PAULUS SURA' TAHOW ROMA HINUNE EN O' ASEL MATE O' MI TURLO
1
Honi fe, fed hoo, nameba Yesus om mi ho e' hukung med nene am.
2
Fede' Roh fetang Yesus Kristus om mi ho, puin doc e med min ei hukung ho u ino' il am.
3
Fede, naba fe Taurat o' Hukung panen sah asel bo' mate a' no' moleng ho, Lahtal panen am sariho, Sa So Ai tahow a' no' nameno' doc ho a' ra ham honie, doc bo' mate miho Sa hukung,
4
honie piriba bo'fe mi fetang nene sobo Roh fe mi fetang ho, Taurat o' Hukung naba fe ubang honi hee, pi a' no' an.
5
Fede, supi ba bo' mate ei a' ta ain fetang ho bo' mate ei panen a' ten fe utanut, sobo supi ba Roh ei a' ta ain fetang ho, Roh ei panen a' ten utanut.
6
Fede tanut ho te' eng bo' mate fe lol hee min, sobo tanut ba te' eng Roh eife lol ho fetang med bad herang.
7
Fede tanut ba te' eng bo' mate fe lol ho Lahtal lafang; fede' sa Lahtal ei hukung ho e' a' ta ain nene, o' mtata sa e' panen nene.
8
Med supi ba bo' mate fe mi fetang ho, e' Lahtal a' no' sanang nene.
9
Honi sobo, i e' bo' mate mi fetang nene am sobo, i Roh femi fetang am, mang fede' Lahtal O' Roh so a' tino' a' ra iom homi. Mang fede' name nu Kristus ei Roh ho med a' no' sei nene honi hee, sari ai ho, Kristus e' med a' no' Sei nene.
10
Honi sobo, mang fede' Kristus a' ra iom mi honi hee, doc ei a' ra ham ibo' mate ho min, sobo roh so fetang asel na o' a' bul a' ra.
11
Sobo, mang fede' Sari Ai ba Yesus min am sobo Sa a' no' fetang ho Ei Roh a' ra iom mi honi hee, sari Ai ba Yesus Kristus a' no' fetang ho, Sa So Roh ba a' ra iom miho lol, fetang med ibo' mate doc a' hal hodi en.
12
Honi fe, no di ail bar, piri hoo name o' na tuping, sobo e' bo' mate o' na tuping nene honie fetang bo' mate a' ta ain nene.
13
Fede' i bo' mate a' ta ain fetang hee i min, sobo mang fede' iei Roh sa ibo' mate ei panen a' ten ho a' mine honi hee i fetang.
14
Fede, name ba Lahtal O' Roh e' puin a' tang puin ho, Lahtal o' ai bar.
15
Fede, roh ino' sah lahal ino' baroc ho, i e' med nene am, sobo Roh ba ifoh itel ino' Lahtal O' ai bar horo imed am, honie sari Roh horo om mi i lofe id ubang ho; Nimang, Nimang honi!
16
Sari Roh ho med tei roh ho sara am fe supi ubang piri hoo Lahtal O' ai bar,
17
mang fede' piri hoo ai am honi hee,piri di aneng afen, med Kristus a' ra ham ham Lahtal uaneng; mang fede' piri di A' ra ham ham ma' ar mahip med honi hee, piri di A' ra ham ham name tafoh tatel.
LAHTAL O' AI BAR HO TARAIN PA' MED
18
Fede, na utanut hee, ma' ar mahip sel fed hoo miho, no' ham ba pi med feho e' a' ra ham nene.
19
Fede, a' ten a' home ernuho, supi Lahtal O' ai bar a' tel med o' sel ho om uma empir a' danang eh.
20
Fede, a' ten a' home ernu ho a' dim but med na suhuin a' ai en am sobo, e' ei om a' ata ain nene, honi sobo Ai ba na ernu a' dim but horo ei om, med udume sano' pilang,
21
honie a' ten a' home ernu hodi po' butung om homi il luling med, honie puin fa Lahtal O' ai bar ei no' ham afeng ho om lefa.
22
Fede' pi a' hol sariho, a' ten a' home ernu barpi ham ham ahew morang, safain sahel o' na ma' ar med sam fed hoo mi meng.
23
E' horo solo nene, sobo piri ba Roh matu med am hodi, a' hain a' fe' a' ra pi bo' mate mi, honie tafoh tatel tano' ai fe ho a' danang eh, sariho pi bo' mate a' tiling med.
24
Fede, pi il luling med ho, udume om mi. Honi sobo, udume pi dun a' hol ho e' udume nene am, fede' maa ano so nanu sa dun a' hol am hee sa foil udume?
25
Honi sobo, mang fede' nanu pi e' dun a' hol dai e pi a' danang, honi hee pi tom tining tapa no' puin a' danang.
26
Hoodi honi, pi moleng om mi hee Roh tei ta; fede' pi a o' me abul ho taro' ni horo pi a' hol nene, sobo Roh so a o' me med pi a' hain a' fe' ernu ba pi bit sah ho e' re eng.
27
Fede' Sari horo tom lap, Roh ei tanut Sa ahol, fede' Sari so Lahtal ei om a' ta ain a o' me med name om bolang ernu e' re eng.
28
Med, pi a' hol sari ho ernu turlo ham ham karesang med name ba Lahtal ukarang ho e' re eng, sariho Lahtal ei om med o' tanut a' ta ain lofe pa' med ho e' re eng.
29
Fede, supi ba turmi Sa a' pong a' hol am hodi, turmi utub med O' Ai ei lalaman a' ra ham meng honie, Sa sano' matu di ail bar tofang a' nai homi.
30
Supi ba turmi Sa utub am hodi, Sa o' lofe, med supi ba Sa o' lofe am hodi Sa a' no' a' bul; md supi ba Sa a' no' a' bul am hodi Sa uta rain.
LAHTAL O' UKARANG HO, YESUS KRISTUS OM FE MI
31
Honife, barpi hoo ei a' ra ham ho maa pi naba fe ubang? Mang fede' Lahtal a' ra teita honi hee, ano so maa tari lafang?
32
Aiho, Sa e' So Ai ho ukarang nene, sobo Sa So Ai ho alorang med piri barpi tere eng, taro' ni sofe Sa e' So Ai a' ra ham ham na ernu ho a' bole med ten nene?
33
Ano so maa name ba Lahtal utara' med ho o' a' hal lap? Lahtal so supi a' no' a' bul.
34
Ano ma' a supi hukung? Yesus Kristus min am, sobo So fetang am, Lahtal a' tang tani lol ho mimih honie Sa ao' me med tere eng.
35
Ano so maa Kristus O' ukarang om homi taba ang? A' ri ing fail so eme, sah karak so eme, ma ar mahip so eme, hil malihing so eme, a' boi tang oh so eme, bamed fui hal so eme, nei a' rab so?
36
Mang fede' hul ol men honi,
Ei ara ham horo ba, ni a' ra min tabang om mi sel a'ri an;
niri hoo name
nino' mang fede' nub ai bar
dang a' pew ei honi.
37
Honi sobo, pi so mimid name so mimid beng nun ho e' mota, fede' Ai horo tari ukarang.
38
Fede' na o' a'tino' bit sari ho, min eme fetang hodi a' ai, malaikat ernu so eme parenta puin ernu hodi a' ai, na ernu fed ei so eme mong ma eh ei, aneng afen,
39
tong lafining mi so eme pon lamang mi hodi a' ai, eme a' ten a' home beng di, Lahtal O' ukarang ba pi Tuhan Yesus Kristus a' bung ho supi so kufa' puin homi taba ang sah.