¹ O' ataain, Yesus So sakola pir ernu faling alo o'lofe, malang mate med kufa ara supi en, honie puin roh sah ernu aralil, puin mode ano' suhuin. ² Sa supi ahow sam Lahtal O'bang Bolang umateng, ano' no'. ³ Sa ubangho, "Isam sobo itang oh, dopang di puin e', tas, roti, seng, kod pa'alo, honi nunho ipuin nene. ⁴ Isam bang taro miam, homi mih tar sam ifoil eleme homi helsam. ⁵ Supi oba iri medho usaain, pali'ho imed olmeng, ie'fa o'maru tote a'no' uma ma honi med supi en." ⁶ No' horo he'e, sakola aibar sam bang arian pali' arian Sura' habar umateng, med name mode taro taromi supi ano' birang. YESUS EI ARAHAMHO, HERODES OMUPIR ⁷ Herodes, pali' molho o'afen, natofagba ara latelam ho sa ma eh, horo he'e, omupir, fede' name den ubangho, Yohanis name a'foil eh ho, name min anai mi sofetangam, ⁸ den ubangho Elia foil ho' am, den ubangho, nabi tofang zamang turmi, nu sofetangam. ⁹ Herodes ubangho, "Yohanisho Na a'fa medam. Honife, Ai taro soba na o' hamoi maeh ba o'rupa hooni?" Horo, Herodes om sa ho' Yesus a'holfe omuma o'sah. NAME PIR RIB IFIHING O' NAMEJ ¹⁰ Sakola aibar sabor ho', na an anba supi panenam ho, supi u Yesus a'ramateng, no' Sa supi a'dail honie supi sam bang ani Betsaida holeam. ¹¹ Honi sobo, name tofang ahol horo, name tofang hodi supi ataain. Horo Yesus supi med, no' he'e Lahtal O'bang Bolang usupi a'ramateng, no' he'e o'mode ho, sa ano' birang. ¹² Dil dele paka, Yesus o'sakola aibar ho' A'bung a'ramateng, "Name tofang ho' ahow sam bangba ara pali' ho' abungho lap, mitar mi na'de, fede' pali' ho' pali' oh." ¹³ Sobo, Yesus supi a'ramateng, "Iriso supi ah." Sakola aibar ubangho, "Ni ab pa'alo, roti pa'ifing puin, honife ni sam namej felta puin name ho' ah hee no'." ¹⁴ Sari homi name lotebarso maa pir rib ifing. Yesus sakola aibar a'ramateng, "Supi ahow sabaang mih, baang nu hee pir erifing." ¹⁵ Horo he'e sakola aibar nameho ahow mih, mang fede' Yesus ubang eh honi. ¹⁶ No' Yesus roti pa'ifihing ab pa'alo ho med, saburang edun, tofang luung bang, Sa a'hid a'kalung med sakola aibar en, supi ahow med nameho en ade. ¹⁷ Supi barpi na'de sam a'to' in. No' o' ameh ho ta'unung he'e la atang ernu faling alo afeng. PETRUS O' A'TINO' BIT, YESUS HORO KRISTUS ¹⁸ Minumi, Yesus solo aome eh, sobo O'sakola aibar A'ra. No' Sa supi atan, "Name tofang ei ataain honi hee, Nariho ano?" ¹⁹ Supi ubangho, "Yohanis name afoil ei, den ubang Elia, den ubang Ariho nabi nun zamang turmi ei namenu sofetangam." ²⁰ No', Yesus supi a'ramateng, "Sobo, iei ataain, Nari hoo ano?" Petrus ubangho, "Ari horoba Kristus, Lahtal mi ho'." ²¹ Sobo, Yesus supi a'ramateng ahow nauma, honie sarinaho ano horodi ubang en ma eh nene. YESUS SOMIN UMATENG ²² O' ataain Yesus ubangho, "Nameno' Ai sa maar mahip tofang ahol, tumo' ernu, imam o'kapal ernu, med Taurat o'name omhul ernu apang Ari usah, name beh bahut, no' hee amine, sobo tareng tow Sa sofetang." ²³ Yesus supi barpi a'ramateng, "Mang fede' namenu Nataain omuma, sa uil-uil sara kalufe, tabang ba' tefang sel tenaap, honiamfe Na taain. ²⁴ Fede', ano horo se'bur lap sa o'aeng so ara eh, honi he'e o'aeng suhuin. Sobo, anoso o'aeng suhuin Naraham, honi he'e o'aeng il luling mimuj. ²⁵ Mang fede' namenu sa pali' mate hoo uaneng barpi', sobo samin eme o'aeng suhuin, o' untu ma' naba? ²⁶ Nameba Nari med Nomatengpa' umala, honi he'e selnumi Nameno Ai lel mate ommi ho' honi he'e Sa aiho o'atino' bit Sa umala umaniang. ²⁷ Na o'abul u i'ramateng, name pinu aloara iham hoo mitufeh, supi Lahtal O'bang Bolang a'hol dai, honi hee supi emin dai." YESUS, MUSA MED ELIA, HAM-HAM SARA EH ²⁸ Yesus Sa somateng pa' nun umateng no', maa mitareng turlo he'e, Sa Petrus, Yohanes med Yakobus a'dail doita mid aome. ²⁹ Yesus aome eh honi he'e, Apongfa' foil bengnu, O'fenho afel huring. ³⁰ O' ataain, dun he'e, name alo Ara mateng eh. Name