I Yesus Napa'a'mpung bo Napapi'a'nu Toumata Lralrai ¹ Sadanu simu' su sakaken, i Yesus nani'mbaka' Lrinou bo naso'ba' su Banua Mbatanngen. ² Bo, nakabua si'de nani'ngan toumata lralrai singkatau si Sie' kahaga'sa'kennu lroka-lroka binolreng agenu rosbang patati'ki'anne. Sadanu nakabua parca'ya nsi'de, i Yesus nabahi'ga' si tou lralrai ene' kasaba', "Pakatotogo ateinu, ana'Ku, dosanu nipa'a'mpungKute." ³ Pa'lrusu'nu ene', manenpi'da papandeinu Torat nabahi'ga' su hu'a'ngnu atei nsi'de, kasaba': "Toumata iye' nababo'boho' !" ⁴ Manen ingene, i Yesus mati'ho'nu imun nsi'de, bo i Sie' nabo'ka' kasaba': "Nakudabo kumu' napami'kihi'nu dalrai su hu'a'ngnu atei ngkumu ? ⁵ Untenu malru'a'sa kasaba': "Dosa-dosanu pina'a'mpungKute", manga'se' kasaba': "Bangonte bo lra'mpangte ?" ⁶ Yoka manen ingene, palretene' kumu' mati'ho' tou su tana' bo lrangi iye' kasaba' Ana'nu Toumata pai kaha'mata'Ne mapa'a'mpungnu dosa". Pa'lrusu'nu ene', i Yesus nabahi'ga' si tou lralrai ene' kasaba': "Bangonte, ki'a'ngte lralroka'nnu bo pabeite !". ⁷ Singkakoa, i sie' nabangon bo nabei. ⁸ Manen ingene, sadanu toumata nga'sa' nakabuamai su apanu nu'a'lri', si'de galre' nakakilringan bo natinanum su Mabuduata kasaba' nami'heite kaha'mata'Ne su toumata. I Matius Manganga'lra' Bilyet Timu'hu'te si Yesus ⁹ Sadanu i Yesus name'ho'te bua'nu tampa ene', i Sie' nakabua toumata singkatau adenne i Matius kasaba' kahaga'sa'kennu ho'mpong-ho'mpong su tampa pahaha'nsa'e'nnu bilyet. Senebo i Yesus nabahi'ga' si sie', kasaba': "Tu'hu'te si Sia'." Bo, i Matius time'ngede' bo timu'hu'te si Yesus. ¹⁰ Du'ngkulru'nu i Yesus himo'mpong kuma'n su hu'a'ngnu balrei ene', selreite, nga'sa' si'de manganga'lra' bilyet bo toumata-toumata bardosa sinai, bo nahahage' himo'mpong kuman ageni Yesus bo tuma'-tuhu' tuma'-tu'hu'Ne. ¹¹ Bo, sadanu toumata-toumatanu Farisi nakabua su kagagione, si'de nabo'ka' su tuma'-tu'hu' tuma'-tu'hu'Ne kasaba': "Nakudabo i Me'tehe' ngkumu' kima'n agenu si'de manganga'lra' bilyet bo toumata-toumata bardosa ?." ¹² Manen ingene, sadanu i Yesus nandi'ngihi' apanu kagagione ene', i Sie' nabo'ka': "Si'de ha'nusu' a'o' mapi'a' mpadamen (ta'ya si saki'ne) ta'ya perlunu mangangu'ndang, tou diming toumata masa'ki'. ¹³ Manen ingene', a'kote bo patu'ntu'tenu ti'a'sa'ne iye', "Yoka Iya' makakoanu gilridi'ne, bo ta'ya makakoanu babi'heine", yoka Iya' sinao ta'ya galre' mamo'kei toumata ha'nusu' banar, tou lragi naha'mpei su toumata-toumata bardosa." Maki'na' Su Kagagionu Mahadan Hutung bo Dou. ¹⁴ Pa'lrusu'nu ene', tuma'-tu'hu' tuma'-tu'hu'ni