PAULUS SURA' TAHOW ROMA HINUNG EN ASEL MATE O' MI ITITO
1
Maa i a' hol nene, hoi no di ail bar (fede' supi Taurat o' Hukung a' hol horo na supi a' ra mateng), sariho Taurat o' Hukung ho name nu dai fetang eh hee sa ai ho a' pec?
2
Horo eiba, ai obnu sa nika am, sa dai fetang eh honi hee, hukung ho sanalo a' pec; sobo mang fede' o' lote min am honi hee, nika o' hukung e' a' pec nene am.
3
Honife, mang fede' ai ob ho o' lote dai fetang eh sa foil lote beng med honi hee, name ubang sa nasah panen, sobo mang fede' lote min am honi hee, sa hukung ho u il, honie name e' ubang sa nasah panen honi nene am, mang fede' sa foil lote beng a' ra nika.
4
Honife, no di ail bar, Kristus O' bo'lol iridi min med Taurat o' Hukung e' re eng am honie name beng iri uaneng, sariho Ainu ba min om mi sofetang am horo honie, piridi o' pir ta med Lahtal e' re eng.
5
Sobo mang fede' pi dai bo' mate mi fetang eh hee, doc ei tanut sah nun ho Taurat o' Hukung udile med pibo' mate utoh nun homi honie, sa o' pi ta med min e' re eng.
6
Honi sobo, fed hoo Taurat o' Hukung e' tapec nene am, min med naba honi horo turmi tapec meng ho e' re eng am, honife fed hoo pi fetang habar om femi baleta Rohfe a' ta ain sobo hukung tur ei hul ol meng ho e' a' ta ain nene am.
DOC MED TAURAT O' HUKUNG
7
Mang fede' honi, naba fe maa pi ubang? Taurat o' Hukung ho maa doc eme aai? A' ai! Na doc ho a' pon a' hol nene, sobo mang fede' Taurat o' Hukung fe lol, fede name beng o' na ernu nom tameng ho, na o' lel a' hol nene mang fede' Taurat o' Hukung e' ubang haai name o' na ernu om tameng honi.
8
Honi sobo, doc sari parenta ho lol seleme med honie, tanut med name o' na ernu tameng ba nafah nahir miho a' no' a' ra; fede' Taurat o' Hukung ho a' ai honi hee, doc hodi min.
9
Turmi ho na e' Taurat o' Hukung mi fetang nene, sobo sari hukung ho a' ra honi hee, doc sofetang nari hoo min;
10
med parenta hoo, o' a' bulta nepuin natang puin fetang lefa honi faleng, nara min fe lefa.
11
Fede, doc sari hukun homi seleme med puin nara kalufe med namine.
12
Honife Taurat o' Hukung ho bolang, a' bul, med no'.
13
Mang fede' honi, na no' ho min fit ho' ne re eng? A' ai e' honi nene! Doc horofe min a' no' a' ra med nafah nahir homi na o' no' a' lai, honie sa lel, sariho doc foil so doc, med hukung ho a' lai honie, doc ho pi dun a' hol mang ta.
SALAHAIN A' RA TAFAH NI
14
Fede' pi a' hol sariho, Taurat o' Hukung ho panen mi hee laman ei, sobo nari hoo,no panen mi ho bo' mate ei, med doc e' fail.
15
Fede, nabafe na panen na a' hol nene am fede, naba o' nom uma eh ho na e' panen nene, sobo naba fe nom e' bune horofe na panen.
16
Honi sobo, mang fede' nanu nom e' una nene horo na panen, honi hee Taurat o' Hukung ho na u i' nung sari ho no'.
17
Honife fed hoo, nangso panen nene sobo, doc ba narimi horo panen.
18
Fede, na a' hol hee, na o' no' den e' a' ra nari mi fetang eh nene, sariho no bo' mate mi, fede' nabafe nom penen uma a' ra nafah mi, honi sobo nano' panen fe honi ho a' ai.
19
Fede, panen a' ten no' ba nom uma eh ho na e' panen nene, sobo na o' sah ba nom panen uma nene horofe na panen.
20
Honife, mang fede' nabafe nom panen uma nene horo na panen honi hee, sariho nangso panen nene sobo, doc ba nari mi fetang eh horo fe na ho panen.
21
Honife, hukung hoo na lap a' hol, sariho; Mang fede' nom na o' no' nu panen uma honi hee, na o' sah di a' ra nara tohuil eh.
22
Fede' Lahtal ei hukung horo a' ra nom mi na u i' nung,
23
sobo hukung beng na dun a' hol a' ra ne natang no bo' utoh nun homi horofe hukung ba no tanut med nafah nahir miho o' se' bur lap lafang, honie nari ta' u med doc ba a' ra ne natang med no bo' o' utoh nun mi ho lefa.
24
Nari hoo nameno' min tabang ei! Ano so maa bo' min ei hoo mi nano' il?
25
Pi Tuhan Yesus Kristus lolfa ada mahen ubang Lahtal a' ra ham!
26
Honife, no tanut med no panen no a' ten, na puin Lahtal O' hukung ubaleta, sobo no bo' mate ho na puin doc ei hukung ubaleta.