¹ "Malaikat jumaat Efesus mi na hoo hul: Aiba ibing pa' itito Satang tani mipuin, med lampu epa' mas itito o'anai lame eh horo o'mateng pa': ² O karesang tofang o' latutung her om tahang Na a'hol, taro' nife nasah uiri tahang sah, med nameba saridi rasulho i o'atino' lap,* sobo o'abul ho supi e'rasul nene, i a'hol honi he'e supiho e' rasul abul nene. ³ Om dume med tahang toh a'ra iafahmi fede' Nani ei araham, med lahun lakome i e' ahol nene. ⁴ Sobo, Na iehap fede' i ukarang aainang i med mengam. ⁵ Honife, uma itaromi ol, iom afom, nabafe i aainang panenam, horo foil panen. Aai honi he'e, Na ho' olapho', o'lampu epa' ho Na eleme homi med, mang fede' i e' iom afom nene. ⁶ Honi sobo, ho'oro imed: Nikolaus o'ataain med o'panen nunho i o'sah ubang, fede' Naridi o'sah ubang. ⁷ Aiba a'fel ara' sei honie nabafe Roh ubang* med jumaat tofang a'ra matengho saridi alepang. Aiba tahang sam o' amujmiho, Ti Fetang mong Lahtal O'dil om miho, Na homi sei namej med en ade." SURA' TAHOW JUMAAT SMIRNA EN ⁸ "Med, malaikat mong Smirna mi na ho' hul: Ho'oro Aiba Aainang ara, sam o' Amuj midi a'ra, minam sobo sofetangam horo o'mateng pa': ⁹ Isusa imalo isah ilahal Na ahol, sobo o'abultaho i kafac! Na ahol, nameba sanibit Yahudi hinung ho iebit ieng el, sobo e' nene, sariho Setang o' airlah so. ¹⁰ Sah karang tofang maa ifetang om mi sobo haai ubaroc. Edun, setang maa inai homi pirnu alo med sapirimi name ipate, imaar mahip ahol tareng ernu om mi. Alol ataain sam somin, honie Na fetang o' falofang hideta med ien. ¹¹ Sariba afel araho nabafe Roh bit jumaat tofang ara mateng saridi ma eh. Name tahang toh ho sa min o' mialomi o' susa karang a'hol nene." SURA' TAHOW JUMAAT PERGAMUS MI EN ¹² "Med, malaikat mong Pergamus mi na ho' hul: Ho'oro Aiba nei huding e'fail alo puin ho o mateng: ¹³ Seleme taromi Na ahol, mong Setang o'lahmatemi; sobo Nani i apuin dume, No udume i e' ukalufe nene, o'mita mong Antipas o' zamangmi, No name ernuba som abul puin Namang pa' ubang eiho, name inai homi amine, mong setang o' lah mi. ¹⁴ Sobo, Na iehap fede' inai miho pirnu alo Bileam o'gurpel ataain, Balak hodi sa gurpel honie na u u'fit ei panen med Israel aibar emeng*, sariho namejba fisam ah foi ah eiho supi ahow ade* med ob bar ara doc panen. ¹⁵ Foil nuho, inai homi pirnu alo Nikolaus o'gurpel apuin hodi honi. ¹⁶ Honife, iom afom! sobo aai he'e, Na iolapho' Nei Nat om mi Na puin supi ara mali. ¹⁷ Aiba afel araho, nabafe Roh med jumaat tofang ara mateng ho saridi ma'eh. Aiba tahang toh sam o'amuj mi, Na namej* tafuning med en; foi afel hir med en, med ani habarnu foiho tahul meng, name pirnudi ahol nene seilalho aiba foiho med horo solo ahol." SURA' TAHOW JUMAAT TIATIRA MI EN ¹⁸ "Med, malaikat mong jumaat Tiatira mi na ho' hul: Sari hoo Lahtal Aiba, E'fail huring mang fede' afail honi, E'fa huring talol mang fede' na ol mong afail mi olel honi o'mateng pa': ¹⁹ I panen aten, iukarang med iudume, ibaleta med iom tahang Na ahol, i karesang tofang o'amuj miho, karesang o' aainangho alihing. ²⁰ Sobo, Na ehap fede' Isebel ob ho imed admeng, ubang sariho nabi, sa gurpel, No name baleta ernu sa med sesah ua'd, ob bar ara nasah panen, med ade na eiba fisam ti ah foi aham ho ade. ²¹ Na sel med en ahow som afom, sobo ob bar ara nasah panen ho, sa saain u som afom. ²² Edun, Na ari med de' maar mahip tafew, med supiba ara doc panenho* Na med sah karang mate mifew, asala supi ob bar o'panen ernuho usom afom. ²³ Med, Na o'aikabar nun amine; honi jumaat ahol Nari horofe name o'tanut med om ah apate, Na med ien iri an, ipanen iatenho ataain. ²⁴ Sobo, iri beng Tiatira miho, o'ba gurpel ho' ataain nene, med Setang ei tafuning ahol dai ho, Na iramateng: Na e natarofe den iri tameng nene. ²⁵ Honi sobo, nabafe i medam apuin dume sam Na so ho'. ²⁶ Med, nameba tahang toh med No karesang ernu panen sam o'amuj mi, Na tutung kufa' en bang ernu puin, ²⁷ med supi dob na ol puin bang ernu parenta, beh apo' kari'-kari' mang fede' name dong faw aputang muj honi, fede' Naridi tutung kufa' Nimang abung medam. ²⁸ No, Na ibing fed po' lol med en. ²⁹ Aiba afel ara' nabafe Roh umateng med jumaat en ma'eh saridi ma'eh alepang."