¹ Sel numi name rib taunung, sadodo ipeh mideh araham, Yesus sa so sakola aibar aainang aramateng Farisi hinung om sah i uiri buang no'no sariho kalufe ladimang. ² Fede' na tel meng uil sari during, natafuning sa uil sari during. ³ Honife, nabafe i pakami ubang honi he'e mong lelmi maeh, nabafe i kamara mi utama honi hee, bang adota ulofe uid. LAHTAL UBAROC ⁴ No tenang elbar, Na iramateng i haai nameba bo'matefe amine no' ho ubaroc e sobo sariho no'honi hee o'beng foli panen saham. ⁵ Sobo Na ino, nauma sariho, ano horofe i ubaroc Ai ba i ubarocfeho, Sa amine no hee, sa foil so kufa puin iri few lafo paka leam. Ya, Sari horofe i ubarocfe. ⁶ Seng ba oil hir pa' alo name puin hiw ani pipit pir ifihing o'fali no? Sobo sari hiwho, pirnudi Lahtal araham e'sibung nene. ⁷ O'mitata ho, ielafung ari' nemang hodi taan barpi. Haai baroc, iei faliho, hiw pipit eiho alihing. O'BA YESUS UKALUFE ANO' NAUMA ⁸ Na iramateng nameba name beng ahoimi No atino'bit, Nameno'Aidi, Lahtal o'malaikat tofang ahoimi o'atino,bit. ⁹ Honi sobo nameba namebeng ahoimi Nari ukalufe Lahatal o'malaikat tofang ahoimi Nameho ukalufe. ¹⁰ Med ano horo nanubit Nameno'Ai lafang, honi hee ampo med no, sobo ano horo Roh bolang e'bit sa ampo med nene. ¹¹ Mangfede' supi irasam aome bangmi med mate ernu ahoi mi, maa taro'nife ibo'utola, eme maa nabafe iubang honiho ihaai ubaroc. ¹² Fede selho arahamho, nabafe ibitfeho, Roh bolang uiramateng. AI KAFACNU ANO' UPAPAIN ¹³ Name tofang anaihomi namenu Yesus aramateng Guru, no diailho aramateng honie sa naernuho nara dalam. ¹⁴ Honi sobo Yesus aramateng, "Diail, anoso Natel Nano' iname ham mi?" ¹⁵ No' Yesus foil supi aramateng, maro'makakang tofang iubang no'no fede name nu ei fetangho, o'naernu tofangfe sa fetang nene. ¹⁶ No' Yesus na upapain nu med supi aramateng Ai kafac nuho, o'faai tofang o'sah, o'na'fail di lafo latel. ¹⁷ Horo aiho som mi tanut, Nabafe maa napanen? fede' No na'fail taro alap eleme aaiam. ¹⁸ No' sa ubang maa hooro Na panenfe. Na no eselnu ho a'berang ano'ho, o'mi matefe foil a'ten. Na ala nobate med beng ernutaho, nafoil med horo mitaro. ¹⁹ No' hee' Na nolaman ara mateng, Hoi, nolaman, ariho o'naernu tofang o'sah lafoh latel, taro'olap mi atun oer, ona'den oseina, oloil oasal, obad oherang. ²⁰ Sobo Lahtal aiho aramateng, Hoi, name bodo! Fed dilpaka hoo, olaman Na obo' homi med. No' o na an tofang taro' mengho maa anoso ubang? ²¹ Name na tofang taro' sobo' mate e'reengho o'rupa honi sobo Lahtal araham homi sa e kafac nene. HAAI BAROC E ²² Yesus so sakola ariabar aramateng, Honife Na iramateng ifelang haai ubaroc, naba fe maa i ade. Eme ibo'mateho ubaroc e' maa nabafe itew puin. ²³ Fede' feteng horo mi atino'sei namej emota,med bo'mate horo mi atino' few puin, fen leleng ho e'mota. ²⁴ A'fofangho e'dun e'nate' nene, hor lapdi e'nene, supi o'seldi aai, o'parahdi aai, sobo Lahtal supi o'afoil, Iriho ifali somi mate hiw leleng ernu e'mota. ²⁵ Anoso inai homi sofetang ubaroc sa sourho foil danu ta? ²⁶ Mangfede ina o'kaai hooni panen sah, naba eife nabeng tofang iu baroc? ²⁷ Bunga bakunghon e'dun, sa a'bow taro'ni. Bunga nunho e'karesang nene, e'ap baling nene, sobo Na ira mateng, Salomo kafac bung lehel, sobo safen puin ho e'teng mino' bunga honi nene. ²⁸ Banang mong dil but, fed abow, dilel few afail leam sobo, Lahtal a'lelang a'bubung, iriho maa sa e' ileleang ibubung banangho emota nene? Hoi iriba o'atino bit uhaleng meng! ²⁹ Honife, nabafe maa iade na, haai lap e'med iom ubol e. ³⁰ Fede, bang ernu pali mate ta sarina hoo lap, sobo Imang