Yohanes (Mananaha'ni') sinaini Yesus bo naki'na' kasaba': "Nakudabo kami' bo toumata-toumatanu Farisi nahadan hutung bo dou, tou tuma'-tu'hu' tuma'-tu'hu'Nu ta'yamai nahadan hutung bo doa ?" ¹⁵ Bo, i Yesus nangi'ndo' si si'de kasaba': " Apabo si'de manani'heinu makaka'bi'ng kasaba' lrumi'mbu'nu dalrai sangkungni tou makaka'bi'ng mahu'a'neine kasaba' nahaha'ge'ken age nsi'de ? Manen ingene, dongka kasupu'a'nnu lroune kasaba' sadanu i tou makaka'bi'ng mahu'a'neine ene' kasaba' ni'a'lra'te bua' nsi'de, bo pi'lrasa'ne si'de dongka mahadan hutung bo dou." ¹⁶ Ta'ya si insaunumai toumata kasaba' mapata'mpelre'nu he'ka' buhu' su lra'ku' kahanga'n, yoka tata'mpelre' ene' dongka mapage'he'nu lra'ku' kahangan ene' bo gehe'ne dongka mangi'ba su kabagainu gehe'ne. ¹⁷ Lragi, ta'ya si insaunu toumata kasaba' na'malrui anggur bu'hu' su hu'a'ngnu tampanu anggur kahangan kinalri'mu' bua'nu pisi'nu kumakahoa. Yoka adabo ingene, tampanu anggur ene' dongka mage'he', bo anggurne dongka mabo'so', bo pisi'nu tampane dongka mahuge'ge'. Tou manen ingene, si'de kasaba' nandeso anggur bu'hu' su hu'a'ngnu tampa kasaba' kinalri'mu' bua'nu pisi'nu kumakahoa bu'hu' lragi palretene' si'dedua kasaba' ta'yamai mahudodoi (magahing)." I Yesus Napabi'a'ha' bo Napapi'a'nu Panya'ki'. ¹⁸ Kahaga'sa'nu i Yesus napabo'ka'nu apamai apamainu iye' si si'de, singkabua i tou makati'mbonannu gahe'da sinai bo nasu'ba si Sie' agenu bahi'ga' kasaba': "Ana' babi'neiku bu'hu'mai natei. Tou manen ingene, boteken bo panga'mpete' nu lri'maNu si sie', palretene' i sie' dongka mabi'a'ha'." ¹⁹ Senebo, i Yesus time'ngede' bo timu'hu' si tou toumata ene', kasaba' nadi'ngan agenu tuma'-tu'hu' tuma'-tu'hu'Ne. ²⁰ Bo, selreite, pai gagudang babi'nei singkatau nadadi'ha'te tumaninu sa'ki' kinabo'mbosa'nnu daha' sangkungnu mapulro-duate su taonne, kasaba' lrimapa' si Yesus bua'nu lri'kudu'Ne bo nanu'lri' po'ndolro'nu kaya' malrambingNe. ²¹ yoka babi'nei ene' nangu'lri' su a'o'ne kasaba': "Adabo katu'lri'ku po'ndolro'nu kaya malra'mbingNe, iya' dongka mapi'a'." ²² Tou manen ingene, i Yesus lrimi'ngo' na'konu lri'kuduNe' bo timo'ntong si tou babi'nei ene', agenu bahi'ga' kasaba': "Pakatotogo' ateinu ana'Ku, yoka parca'yanu ene' napapi'a'tenu sa'ki'nu. " Su galre'-galre' i lragi, babi'nei ene' kasaba' napi'a'te. ²³ Sadanu i Yesus naso'ba'mai su balrei makati'mbonannu pagagahe'dan ene' bo nakabua si'de manano'ngo' saso'ngo'n bo ko'mpolro'nu toumata kasaba' nakaba'nsaha' ti'ngkahi'a, ²⁴ I Sie' nabo'ka' su toumata-toumata ene' kasaba': A'kote, yoka