HALOW O'SURA' O'ASEL MATE NU MI
1
Yesus Kristus o' tino' olel, sariho Lahtal med en honin e Sa med so man sia en sariho nabafe maa ara latelfe.
Yesus Kristus o' atino' olel ho med So malaikat ahow puin Yohanes, So man sia ho a'ramateng.
2
Yohanes ho Lahtal o' mateng pa' e med Yesus Krstus o' sakola, honin di lelang airnu ba Sa a'hol am ho di.
3
Utu fetang med name ba Lahtal amang pa' ba u'paha' am ho ta'an mang u'lofe id u' a'raham honindi untu fetang med nameba nabafe sura' bolang om mi bit eh ho ma'eh' a'lepang a'lol a'taain ho a'raham.
YOHANIS ADA MAHEN TAHOW JEMAAT BANG ITITO ASIA A'RAHAM.
4
Yohanie amang pa', med jemaat bang itito Asia mi ho araham.
Untu fetang i'raham sariho Sa A'ra, Sa A'ra am, honin di Sa foil Ho' so; honindi hamoi bolang itito A'pong emele bolang ho mi,
5
e med Kristus Yesus, som abul puin usaka, horo o a' ainag sofetang name min tofang anai homi honidi afen airnu pali' mate ta ho u meng. Sa'ri horo, piri u'karang honindi pi doc a'hal ho Sa so fui tepuin hafo',
6
Sa tano' lubung matenu, e Omang Lahtal odor bu'ang, honidi O' amalang ei inung ho sam em so em ho ameng! so atino.*
7
I'edun, Yesus tafiing bo' taho', honin e name tofang efail ta A'hol, honindi name ba A'ri te' amine di; honindi bang airnu pali' ho'o ta ho A'ri upe' bang. Ya, sari ho'o uil-uil mimeng! So Atino'.
8
"Nari horo O' A ainang e med o amujmi, Tuhan Lahtal amang pa' Sa Ara, Sa Ara am, sam Sa foil Sabor ho, Horo o Amalang Mate."
YOHANIS NAMENO' AI AHOL
9
Nari, ho'o Yohanes, i'di a'il i'raham mahip ma'ar a'hol, lubung mate mi, honin bo' na mang abul puin Yesus om mi, ara pali' nu ba name ubang Patmos fede' Lahtal amang pa' e Yesus usaka ei.
10
Hamoi bolang nari boloil* Tuhan o hair mi, honin e Yesus amamg pa' lel-lel namot mi amang mang fede' huling mate honin,
11
sa ubang, "Nabafe a a'hol am ho a'hul med sura' mi honin e tahow med jemaat itito: Efesus, Smirna, pergamus, Tiatira, Sardis, Filadelfia, med Laodikia en."
12
Horo, nana mot mi dun name ba nara mateng eh ho edun. Nana dimang dun he'e, falofang hid ludung sel itito,
13
ludung sel itito o anai nu ho, nadun he'e namenu ho mang fede' Nameno' Ai honi,* fen lai sam e'fa lahel hupuin honindi falofag hid sanai ho A' del talil.
14
Elafung e lafung ari nemang ho afel nub beng honi, afel tafiing honin; e'fail ho huring mang fede' afail huring eh honin.
15
E'fa ho lel mang fede' lahang afail om mi fail eh honin e A'mang pa' ho mang fede' sei lafoh honi.
16
Atang tani mi ho, Sa ibing itito puin, At om ho ne' ar amu' di huding ho At om lol hel, A'pong A'dang ne' ho lel mang fede' fed mate dang honi.
17
Ho araham nadun A'hol he'e, na ol E' fa sel lehel mang fede' name min am honin. Honin sobo, Sa satang a'ra nari tameng Sa u'bang ho, "Haai baroic e; Nari horo o A'ainang he o A'muj mi,
18
emed Fetang Asel. Na min amso, honi sobo a edun Na no fetang sam so em ameng, Na min he lafopana o kunci puin.
19
Honinfe, nabafe a' a'hol am ho hul, emed nabaso sel fed ho'o mi ara amed oba mong sel o amuj mi ara.
20
Ho natafuning fa ibing itito Na'tang om mi ba a' a'hol emed falofang hid ludung itito ho. Ibing itito ho jemaat itito ho o malaikat; honidi falofang hid ludung itito ho jemaat itito."