¹ No' he'e Yesus Sa name beng nunba Ataainamho, pir eritito Sa utub, piralo ahow sotur sam bang pali' ba Saleamfeho leam. ² Sa supi a'ramateng, "Na afail hor lap eiho tofang, sobo, name ukaresang eiho kurang'le. Honife, o'aneng abang na afail ho bang, honie i naafail ho ta'unung." ³ "Lame! Na ihow sam, mangfede' nub ainu honi, mong binanta a riing o'ham leam honi. ⁴ Ihaai seng puin nene, tas, sendal haai puin. Sam seham name ahol he'e, ara amang nene, poram. ⁵ Isam bang taro lemid, honi he'e aaing, 'No'ham bit bangho araham.' ⁶ Mang fede' nameba ara bang homi ukarang e'sah ara, honi he'e, iei ukarang e'sah ara supita. Honi sobo aai, iei ukarang esah sabor iolapho'. ⁷ Ibang ho mimih mitar. Nabafe supi usadia med iereeng, ade na, fede name karesangho, o'abor samed. Haai sam bangnumi, ho' bangnumi e' ⁸ Isam bang numie, name homi iri ubad, naba mejso supi iraham a'mihing hee ade. ⁹ Name mode ernu homi, i ano' birang, no' supi ara mateng, 'Sorga Bang ara ibungam.' ¹⁰ Sobo mangfede' isam bang numi name iri ubad nene honi he'e, sam bangho o'se'bur ariane mateng, ¹¹ 'O' mitata i ubangho, ibang ipali' o' maru nie'fa abir ho'o, ni tote par med ina ien. Honi sobo, uma! Sorga Bang ara fanang.' ¹² Na iramateng: Selho araham, Sodom o'tarofe mifilung, supi eiho somi tarofe." NAMEBA YESUS USAKINGHO SA NAUMA ¹³ "Khorazim med Betsaida, sah karang iraham! Mangfede' natahoir ham mong Tirus med Sidon mi Napanenho, supi som a'fom, honi he'e supi fen laan puin hel maru mimih. ¹⁴ Honi sobo, hi' timba o' selmi, Tirus med Sidon ei tarofe mifilung, ieiho somi tarofe. ¹⁵ Med iri Kapernaum, maa name itel sorga leam? Aai, iriho name few pong name min o' pali' ta am! ¹⁶ Ano horo iei alepang, Naridi supi ualepang. Honi sobo, anoso iri bahut, Naridi sa Nari bahut. Med, anoso Nari bahut, Aiba unahow hodi sa bahut." YESUS O' ATAAIN NUNHO, SETANG ERNU LI' EFAR ¹⁷ Horo he'e, Yesus o' name ataain pir erititoho, bad herang puin sabor, supi ubangho, "Tuhan, Ei Ani om mi, setang tofang li' niefar." ¹⁸ Yesus supi a'ramateng, "Nadun he'e, setang burangta muj hel mangfede' laai muj honi. ¹⁹ I ahol, sariho, kufa Na ien, honie puin mon tatoh, puin pail tatoh, med ifalefang tofang ei kufa'ho, ipuin abade. Den e ino' maar neneam. ²⁰ Honi sobo, roh sah tofang li' iefaramho i ubad nene, sobo ibad herang fede' iei ianiho tong sorgami hulam." YESUS AOME SOMANG EN ²¹ Selhomi, Yesusdi Sa Roh om mi bad herang o'sah, Sa ubangho, "Nimang burang aneng faai aeng, Na ono' ubang, fede' na an an hoo, A med name om'ra dil maeh el tafuning. Honi sobo, Amed ai teten etub. Nimang, Eng adangmi sari hooro A uinung. ²² Nimang, na an an, Amed Nenam, no' he'e namenudi e' Ai ahol nene, seilal Omang. Med namenudi e' Omang ahol nene, seilalho Ai, med nameba Ai uinung honie usupi aramateng." ²³ No' Yesus So sakola aibar edun a'ramateng, "Nabafe idun aholam ho, e'fail taroso dun ahol, honi hee bad herang med, ²⁴ fede' Na iramateng: nabi tofang med afen ernu om dun ahol uma sobo dun ahol nene. Supi om alepang uma, sobo ma eh nene." SAMARIA O'NAME OM NO' ²⁵ O' ataain, Taurat sura' o' name omhul nu sahirtoh Yesus pate ubangho, "Guru, nabafe na panen honife na fetang so em med?" ²⁶ Yesus ei abor ubangho, "Nabaso sura' Taurat om mihul ol meng? Itaan nabaso ara om mi eh?" ²⁷ Aiho o' abor ubangho, "O Lahtal a ukarang, om pirnu puin, olaman sobarpi, o kufa, med o'panen aten sobarpi. Med nameno ernu ukarang mangfede' a obo' ukarang eh honi." ²⁸ Yesus aramateng, "A Nei aborho abul. Horo panen honie fetang med." ²⁹ Sobo aiho so abul lap, sa Yesus aramateng, "Ano horo nei nameno?" ³⁰ Yesus ei abor ubangho, "Ainu Yerusalem mihel Yeriko lehel, sasam name tot kalaping at mitoh, name o'fen utot med, name beh edai min med homi ol menge samam. ³¹ Seh seh hee, imam nu se'burho lol ho'. Sadun aiho ahol horo hee, sa e'dun nene, salidamang se'di beng lol samam. ³² Lewi ei namenudi honi, sadun aiho ahol horo hee, sa e'horang se'di beng lol samam. ³³ Honi sobo, Samaria o' namenudi se'burho lol ho'. Sa mang dun aiho ahol he'e, om e'sah empir. ³⁴ Horo hee Samaria o'nameho ma a'bung, o'bamed nunho dafan. Sa dafang miluh, sa aramid so keledai ta, sa arasam bangnumi, sa udafang utarubing. ³⁵ Midilel, Samaria o' nameho seng dinar alo med bang aneng en, sa ubangho, 'Ai bamed hoo dafan. Seng den a a'no' oh med aihoo ereeng hee, nanaborfe na elemi mi."' ³⁶ No' Yesus ubangho, "Ei ataain he'e, name pirtow o' anai homi, anoso sano' nameno ham ham med aiba name tot kalaping beh ho araham?" ³⁷ Taurat o'name omhul ubangho, "Nameba aiho ukarang horo." No' Yesus ubangho, "Sam honie sarina horo panen." MARIA MED MARTA ³⁸ Yesus med o sakola aibar supi seham lame eh hee, Yesus sam bang numi, ai obnu ani Marta, sa Yesus ubad arasam sobangmi. ³⁹ Marta o' diail ob ani Mariaho, sa Yesus e'fa abung ho mimih, Yesus o'fompa' ho ualepang. ⁴⁰ Sobo Martaho tabubul empir, na ernu ukaresang sa no'fe. Marta ma Yesus abung aramateng, "Tuhan, taro'nife no diailobho A mang edun nariso nanun hoo barpi ukaresang? Ahow sa neita feho!" ⁴¹ Sobo Yesus ubangho, "Marta, Marta, ariho natofang omupir honie elafung med apongfa' umaar. ⁴² Seilal baang nu solo mi atino'. Maria sei baang omino' medam, no hee, ei baangho name aputang med sah."