¹ Selnumi, Yesus eleme numi aome. Sa aome no' hee, o'sakola ainu A'ramateng, "Tuhan, aome uira sakola, mangfede' Yohanes so sakola aibar ara sakola honife." ² No' Yesus supi aramateng, "I aome honi hee, ubang hooni: 'Nimang, Aniho ano' bolang. O'parenta Bang ho' eham. ³ Na'de seina A utaro' ano'an med nien sel a'rian, ⁴ med ni doc ernu A uampo honie name panen ahal niraham ni uampo. Haai nira sah karang lefa e'."' BANG, LAP, MED A'FAW ⁵ No' Yesus supi ara mateng, "Mangfede' iriho itenang elnu ara, no' hee tunham lalaham isam itenang elho o'bang mi, i aramateng , 'tenang el, na o roti pa' tow tupingfe, ⁶ Fede' no tenang elnu seham lame ho' nobangmi erambo, naden na a'no' mej med araham eiho so aai.' ⁷ O' tenang el maa sa bang om mi ubangho, 'Nareko' e! Na se ar utelam, No aibar ara nitaram. Na toh naden med ensah.' ⁸ Na ira mateng, masiki otenang el etoh naden en nene fede' ari o' tenang el, sobo i abang sei masing, sa uil toh nabafe ibang sa med ien. ⁹ Honife, Na iramateng, Bangfe imed. Lapfe ahol, afawfe se'ar during iereeng. ¹⁰ Fede' anoso bang sa med. Anoso lap sa ahol. Med anoso a'faw, se'ar sari during e'reeng. ¹¹ Inai homi omang taroso o'ai ab bang sa mon med en? ¹² Eme o'ai hiwdo bange sa pail ariing med en? ¹³ Mang fede' iriho ariing fail o'name, sobo i ahol nano'ba taro' ni horo, imed iaibar en, nabafe Imang tong sorgami. Nameba abangho Sa Roh bolang med en." YESUS SA LAHTAL O'TUTUNG KUFA' PUIN ¹⁴ Selnumi, Yesus aika lote amang sahnu o'setang atetel. Setangho mang hel teeng hee, aika amangsah ho mateng no', horo hee name tofang sahoir. ¹⁵ Sobo, name ainu ubangho, "Setang o'kapal Beelzebul horo o' kufa' puin setang atetel so." ¹⁶ Name oinu om Yesus apate, supi Yesus abange Sa sorga o' utubnu med supi e'tub. ¹⁷ Sobo, Yesus supi o' tanut ahol Sa ubangho, "Bang nu sabaange sari mimuj, honi hee tari' tabite. Med Bang om numi, o' name sara sah, honi hee tabite. ¹⁸ Honife mangfede' setangdi sabange sari lafang, honi hee supi ei bang lelangho maa tahang toh eme aai? Na ubang hooni fede' iubangho, Na Beelzebul o' kufa' puin setang atetel. ¹⁹ Mang fede Na setang atetelho Beelzebul puin, ho hee i aibarho ano o' kufa' puin supi atetel? Honife supi horo i hu' botang puin, med i dasing ap puin. ²⁰ Honi sobo, mangfede' Na Lahtal ei tutung kufa' puin setang tofang atetel, honi hee, Lahtal O' Parenta Bang iolap ho'am. ²¹ Mang fede' name kufa'nu nei balep puin sobang sona buang, honi hee, o' kafac tofangho tining talaj om mi. ²² Sobo mang fede', namenu somi kufa' emota ho' ari lafang ano' bol, honi hee, aiba somi kufa'ho, sa o'balep udumeho sa utot med, no' hee o'naernuba sa utot med sadalam. ²³ Anoso e'ara No lang om mi nene, sa Nari lafang. Med anoso Nara abuil taunung nene, sari horofe a'bite a'dakang." ROH SAH SABOR ²⁴ "Mang fede' roh sah namenu om mihel, roh ho lame ipeh mideh, eleme taat tofang lap a'no' so airlah sobo lap sam aai. Horo sa ubangho, 'Na nabor sam bangba na ad lufangam ho leam.' ²⁵ Sasabor ho' honi hee, bangho name parin bolang, utaro o'rupa. ²⁶ Horo, roh sah ho sam roh mi a'riing pir itito adail honie sui ho' bangho lemid mimih mitar, horo hee sari aiho o'panen aten foil misah mong aainang e'mota." NAME TOFANG APANGNO' ²⁷ Yesus mateng hoo ubang hee, ai obnu mong name o'ham ham mi beat ubangho, "Ai lafengba Amitarho untu ada araham, med toba Anahodi untu ada araham." ²⁸ Sobo, Yesus ubangho, "Nameno ernuba Lahtal o'fom pa' alepange alol