sene', tou adabo ta'ya bo'bodo'ne, dame nabaya' ngkumu' ene' kasaba' mabalri' si kumu'. 14 Bo, i sainu kasaba' ta'ya nanirima si kumu' manga'se' ta'yamai madadi'ngihi' su bahi'ga' ngkumu', kasaba' pati'mpasa' maya abu su ti'lro' ngkumu' sadanu kumu' lrumo'a'ngmai bua'nu balrei manga'se' bua'nu Banua ene'. 15 Iya' mapabo'ka'nu kagagione si kumu' kasaba' dongka naitana'mai su lrou pagagu'ta'n, kadalrainu hahe'po'a'nnu Tana' Sodom bo Gomora kasaba' ta'yamai lrume'mbo' (mapa'da-pa'da) bua'nu hahe'po'a'n maitana' su Banua ene'." 16 " Selreite, Iya' nani'ngka' si kumu' o'ngkamai domba su tolro'a'danu serigala. Ingenebo ene', kumu' galre'te matihumpandei o'ngkamai i u'lre' bo sumulrung o'ngkamai tumatalra'-tumatalra' i Marpati. 17 Tou manen ingene', pane'gangte su toumata-toumata yoka si'de dongka mapaida'o (mapanga'do) ngkumu' su Sanhedrin bo kumu' dongka pa'hesa'n su sinagoga-sinagoga nsi'de. 18 Bo, kumu' dongka di'ngan su hibanu si'de manganga'tasa' bo si'de dika kasaba' su sa'i'nu adenKu, yoka ene' dongka makasa'hidi' si si'de bo makasa'hidi' su bangsa-bangsa ba'lrine'. 19 Manen ingene, sadanu si'de napanga'dote ngkumu', adi'e'i tuma'ku'-ta'ku' su apanu pangi'ndo' manga'se' su kagagionu apanu pabo'ka' kumu' yoka singkahingku' bini'heite si kumu' kasaba' apanu dongka pabahi'ga' ngkumu'. 20 Yoka, ta'yamai kumu'nu mabahi'ga', tou ene' dongka pabahi'ga'nu Maindoto'ni Yama ngkumu' kasaba' mapabahi'ga' su a'o' ngkumu' 21 Sinage' dongka' mapao'ngkoho'nu tu'hangne su papatei, bo ingene lragi i papa dongka mapao'ngkoho'nu ana'ne. Bo ana'-ana' dongka maronta su gagudang nsi'de bo mamu'no' si si'de. 22 Kumu' dongka nidadi'ntingnu mayane' yoka su sa'i'nu adenKu, tou i sainu toumata kasaba' nakahalra' naida'o' su pa'lrusu'ne kasaba' dongka pasalra'mata'. 23 Sadanu si'de nalru'baga' nadadi'ha' si kumu' su hu'a'ngnu Banua insau, intabo maha'hahi' ma'konu Banua ba'lrine'. Iya' mapaida'o'nu tutu'ne si kumu' kasaba' kumu' ta'ya dongka lrumi'mpa su Banua-Banuanu Israel maida'o' su ka'a'ko'n naonu Ana'nu Toumata su kasadauanen. 24 Tuma'-tu'ntu' ta'ya lrume'mbo su me'tehe'ne, ingene lragi i tou a'i'ngka' ta'ya lrume'mbo' su makatagu'a'nne. 25 Kasaba' magana'ngtemai adabo i tou tuma'-tu'ntu' kasaba' mu'a'lri' o'ngkamai i tou me'tehe'ne, bo i tou a'i'ngka dongka mu'a'lri' o'ngkamai i tou makatagu'a'nne. Adabo si'de manaba' si tou makatagu'a'n balrei ene' kasaba' i Beelzebul, yo mangkadalra'ikenmai naitana' si tou ho'ho'nu taha'na'ne." Tuma'ku'te su Mabuduata tou Adi'e'i Tuma'ku'-Ta'ku' su Toumata. 26 " Yoka ingenebo, adi'e'i kumu' tumaku'-ta'ku' si si'de yoka ta'ya siapamainu natulrubu' kasaba' ta'ya lri'kase'n, manga'se' ta'ya si apamainu nabu'ni' kasaba' ta'ya kati'ho'a'n. 27 Apanu pinabahi'ga'Kute si kumu' su hu'a'ngnu malri', ene' dongka pabahi'ga'Ku su hu'a'ngnu sa'hansa'ng. Bo, apanu kinadi'ngihi'te ngkumu' su kagagionu pinamu'dung su ti'ngkahi'a' ngkumu', ene dongka palrilring (pakasaba') su ti'mbounu kokabonnu balrei ngkumu'. 