ahol sarina hoo iudume o'sah. ³¹ O'taden honi he'e, Lahtal ei bang horo sotur lap honi hee, natofang sobarpi samed ieita." SORGA EI KAFACFE TARO ³² "Hoi, taunung kaai, haai baroc, fede bang pali'ho Imang uinung med ien. ³³ Naernuba itang om miho, fail ano'oh med a'lofe ala en. Seng kadefa sah nene horofe panen iereeng, sariho kafac Sorgami, suhuin sah, name ta'u e'med nene, haliwdi e'ade nene. ³⁴ Fede' ikafac ara taromi, iomdi ara horomi. NAME BALETABA A'LOL A'TAAINHO SO KARESANG PANEN ³⁵ Honife iheng sei pec meng, ilampuho sei fail eh. ³⁶ Ino' mangfede nameba o'tuang nika o'lubung mi sabor a'danang eh honi, honie supi se ar during tuang ereeng no' mangfede tuangho ho' sear afaw. ³⁷ Name baleta nuba, o'tuang ho' honi hee a'danang eh ho untu ada med. Na iramateng, sa saheng pec, sabaleta, sa soname baleta nunho a'how mih honie na'de. Sa ma horo hee, sa supi ubaleta. ³⁸ Mangfede tuangho tun ham puin ho'soeme, dilel maehfe ho'so, saho' ahol supi panen honi, untu ada supi araham. ³⁹ Siobo iahol, mangfede bangnu o'aneng sa ahol, o'd den name ta'u obang leho, o'bang name a'berang samang edun eh nene. ⁴⁰ Honife iridi uil-uil buang no'no', fede nameno Ai o'ho' maho i ahol nene. ⁴¹ No Petrus Atan, "Tuhan, upapain ba ubanghoo, nilo nien soeme, nameno' sobarpi?" ⁴² Yesus ubangho, Name baleta o'kapal taroso a'lol ataain med om no, o'tuang udume, a'how name baleta beng e'dun, o'selmi hee sa supi ah a'foil? ⁴³ Sari aiho untu ada araham, fede o'tuang ho' honi hee, sabaleta ano' lame eh. ⁴⁴ Na iramateng, so atino' tuang aiho foil med a'how sona ernu barpi buang. ⁴⁵ Sobo name baleta som mi ubang, No tuang e'hano ang ho' nene, horo hee sa name baleta beng mi ob mi lote sa beh par, no' sa na'de seina sam tabur labow, ⁴⁶ tuang ho' o'sel ahol nene, ai hodi shol nene, tuang aiho amine med name a'lol a'taain nene ho o'ad. ⁴⁷ Name baletanu sa so tuang ei omuma ho ahol sobo, sa ubang nene soeme o'tuang ei inung sapanen nene, beh par tofang med. ⁴⁸ Sobo name baletaba so tuang ei inung ahol nene, sobo nabafe tuang om araham horo sa panen, beh par o'mikutrang le' sa med. Name o'ba med mi tofang, name bang di tofang, Nameba med mi alihing, name bang di mi alihing. YESUS A'BAANG PANEN ⁴⁹ Na ho' hoo afail med pali mate tafew e'ho med Na udume afail ho failam. ⁵⁰ Honi sobo sei tuling tow ara Na a'laife, med Na ualepang nadingbut sam naho so ano'an. ⁵¹ I ukuru Na ho' bad herang fito' ho pali mate taho? Aai, Na ira mateng, a'bite a'dakangfe Na fit ho! Name pirtow, alo lafang, name piralo, tow lafang. ⁵² Fed ho'mi, name pir ifihing bangom nuho a'baang. ⁵³ Supi a'baang Omang so ai lote lafang, ai lote somang lafang. O'fo so ai ob lafang, med ai ob sofo lafang. o'ai lote o'ob solote ofo lafang, o'ai ob o'lote so ob o'fo lafang. ZAMANG UTEP ⁵⁴ No' Yesus name tofangho a'ramateng idunfe, tafiing fed muj mi tapah mate am, iubangho, noi her eham, med noi atino soher. ⁵⁵ I ualepang fe hamoi pong tang a'raham mitoham, i ubang ho selfed hoo, fed bune empir, honie sari naho atitino' ara. ⁵⁶ Iriba aba kalufe o'name! burang med pali mate o'asala itep no'sobo, naba eife Zamang hoo itep sah? ⁵⁷ "Naba eife na o'abulho e'uinung nene? ⁵⁸ Mangfede inameba iom e'riing ho, ara ham-ham sam parenta o'name olap sah, seham lame eh ho, iom salahain ho ara ubang ano tining honie sa haai iri med para kara hu o'name en, no'hee, para kara hu o'name iri so ubang en, no'hee o'buang iri med sapiri sear buang en, sapiri sear buang iri few sapiri leam e. ⁵⁹ Na ira mateng, ituping e'name oh dai, name hemomi iad dai.