HALOW O'SURA O'ASEL MATE TOW MI
1
"Med, malaikat jumaat Sardis mi na ho' hul:
Ho'oro Aiba Lahtal o' Roh itito* med ibing pa' itito ara abungho o' mateng:
Na ipanen aten ernu Na ahol. Name ubang ifetang, honi sobo o'abul ho imin.
2
Iri bu'ang, an tofangba edai minam sobo dai ara eh ho, ano' kufa' fede' ikaresangho, Lahtal araham homi no' hamam, sobo Na e' ahol dai.
3
Honife, nabafe ialepang medam, sariho alol ataain med iom afom! Mang fede' ibu'ang nene, Na ho' mang fede' name na ta'u honi, med Na ho' od den i e ahol nene.
4
Honi sobo, iei name oinu mong Sardismi supi sofendi e ano' kome dai; supi fen afel puin Nara lame fede' Na uinung.
5
Name tahang toh fen afel puin med supi ani Sura' Fetang mi Na e' luh nene. Na Nimang med O'malaikat tofang araham mi aniho o'atino' ubang.
6
Aiba afel araho, sei honi sa nabafe Roh ubang jumaat ara matengho, saridi ma'eh alepang."
SURA' TAHOW JUMAAT FILADELFIA MI EN
7
"Med, malaikat jumaat Filadelfia mi na ho' hul:
Sari Ho'oroba Bolang, Abul, Daud o'kunci puin,* sa during name nudi utel sah; sa utel name nudi during sah:
8
I panen aten Na ahol. Edun, Na sear during iere'engam, name nudi telsah fede' iei kufa' kaai, sobo No fom pa' i ataain, med Nani i e ukalufe nene.
9
Edun, Setang o' aome bang Na panen araham, supiba ubang Yahudi hinung, sobo e' abul nene, supi aba, Na supi akala sa supi ma i'e'fa selmi fa'ur muding, panen supi ahol Na iri ukarang.
10
Fede' No fom pa' dume i ugariang, Na iri gariang mong sel sah karang ba ho' pali' mate ta, puin name pali' mate ta apate om homi.
11
Na hano'ang ho'. Naba a'ra ibungho apuin dume, honie sa name nudi ohid mate med e'.
12
Aiba tahang toh, Na ano' No Lahtal O'bang om Bolangho o' ludung matu, med sa homi hel lame neneam; Na No Lahtal ani med No Lahtal O' bang bolang sari ho Yerusalem med ari tahul, sariho tong No Lahtal sorgami abung hel, med Nani habar om mi.
13
Aiba, afel araho, seihonie, nabaso Roh ubang jumaat ara mateng he'e, saridi ma'eh alepang."
SURA TAHOW JUMAAT LAODIKIA MI HO EN
14
"Med, malaikat jumaat Laodikia mi na ho hul: Ho'oro ta ahol ta ma'eh, med mulang ernu turlo Lahtal atenho o'aainang, sariho so atino' o' matengpa':
15
Ipanen aten Na ahol, sariho imaab nene soeme bune. O' mino'ho imaab aai he'e bune.
16
Fede', i pan-pan honife, e'bune nene soeme maab, Na iri puin uj Nat om lol hel.
17
Fede' iubangho, 'Na kafac, tofang lu'ung, nanudi e' kurang bo' nene,' sobo i e' ahol nene sariho o'abulta he'e iriho fasah masah, sah lahal, ieng sah med a'boi tang oh.
18
Na ifom honi Nabung masfel, masho afail puin ano' mas a'bulam honie ikafac, Nabung fen afel-afel fel honie itew puin, honie ihaai mala maniang ahol e' fede' name e' i a'boi ahol neneam, med ie'fail ho dafang mi, honie idun na ahol.
19
Supi Na ukarang, Na beh, Na e'hap; honife iom abole, iom afom!
20
Edun! Na se'ar mitoh se'ar a'faw eh. Mang fede' nameden Namang ma'eh so se'ar during, Namid olap mid, honie sari med Nari, ni ham-ham mih na'de.
21
Aiba tahang toh ho, Na u inung sa Nara ham-ham No kadere mate tamih, mang fede' Na tahang toh, no' Na Nimang ara ham-ham o' kadere mate tamih honi.
22
Aiba a'fel araho, nabafe Roh ubang jumaat ernu ara mateng saridi ma'eh alepang."