28 Adi'e'i tuma'ku'-ta'ku' su si'de kasaba' namu'no' a'o' mbatangen, tou ta'ya makabu'no' himu'kudu', yoka galre' tuma'ku-ta'ku' si Tou Singkatau kasaba' makabu'no' himu'kudu' manga'se' a'o' mbatangen su neraka. 29 Apabo dadua kimakaho'a' i Pipit kasaba' pinaba'ru' agenu lruanne insau ? Bo, ta'ya siinsaumai bua' nsi'de kasaba' mana'bo su tana' bo ta'yamai kinatato'nni Yama ngkumu'. 30 Manga'se', mayanu u'ta' su ti'mbonan kumu' ta'ya kahe'kenNe. 31 Ingenebo adi'e'i tuma'ku'-ta'ku' yoka lruan ngkumu' lrume'mbo su lruannu maya kangasa'nu kumakahoa i Pipit." Mapasaba' Adenni Yesus su Hiba'nu Toumata Ba'lrine'. 32 "Yo, hunti'a'nu toumata mapasaba'nu adenKu su hiba'nu toumata, dongka lragi pakasaba'Ku su hiba'ni YamaKu su dompakon. 33 Tou manen ingene, i sainu nano'ngkaha' (nahaha'ng) si Sia' su hiba'nu toumata, i sie' lragi dongkaKu to'ngkahe'n su hiba'ni YamaKu su dompakon." Sa'i'nu Kaa'ko'n nao ni Yesus. 34 " Adi'e'i mamiki'-mi'kihi' adabo Iya' dongka nao kasaua mani'ngan padame'a'n su tana' bo lrangi. Yoka Iya' dongka nao kasau ta'ya mani'ngan padame'a'n, tou kasaba' mani'ngan tangkung". 35 Yoka, Iya' nao kasaba' dongka mapaha'e'nu ana' mahu'a'nei bua'ni papane bo mapaha'e'nu ana' babi'nei bua'ni mamane, bo mapahe'a'nu ana' babi'nei su kabing bua'ni itoune , 36 bo i tou seke' singkatau kasaba' nabo'lroso' bua'nu taha'na' mbatangen. 37 I sainu lrume'mbo su manggilridi'ni papa manga'se'ni mamane' bua'nu gumilridi'Ku, kasaba' ta'ya bo'bodo'ne i sie' si Sia'. Bo, i sainu kasaba' gumilridi'nu ana' mahu'a'nei manga'se' ana' babi'nei kasaba' lrume'mbo bua'nu gumilridi' si Sia' kasaba' i sie' ta'ya bo'bodo'ne si Sia'. 38 Bo, i sainu ta'ya mama'sa'n salibne bo tumu'hu' si Sia', i sie' kasaba' ta'ya bo'bodo'ne si Sia'. 39 I sainu mapatoto'lro'nu (ta'ya mamulre') bi'hu'a'ne kasaba' i sie' dongka kalro'mbo'nnu (kata'yan) bi'hu'a'ne, bo i sainu kalro'mbo'nnu bi'hu'a'ne yoka su sa'i'nu adenKu, kasaba' ene' dongka kade'a'ne kasau." Tata'nda'n Bua'nu Mabuduata. 40 " I sainu nanirimate si kumu', kasaba' nanirimate si Sia'. Bo, i sainu nanirimate si Sia', kasaba' i sie' nanirimate lragi si Sie'nu nangi'ngka' si Sia'. 41 I sainu nanirimate su si'de mababa'lro' naihe'ken su adennu mababa'lro' ene' kasaba' dongka makade'a' tata'nda'nnu mababa'lro'. Bo, i sainu nanirimate toumata banar su he'kennu adennu toumata banar ene' kasaba' dongka manirima tata'nda'nu toumata banar. 42 Bo, i sainu nami'hei inuman su singkatau bua' salra'nu toumata-toumata kokonio iye' manen galre' simoknu ake' madalrinding su he'ken kagagionu tuma'-tu'hu' singkatau, Iya' mapabo'ka'nu tutu'ne si kumu' kasaba' i sie' (kumu') dongka makade'a' tata'nda'nne."