ana' babi'nei ene' ta'yamai natei, tou galre' ti'ki'-ti'ki'ken." Bo, si'de galre' napalre'geimaini Yesus. ²⁵ Manen ingene, sadanu toumata da'kelre' ene niu'sehe'mai pinalo'a'ng, i Yesus simu' bo nambelren lri'manu ana' ene', bo ana' babi'nei ene' kasaba' nabangon. ²⁶ Bahi'ga' iye' nailrilring su maya distrik su sene'. I Yesus Napapi'a'nu Duangkatau Toumata Buta. ²⁷ Sadanu i Yesus nati'mbusu' bua'nu tampa ene', duangkatau toumata buta timu'hu' si Sie' agenu nango'mbalra'-ngo'mbalra' kasaba': "Gilridainai kami' Ana'ni Daud". ²⁸ Senebo i Sie' simu' su balrei ene', bo si'dedua buta ene' kasaba' sinaiNe bo i Sie' naki'na si si'dedua kasaba': "Apabo kumu' mamarca'ya tou Iya' makakalri'mu' su kagagionu kaha'mata' iye' ?" Si'dedua nangi'ndo' si Sie' kasaba': Ode' (Tangada') Mabu !." ²⁹ Pa'lrusu'ne, i Yesus nanu'lri' mata nsi'de agenu bahi'ga'Ne kasaba': "Pamu'a'lri'te si kumu' mantu'hu' su parca'ya ngkumu'". ³⁰ Bo, nabi'ka'te mata nsi'de. I Yesus agenu bahi'ga' mape'ntehe' nane'poho' si si'de, kasaba': "Pakatarukira, adi'e'i pai si insaunumai bua' ngkumu' kasaba' mati'ho'nu kagagione iye'". ³¹ Manen ingene, si'de lrimo'a'ng bo napalrilringnu bahiga' kagagioni Yesus su maya distrik pai su sene'. I Yesus Napapi'a'nu Toumata Gugu. ³² Senebo sidedua toumata ene' lrimo'a'ng, selreite, toumata-toumata nani'ngan toumata gugu' (ta'ya makaba'higa') singkatau si Yesus yoka nia'duku'nu hanga'-hanga'n dalrai. ³³ Pa'lrsu'nu hanga'-hanga'n dalrai ene' niu'sehe', toumata gugu' ene' kasaba' nakabahi'ga'te. Toumata da'kelre' ene' galre' nakakilringan bo nabo'ka': "Kagagione iye' o'ngkamai ta'yakenmai kinabua su banua'nu Israel". ³⁴ Manen ingene, si'de toumata-toumatanu Farisi nabo'ka': "I Sie' nangu'sehe'te hanga'-hanga'nnu dalrai agenu manganga'tasa' hanga'-hanga'nnu dalrai (lragi)." Nga'sa' Papantase'n Tou Kodio Mamambelre'ne. ³⁵ Bo, i Yesus na'ko nani'ku' maya Banua bo banua agenu mapatu'ntu' su sinagoga-sinagoga nsi'de, bo napalrilringnu Injilnu Komalrigi', yobo napapi'a'nu maya panyaki' bo makapi'disi'. ³⁶ Sadani i Yesus nakabua toumata da'kelre' ene', ateiNe nadodounu gilridi' si si'de yoka si'de kasaba' nangeneite bo naitalrondeite o'ngkamai domba-domba ta'yamai si mananu'su'ne. ³⁷ Pa'lrusu'ne i Sie' nabahi'ga' su tuma'-tu'hu' tuma'-tu'hu'Ne, kasaba': "Tanga'-tangada', papantase'n nga'sa', tou mamambelre'-mamambelre'ne kodio". ³⁸ Yoka ingenebo, pangkelreite su Mabu kasaba' nakabelrennu papantase'n, palretene' i Sie' dongka mangi'ngka' (mapa'nga'lri'nu) mamambelre-mamambelre' su hu'a'ngnu papantase'nNe.