PAULUS SURA' TAHOW JUMAAT ROMA EN O' ASEL MATE ALO
1
Honife i iri ebang sah am, hoi nameno' anoso name beng o' a' hal lap fede' i o' ahal lap eh honi hee, iridi iri hukung fede' iriba supi o' a' hal lap hodi sari nanun ho panen.
2
Pi a' holho, Lahtal Sa a' bul lapho, so atitino a' bul med nameba nahoni ho panen horo a' ra ham.
3
Honi sobo, itanut ho maa i Lahtal, ei a' bul a' hal lap om homi e' iri tamuj nene hoi nameno, sariho iriba supi o' a' bul a' hal lap eh horofe na o' honiho panen, sobo na horo i panen?
4
Eme, Lahtal O' kafac, O' buj no' med Om bala amone ho i a' no' na mangtanai, sobo Lahtal o' pa' bala horo iepuin itang puin honie iom a' fom i e' a' hol nene?
5
Honi sobo, ielafung adobe med iom a' fom ipang sah honife, i Lahtal o' a' riing failho itaro' med ibo' mate e' reeng meng, sam Lahtal O' a' riing fail med Lahtal a' bul a' bul puin ho' a' bul a' hal lap o' selho mimeng.
6
Nameno' o' panen a' tenho, Sa o' a' bor o' den med en sobarpi,
7
sariho nameba som tining nano' fe panen, Lahtal utarain med uada a' holfe lapho, fetang so em med,
8
sobo nameba so bo' matefe ukarang,na o' a' bul utetang, fa na o'a' bul nenefe a' taain,sari nameho Lahtal o' a' riing o' fail supi med.
9
Selnu mi hee,nameba nasahfe panenho maar mahip karak a' raham, o' aainang hee Yahudi hinung, med Yunani hinung.
10
Sobo, nameba na o' no' panen ho, supi no' ham loil asal bad herang med, o' a'ainangho Yahudi hinung, no' honi hee Yunani hinung.
11
Fede'Lahtal e' name a' le' nene.
12
Nameba Taurat o' Hukung a' hol nene e doc panenho e' reeng honi hee, supi e' Taurat o' Hukungho umin nene. Sobo nameba Taurat o' Hukung e' farho doc panen honi hee, Taurat o' Hukungho puin sari aiho o' a' bul o' a' hal lap.
13
Fede, haai Taurat o' hukung ualepang horo Lahtal a' raham homi a' bul med nene sobo, nameba Hukungho panen horo a' bul med.
14
Fede, name Yahudi neneho ei Taurat o' Hukung a' ai, sobo nabafe Hukungba Taurat om miho supi panen honi hee, supiba Taurat o' Hukungho e' supi ei neneho, sano' hukung med sei bo' fe e' reeng.
15
Na hoo sa utub sariho Hukung Taurat om miho o' panen o' a' ten a' ra hul supi om mo o' leh, supi om md o' tanut sari lafang puin so a' bul so a' hal lap,
16
selnu mi hee, Lahtal nameno' o' tanut tafunig ernuho o' a' bul lap Yesus Kristus a' lai no Sura' habar om a' raham.
YAHUDI HINUNG MED TAURAT EI HUKUNG
17
Honi sobo, mangfede' iubang niri hoo Yahudi hinung, Taurat o' Hukung a' no' iei no' hee Lahtal mi bad herang,
18
Ei omho a' hol, na o' no' u i' nung,Taurat o' Hukungho usakola am,
19
med o' a' tino' bit ubangho, iri horo name engsah o' dopang tefang, name paka om mi o' na lel,
20
name bodo a' fom a' pahang o' name, name mate bar gur pel o' name, na o' a' bul a' ara Taurat o'Hukung miho a' hol no' hee a' no' lame ei name,
21
honife hoi iriba name a' ra sakola o' name, naba ei sofe ibobom ira sakola nene?
Iriba name a' ra sakola ubang haai na ta'u e' honiho iriso e' na ta'u nene?
22
Ob bar beng a' ra a' hal panenho iriso uhap, sobo iriso e' ob bar beng a' ra a' hal panen nene? Ti ah foi ah ifah aloil, sobo ti ah foi ah o' bangho iriso utot ukalaping?
23
Iriso Taurat o' Hukungho a' foh a' tel, sobo iriso O' hukungho lafang puin Lahtal a' no' mala!
24
Mangfede a' ra hul ol meng ubangho; Bang ernu o' a' nai homi name Lahtal e' bit asel iri.
25
O' a' tino' bitho o' fali a' ra mang fede' Taurat o' Hukungho i a' lol a' taain, sobo iriho namenu lafang, honi hee i o' a' tino' bitho sano' o' a' tino' bit nene am.
26
Honife, mang fede' o' ba e' o' a' tino' bit dai sobo, parenta tofang Taurat o' Hukung om miho sa panen honi hee, o' a' tino' bit dai sobo, hodi med o' a' tino' bit amho a' ra ta' an em aai?
27
Med maa nameba bo' mate ei a' lol o' a' tino' bit, mang fede Hukungho panan i a' bul lap,honie nameba Hukungho sei a' no' o' a'tino' bit sa hukungho lafang eme aai?
28
Fede, o' ubang Yahudi a' bulho, e' o' luling lol femi dun nene, med o' a' tino' bitho, bo' mate femi o' a' tino' bit horo nene.
29
Name Yahudi a' bul nu honi hee, sari aiho om ah a' bul a' bul Yahudi, med o' a' tino' bit a' bulho om ahmi, Roh a' no' lame, sobo Hukung hul ol meng horo nene. Tarain pa' med name hooni ho a' ra ham ho,e' nameno' mi ho' nene sobo Lahtal femi ho'