PAULUS SURA' TAHOW ROMA HINUNG EN O' ASEL MATE O' MI TI' EINU
1
Na Kristus om mi na o' a' bul umateng, na e' kalufe nene, med nom nah ei a' mang pa' Roh Bolang a' ra ham ham a' ta ain umateng,
2
sari ho, no a' hain no a' fe' mate o' sah, med neng noi nom miher sei masing.
3
Fede, na udume honie, no bo' mate hoo futung pa uj med no di ail bar e' re eng, nameno' nara bangnu pali' nu bo' mate a' ta ain,
4
sari ho, Israel hinung; a' tel med a' no' Lahtal O' aibar ho uaneng, a' foh a' tel, paha' tofang supi med, Taurat ei hukunh supi puin, ao'me panen, no' hee paha' sel meng tofang supi med.
5
Supi horofe bap bale nun o' fol o' heb, med supi o' a' nai homi horo fe Kristus ho a' fain bo' ei a' ta ain, Sari horoba ernu turlo ho o' Tuhan, Sari horo utarain em sam so em ho a' meng. A'tino.
6
Honi sobo, Lahtal O' fom pa' e' suhuin nene. Fede, nameno ernu e' Israel nene sobo, hodi Israel o' nameno'
7
med e' barpi Abraham o' fol o' heb nene sobo, hodi o' ai bar, sobo o' bit ofol oheb honiho, Isak om mo tar, Isah femi ho'.
8
Sari na hoo o' lel honi hee, aikabar ba bo' mate ei horofe ta an Lahtal Ei Ai bar nene, sobo paha' ei aibar horo solo ta an a' no' fol heb.
9
Fede, hooro paha' ho o' pa' ubangho: " Sel fed horo Na ho' honie, Sara sa ai lote nu a' ra.
10
E' horo solo nene sobo, Ribka di sari name nu horo o' aibar u sari puin, sari ho Isak, pi bap pi bale.
11
Fede, aikabarho a' fain dai med na no' eme na sah nu panen dai, honie Lahtal ei tanutba Sa utara' ei a' ra ham ho a' no' dume, sari a' no' dume hoo, e' panen a' ten mi nene sobo asel Sa o' lofe,
12
u Ribka a' ra mateng, "Ai matu ho,sa so di' ubaleta."
13
Mang fede a' ra hul ol meng honi,"Na Yakub ukarang, sobo Esau Na a' ra sah,nom e' ma ar."
14
Honife, maa pi naba fe ubang? Lahtal maa e' a' bul nene? A' ai. E' nene!
15
Fede Sa Musa a' ra mateng ubangho, "Nom anofe ukarang uma honi hee Na horo ukarang, Nom anofe a' ra bala uma honi hee, Na horo a' ra pa' bala.
16
Honife, naho e' nameno' ei om eme o' karesang o' baleta ei nene sobo, Lahtal so So pa' bala utub.
17
Fede, Sura' Bolang Firaun a' ra mateng ubangho: "Fede asel na hooro eife Na afoh atel, Na No kufa' med etub honie, Nani ho umateng pali' mate ho mipir.
18
Honife, Lahtal Sa anofe ukarang hee Sa ukarang, Sa anofe om ano' adobe hee, Sa a' no' adobe.
19
Honife, i maa nara mateng ubangho: "Naba eife,Sa dai a' no' a' hal eh?
Fede, anoso maa O' tanut ho utetang no?"
20
Honife, maa iriho ano, hoi nameno, honife i Lahtal a' ra tetang? Ai nu sa nanu a' ten, honi hee sari naba sa a' tenho maa a' ra mateng ubangho, Naba eife a naten o' rupa hooni?"
21
Maa name paner faw ei nu sobo, o' fa' ai e' nene, honie sa fa' ai doil ham horo sa faw a' no' paner, honife paner hoo pa' nu med na o' no' e' re eng, med paner bengho med na o' sah e' re eng no' eme a'ai?
22
Maa taro' ni mang fede' Lahtal, Sa i' nung So a' ri ing fail med So kufa' Sa utub, pa' bala so mimate Sa fit fan med O' a' riing fail paner tofangba, utaro' med po' butung e' reeng am ho Sa med e' re eng a' raham no' eme a' ai?
23
Sa na hoo panen, puin So kafac mimate ho utub med paner tofang O' ukarang om miba Sa utaro' med no' ham e' reeng,
24
sariho piriba, Sa tolofe, sariho e' Yahudi hinung o' a' nai horo solo mi nene sobo, bang beng pali' beng hodi o' a' nai mi.
25
Mang fede' Sa sofom pa' umateng med Hosea o' sura' mi honi:
"Supi No serang nene sobo,
Na ubang No serang.
Med Na e' ukarang nene sobo, Na ubang No
ukarang om mi.
26
Med, mong eleme turba Lahtal mi ubangho:
" Iri ho e' No serang
nene honi hee,
sari e' leme horo mi, supi name ubang' Lahtal
O' Ai bar fetang".
27
Med Yesaya Israel
u a' hain :
"Masiki Israel o' aiho fec tang tapor mi honi sobo,
sei lal supi o' ameh horo il luling med,
28
Fede' Lahtal Sa so fom pa' med pali' mate hoo ta a' no' lameho, so mi an med hano ang.
29
Mang fede' Yesaya u a' pail meng honi:
"Mang fede' pali' mate sobarpi hoo o' Lahtal,
Sa pi fol pi heb e' med te ad nene honi hee,
piri hoo Sodom med Gomora fe a' raham.
30
Honife, maa pi nabafe ubang? Sariho bang bang ernuba e' Yahudi neneho, supi na abuho a' ta ain nene sobo, na o' a' bulho supi medam, sariho a'bulba udume om mi horo supi med;
31
honi sobo, Israel hinungba se'bur lap honie, na o' a' bul Taurat o' Hukung om miho a' ta ainfe sobo, e' sam hukungho lefa nene?
32
Mi naba ei? Fede' supi udume puin lap te eng nene sobo, panen a' tenfe puin lap te eng. Supi foi u u' fit ei u u' fit.
33
Mang fede' hul ol meng honi:
"E' dun, tong E' leme Bolang homi, foi u' fit ei med pe' foi matenu Na med meng,
Med ano honi horo
O' a' tino' bit honi hee, name e' a' no' mala mani ang nene.