panen, horofe untu ada araham." YUNUS EI UTUB ²⁹ Selnumi name tofang taunung mang tofangta, Yesus ubangho, "Fangnu hoo ariing fail o' name; supi o' utub nu bang, sobo utub med supi e tub feho, pa'nudi aai, seilalho Yunus ei utub. ³⁰ Mang fede' Yunusho sano' utub med Niniwe hinung e'reeng, Nameno' Ai hodi sano' utub med supi ereeng. ³¹ "Pali' butung o'selmi, Afen ob pong Fiing mi sahir toh name fed ho' ara, sa supi hukung fede' sa pali' o'tapor miho' honie Salomo ei na' hol dil ma eh ho alepang, sobo nameba somi mate Salomo e'mota nu ara hoomi. ³² Pali' butung o'selmi hee, Niniwe hinung sahir toh name fangnu ho' ara honie supi hukung, fede' Niniwe hinung som afom, ho a'raham Yunus fom pa' supi apong adangmi umateng, sobo namenu somi mate Yunus e'mota ara hoomi." TE'FAIL HO BO' MATE O'LEL ³³ "Mang ano horodi, sa lampu tubam hee, sa e'tafuning nene, eme sa e naden med a'telang nene. Sobo, supi med lampu e'fa ta amihing, honie sa name ho' madong dun o'lel ahol. ³⁴ Te' fail ho, bo' mateho lampu. Mang fede' e'fail no', bo' mateho barpi lel. Sobo e'fail sah, bo'mate barpi paka. ³⁵ Honife uma no'no', honie lel o'bo' miho paka e'. ³⁶ Mangfede bo' mate lel barpi den e'paka nene, obo' mateho lel amuj mangfede lampunu so lel med o a'lel ehoni." YESUS SA FARISI HINUNG MED TAURAT O'NAME OM HUL E'HAP ³⁷ Yesus mateng no' honi hee', Farisi o'namena a'dail na'de. Sa ho' mih na'de. ³⁸ Sobo, name Farisiho sahoir, asel Yesus na'deho satang lam nene. ³⁹ Sobo, Tuhan a'ramateng, "Farisi hinungba ari honiho, supi sang kere med ping o' amot fe ano' bolang; sobo i o' mateho maro' makakang med ariing fail so afeng. ⁴⁰ Hoi, name bodo ernu! Aiba amot aten horo omdi atenem aai? ⁴¹ Honife, nabaso ara obo' mi hee, dalam ano' ei ukarang. Honiesa, i atitino' bolang. ⁴² Honi sobo, iri Farisi hinung, sah karang iraham! Fede', i te' muding ernu i pite' habuden med Lahtal en, sobo Lahtal o' abul-abul med o' ukarangho isibung. O'abul taho, na an anho i barpi panen den sibung nene. ⁴³ Iri Farisi hinung, sah karang iraham fede' aome beng mi hee, mih eleme no'fe ilap, don om mi hee, ada aholfe ilap teeng. ⁴⁴ Sah karang iraham fede' iriho mang fede' lafo dul mate name tatoh talame honi." ⁴⁵ No' Taurat o' name omhul nu Yesus a'ramateng, "Guru, A nahoo ubangho, A niridi niebit nieng el." ⁴⁶ Sobo Yesus ubangho, "Hoi, iriba Taurat o' name omhul nun, iridi sah karang iraham! Fede', natarofe inamebeng ahow tefang, sobo itang pa' pa'nudi e' natarofeho a'tor nene. ⁴⁷ Sah karang iraham fede, nabi ernu ibap bale amineho i o'dere a'ten. ⁴⁸ O' mitata iname tofang aramateng ibap bale o' panenho io' atino' bit ubangho; supiso nabi tofang amine, sobo iriso o'dere a'ten. ⁴⁹ Horo eiba, Lahtal So dil maeh mi ubangho, 'Na no nabi med rasul tofang tahow supi en, sobo nameba Na tahow oinu min, med maar ahol,' ⁵⁰ honie sa nabi ernu o'foiba pali' mate ara honi hee taherho, supi hoomi name ataain teeng, ⁵¹ aainang Habel o'foi sam Zakharia ei foi mimeng, sari ho' Lahtal O'bang med O' hemang anai mimin. Ya, Na iramateng, supi fangnu hoo, sarina hoo fit fan, med o' mateng bit. ⁵² Hoi, Taurat o' omhul ernu, sah karang iraham! Fede i na ahol o' salo' during ei imedam, sobo i om lemid uma nene, no' hee, name beng om lemid umaho, i atelang toh." ⁵³ Yesus sari eleme homi hel, Taurat o' omhul ernu, med Farisi hinung A'ra sah, med supi taain tofang puin bal. ⁵⁴ Supi somnu honie, Yesus o' mateng pa' ernu horo puin A'puin supi omuma.