PAULUS SURA'TAHOW JUMAAT ROMA EN O'ASEL MATE AA'INANG.
1
Paulus Yesus Kristus o' name baleta, sa lofe pa' med solo sei a'par med Lahtal o' sura' habar e' re eng,
2
dai eh ta Lahtal upaha' nabi tofang a' lai, a' ra sura' bolangmi,
3
O' Ai ei a' raham sariho, bo' mate ei a' lol hee' a' fain a' hel sano' Daud o' fol o' heb,
4
sari horo Lahtal Ai tutung kufa' Roh bolang ei a' lol Sa name min a' nai homi sofetang, sari horo Yesus Kristus tei Tuhan.
5
Sari horomi, ni na' hol dil ma' eh med rasul o' karesang nimed, honie puin udume ho a' lol a' taain, fitma bang ernuba e' Yahudi neneho a' nai homi asel Ei Ani,
6
med iriba lofepa' med ino' Kristus Yesus ona am hodi sobarpi.
7
Iriba barpi a' ra Roma miho, Lahtal iolofe honie ino' name om bolang,; Pimang Lahtal med Yesus Kristus o' no' ham med tofang lu' ung a' ra iri ta.
PAULUS OM SAM JUMAAT ROMA E' DUN UMA.
8
O' aa' inang na Kristus Yesus om mi, no Lahtal o' no' ubang med irita sobarpi, fede' iudumeho pali' mate a' hol o' ham.
9
Fede' Lahtal O' Ai a' ra sura' habar om mi na no roh puin ubaleta eh ho, sanahol, sariho na iri uma sei masing,
10
na aome om mi nabang sei masing honie, fed hoo Lahtal u i' nung na ho' ihol am.
11
Nomho, na so ho' ihol honie, na bolang ei na no' nu na med ien puin ino' kufa',
12
honi puin pi udume a'no' kufa' ham ham, sariho iei udume med nei udume sobarpi.
13
Di ail bar, nomho iridi a' hol sariho, na iolap sam nom uma sei masing sobo, na tofang mi hi' sam fed hoo mimeng honie, na inai homi o' hir o' pa' med, mang fede' bang ernuba e' Yahudi nene a'nai mi honi.
14
Na utmate fan sariho, Yunani hinung, Bar bar hinung, name om' ra, med name bodo barpi na o' ut fan.
15
Horo ei soba, sura' habarho nom fisam iriba Roma miho, uira mateng uma empir.
16
Sura' habarho, na e' umala maniang nene fede' sari sura' habarho Lahtal o' kufa' puin nameba o' atino' bitamho a' no' il a' no' luling.
17
Fede' o' om homi Lahtal o' a' bulso a' ra,udume mi fa udume mi, mang fede' a'ra hul ol meng ubangho; Name a' bulho fetang med asel udume.
LAHTAL A' RIING FAIL MED NAME DOC PANEN A'RAHAM
18
Fede' Lahtal so a' riing failho tong Sorgami a' ra hel med nameno' ba se a' hal lol med nasah panen, puin na o' a' bul bal pikuho e' re' eng.
19
Honife, Lahtal ei a' rahamho nabafe a' hol honi hee, lel supi e' re eng am fede' Lahtal usupi e' tub am.
20
So a' bul pali' mate mang a' ten honi hee, Lahtal o' panen a' tenba dun a' hol nene sariho, o' tutung kufa' so em, med o' bolang manepho a' hol lel sari hoo o' panen a' ten tofang a' lai honife, supi usari ebang sah.
21
Supi Lahtalho a' hol am sobo, supi uada a' hol a' no' Lahtal nene med supi no' mahen bit a' ra ham di a' ai, fede' supi o' tanut e' no' nene, med supi omho paka a' muj.
22
Supi utanut hee supi mi na' hol sobo bodo,
23
supi Lahtal o' lel madalba na kome di abir neneho, supi nameno doc a' hal o' lalaman, hiw lelang ernu, binangta e' fa ut, med binangta sato' puin hod o'lalaman fe puin tiling.
24
Horofe Lahtal supi a' lorang men supi o' tanutba sah panen ei horo mi ad honie, supi o' a' nai homi supi na o' sah horo panen med so bo' mateho a'ra ham.
25
Fede' Lahtal ei na a' bulho supi kalufe aba puin tiling, no' he' e' na fetang ernu Lahtal a' ten horofe supi uada a' hol, sobo Aiba na lelang ernu a' tenho, supi e' uada a' hol nene. Amin!
26
Horofe Lahtal supi med tanut sah tofang o' a' lorang fede' supi o' ob bar nun ho, mih tar a' bulho puin mih tar a' bul nene tiling.
27
Lotebardi honi, supi so ob bar a' ra mih tar a' bulho med meng, sobo tanut sah panen med beng a' ra ham haro huring talol, lote bar sara na mala maniang panen,honife supi a' fah a' hir a' ri an hukung med fede' supi doc tofang panen.
28
Fede' supi ei na' holmi supi Lahtal o' a' tino' bit nene horofe, Lahtal suoi med tanut sah ernu horo en, horo hee na ernuba panen ei nene horofe supi panen.
29
Supiho na o' a' bul nene horo supi om afeng; bune hala, maro' makakang, a' ri ing fail, som puin name a' ta ain, name a' mine, taburang ta' i', kalufe aba, alel dol,
30
name o' sah mareh bit, supi om Lahtal e' bune, atarung, safoh satel, sah panenfe lap, tumo' bar a' lol a' ta ain nene,
31
bodo kamuke, tetang hasu, tanut no' a' ai, a'ri ing karang.
32
Masiki Lahtal na o' uhapho supi a' hol sariho; Anoso na honiho panen hee min med, supi solo sari naho panen sei masing nene sobo, nameba naho panen hodi supi e' ita.