piraloho, Musa med Elia, ³¹ lel mate mi sari petang Yesus ara o'minho ubang eh, maa ano' anfeho tong Yerusalem mi. ³² Selho araham, Petrus med o'diailbarho e'fail nop empir, sobo supi lel no' dun he'e, Yesus lel mate om mi, name piralo A'ra ham-ham tufeh. ³³ Musa med Elia mang lame Yesus elet he'e, Petrus ubangho, "Guru, Pi sei hooromi. Ni hob tow panen, nu E'i, nu Musa ei, nu Elia ei." Honi sobo, Petrus sanabafe ubang eh sa e' ahol nene. ³⁴ Petrus sarinaho biteh hee, tafiing hel supi baloil, horofe Petrus, Yohanes med Yakobus tafiing om homi baroc empir. ³⁵ No' name amangpa' tafiing om mi ubangho, "Hooro No Ai, Sari horo Natara', Ari alepang." ³⁶ Name amangpa'ho aai hee, supi ahol Yesus solo'le. Supi naho tafuning, nabafe supi aholamho, namenudi supi uaramateng nene. AI KAAI LOTENU ROH SAH TAMANGHO IL LULING MED ³⁷ Midilel supi doitahel hee, name tofang Yesus o'lap ho'. ³⁸ Namenu tofang anai homi lofe, "Guru, na abang, no ai ho' edunfe, fede' sarihoo no ai pirnu'le so. ³⁹ Edun, roh sah ari tamang, esese he'e sa beat. Roh sah ho ari adang a'feng, sei masing, at farabai her, sa ano' maar adsah. ⁴⁰ Na O'sakola aibar abang, supi ahow aralil sobo supi panen sah." ⁴¹ Yesus ubangho, "Hoi, iri o' atino' bit nene med se ahal! Na iralame, iratoh, bala amone iraham o' lafang denfe? O aiho ara ho' lema." ⁴² Aikaho mangma Yesus abung hee, roh sah ari med faai ba', ari adang afefa'. Sobo, Yesus roh sah ho a'siud, Sa aikaho ano' birang, med omang ona en. YESUS SOMIN UMATENG ⁴³ Name barpi Lahtal o' kufa' usahoir, sobo nabafe Yesus panen supi dai usahoir eh he'e, Sa So sakola aibar a'ramateng, ⁴⁴ "No mateng hoo, ualepang no' no': Nameno' Ai ho maa alorang med nameno' atang mi." ⁴⁵ Honi sobo mateng pa' ho, sakola aibar o'lel ahol nene, med naho natafuning honie supi e' pahang nene. Sobo, supi Yesus atan o'lel utaain supi baroc. ANOSO SO MI MID ⁴⁶ Selnumi, Yesus o'sakola aibar sara tutul, sariho anoso supi anai homi maa somimidho ei araham. ⁴⁷ Sobo, Yesus supi o'tanut ahol, no' Sa ai kaainu ahow Sa'tote mitoh. ⁴⁸ No', Sa sosakola aibar a'ramateng, "Nameba Nei Nanife om mi aikaai hoo apang uno' honi he'e, Naridi apang uno', Med, anoso apang Nari uno' honi he'e, Aiba Nahow ho' hodi, sari aiho apang uno'. Fede', o'sah bi' inai homi, sari horo somimid." SARI HODI HAM ⁴⁹ Yohanis ubangho, "Guru, ainu Ani puin roh sah atetel ni ahol, ni ahow sono' fede' sariho e tara taan nene." ⁵⁰ Sobo, Yesus a'ramateng, "Haai ahow sono' e', fede', ano horo e iri lafang nene, honi he'e sa ieita." YESUS MONG SAMARIA MI NAME SAKING ⁵¹ Yesus ano' lafining o'sel fanang, Sa som ano' dume, Sa Yerusalem leam. ⁵² Sa soname oinu ahow sotur. No', O' nameho sam pali' ani Samaria homi, naernu utaro' med E'reeng. ⁵³ Sobo, nameba pali' homi supi Yesus medfeho usaking, fede' Sa lame Yerusalem leam. ⁵⁴ Yesus o' sakola sariho, Yohanes med Yakobus sarinaho ahol, supi ubangho, "Tuhan, ni uparenta honie sa afail burang tahel nameho ano' fail tipung A uinung?" ⁵⁵ Sobo, Yesus sadimang samot midun supi e'hap. ⁵⁶ No' horo, Yesus med O'sakola aibar sam beng leam. NAME YESUS ATAAINHO O' KARAK ⁵⁷ Supi selai lol omhomi, namenu Yesus ara mateng, "A mang tarofe lol sam so he'e, naridi A'taain." ⁵⁸ Yesus a'ramateng, "Binanta o'leng baun ara samitar, hiw lelang ernu o'barang ara samitar. Honi sobo, Nameno' Aiho eleme sa mimih mitarfeho, e' ara nene." ⁵⁹ Yesus name beng nu a'ramateng, "Ma Nataain!" Sobo, aiho ubang, "Tuhan, na Abang honie nasam nimang apot soturfe." ⁶⁰ Sobo, Yesus aramateng, "Seihoni sa name min supi ei name minho apot, sobo ariho sam Lahtal O'bang umateng." ⁶¹ No', namenu foil Ara mateng, "Tuhan, na Ataain sobo, nadai sam nife nimang, nodi' nomatu, e'maringfe." ⁶² Yesus ara mateng, "Anoso satang bingku potang apuin am sobo sadimang samot midun, Lahtal O'bang bolang samed nene."