PAULUS SURA' TAHOW ROMA HINUNG EN ASEL MATE O' MI TALANG
1
Honife maa pi naba fe ubang? Pi maa doc horo panen sei masing honie sa ukarang mang tofang ta?
2
E' honi nene! Taro' ni sofe pi doc ho umin am hoe pi dai om mi fetang eh?
3
Eme piriho barpi tafoil med Yesus Kristus om mi am ho, piridi name tafoil med O' min om homi am sobo i e' a' hol nene?
4
Honife, piridi name med A' ra ham ham a' pot am selba name mi tafoil ho a' ra ham med O' min om homi; honie Yesusba Somang O' tutng kufa' puin name min a' nai homi sofetang am ho hee, piridi a' ra fetang habar om mi lame no.
5
Mang fede' piridi A' ra ham ham tano' nu fa O' min om homi am, ho hee piridi u' il u' il A' ra tano' nu fa O' so fetang om homi.
6
Pi a' hol sariho, nameno' pah honi hee, pi A' ra ham ham arapti ta hil am med pi bo' mate doc ho e' a' no' suhuin nene honie, pi bo' mate ho pi foil puin doc ubaleta e.
7
Fede' name o' min am ho, supi doc ho u il am.
8
Fed hoo, mang fede' pi Kristus a' ra ham ham min am, pi o' a' tino' bit sariho piridi A' ra fetang med.
9
Pi a' hol, sariho Kristusba name min a' nai mi Sofetang am ho, foil min nene am; min e A' ri uaneng nene am.
10
Fede, Sa minho, Sa min minu med doc e' re engho em a' meng, sobo Sa fetangho, Sa fetang Lahtal e' re eng.
11
I bo' mate hodi honi, iridi iholfe, sariho ibo' mate min doc e' re eng am, med fetangho, Kristus Yesus mi fetang med Lahtal e' re eng.
12
Honife, haai doc ho mang e' dun eh sa ibo' moleng ho uaneng honie i ei i' nung horo a' ta ain e.
13
No' hee, bo' mate o' utoh nunho iha ai a' lorang doc en honie sa a' no' so lepir bardong e.
Honi sobo, ibo' mate ho min o' a' nai homi a' lorang Lahtal en a' no' na fetang, med ie itang bo' mate utoh nunho, ano' Lahtal O' abulho o' nei balep.
14
Fede' doc e' iri uaneng nene am fede i e' Taurat o' Hukung e' far fetang nene am, sobo ukarang fe e' far fetang.
NA A' BUL U BALETA
V 15 Honife, maa naba honi horo pi panen? Pi Taurat o' Hukung e' far fetang nene am, pi ukarang fe e' far fetang am honife pi doc horo foil panen? A' ai! e' honi nene!
16
I u' il a' hol sariho, mang fede' bo' mateho i a' lorang a' no' baleta ei nam med nanu e' re eng soeme namenu en, ho hee ino' name baleta am honife i sari ai horo a' lol a' ta ain; sariho doc horo iepuin itang puin fa min lefa, eme a' lol a' ta ain horo ie puin itang puin fa a' bul lefa.
17
Honi sobo ada mahen ubang Lahtal a' ra ham fede' turmi i doc u baleta sobo, fed hoo iom pirnu pa' nu puin na' hol o' asel mate ba u ira sakola am a' lol a' ta ain,
18
no'hee i doc ho mi il am honi fe ino' na a' bul fe u baleta o' name.
19
Na nameno' ei mateng fe puin ira mateng fede' ibo' moleng. Mang fede' turmi ibo' o' utoh nunho i a' lorang a' no' na doro pir med a' ri ing fail ubaleta o' na ernu, honi puin mong a' ri ing fail o' let lefaho, fed hoo ibo' utoh nunho a' lorang a' no' na a' bul u baleta ei, honie o' alomang mi hee bolang manep.
20
Fede, i dai doc ubaleta eh honi hee, na o' a' bul ho i u il.
21
Honi sobo, na ernu ba fed ino' mala maniang ho, o' untu naba honi horo i med? Fede' na ernu hoo sam o' a' muj mi ho min.
22
Honi sobo fed hoo, i doc om homi il luling med am, no' hee i Lahtal fe ubaleta am, bolang manep mi o' pir imed am, o' a' muj miho fetang so em i med.
23
Fede' doc o' fali ho min, sobo Lahtal O' ukarang ho, pi Tuhan Yesus Kristus om mi fetang so em med.