¹ Mi'dillel Yesus bang mate med bang kaai nun arian, sa sura' habar Lahtal O bang em so em ho u mateng, o sakola pir ernu faling alo di ara ham-ham, ² ob bar oinu ara, sari ob bar ho Yesus ano' birang, o ba roh sah ernu om mi ho, Sa atetel, oba mode sa ano' birang. Supi anani mi ho, Maria sariho name ubang Magdalena, ai ob Maria ho roh sah itito felang om mi sobo yesus ano' il luling. ³ Foil nu ho Yohana sariho Khuza o ob, herodes o na taro' ei, Susana med obar beng foi ta, Supi so kafac ernu horo arahel med Yesus o karasang atuei. FIN BAHITE HO SANO' OUPAPAIN ⁴ Name tofang bang arian taunung ho' Yesus olap, Yesus apapail nu puin supi aramateng: ⁵ "Name ma'ad eiy nu sam fin bahite. hoaraham sa fin bahite ho, den mong se adi lehel, name tatoh talame, hiw lelang ernu hel ade oham. ⁶ Den mong foi bung lehel ho, abow madong sobo ta'at min fede' sei a'ai. ⁷ Den mong namang bung lehel, abow madong sobo namang apec. ⁸ Fin o ameh ho muj mong fa'ai bala fa'ai no' lehel o pir ta o tofang ho pir ratnu." sari upapain ho Sa ubang sam amuj, Yesus lofe ubang ho, "sari anoso afel ara alepang, mino' alepang no'-no'!" ⁹ Mang no' he'e, Yesus osakola aibar atan upapain ho o lel uta'ain. ¹⁰ Sa ubang ho, "Iri ho Lahtal o parenta bang eiy araham ho u ira mateng am, honi sobo name beng ho, o upapain fe puin supi aramateng honie sa, 'masiki edun am sobo edun ahol nene, masiki maeh am sobo e pahang nene.'" YESUS SA FIN ANO' O UPAPAIN HO O'LEL BIT ¹¹ Ho'oro oupapain ho o lel: "Fin ho Lahtal o fom pa' ¹² Fin ba muj se adi lehel ho, supi ba Lahtal O fom pa' ho alepang am sobo, setang ho supi om mi fom pa' ho med, honie swupi e o atino' bit nene, honie il luling ho supi e med nene. ¹³ Fin ba muj foi bung lehel ho, name ba fom pa' ho u alepang, sapang no' puin med sobo alimang a'ai. Supi o atino' bit mi pane' le, sobo karang lapec ho supi arupa' araham horo he'e, supi samot Lahtal en ¹⁴ Finn ba muj namang bung lehel ho, supi ba fom pa' ho alepang, sobo supi abow mid om mi ho, tanut bol bi' supi apec, kafac supi apec, fetang no' senang supi ahol, horo he'e ohir opa' mej ho e ara supi abung nene. ¹⁵ Fin ba muj fa'ai no' lehel ho, name ba Lahtal o fompa' u alepang, med som mi meng, som abul som no' puin, opir o pa' ho udume u ab toh." O LEL HO UTUB ¹⁶ "Mang ano horo di, sa lampu ka'ai tub no' horo he'e, sa e balek puin u'dod nene, sa e med de' far amihing nene. Honi sobo sa med lampu epa' ta amihing hoinie, name bang om lemadong ho dun o lel ahol. ¹⁷ Fede' naden e tafuning nene, alel puin sah, naden e tapai pir nene, lap ahol nene, fit lel leho' sah nene. ¹⁸ Honife, edun taro'ni i ma'eh, fede' anoso med, foil en mi tofang ta. Honi sobo ano e med nene, honi he'e ara abung ho name sona med, foil o uta ho, naba fe sa utanut med fe honiho." YESUS OFO OMANG, ODI' O MATU ABUL ¹⁹ No' he'e, Yesus ofo med o diail bar ho' ahol, sobo supi ho' abung sah, fede' name tofang sari u lubung. ²⁰ Honife name emaring, "Ife med O diali bar hele luling mi tufeh, supi om A'hol uma." ²¹ Honi sobo Yesus ubang ho, "Nife med No diailbar ho supi ba Lahtal O fompa' alepang, no' he'e alol panen horo nife med no diailbar." YESUS HAMOI MATE ANO' TINING ²² Minumi, Yesus med o sakola aibar mid pelang ta, no' Sa ubang ho, 'Ma e pi tang ho lol eleme beng leam." Horo supi lame mong denle leam. ²³ sobo supi pelang ta fa tang ham he'e, yesus tar nopam. Horo, hamoi mate toh tang ho leho' supi o pelang tang om lemid, supi dele hol dalim. ²⁴ Horo he'e, sakola aibar fa Yesus olofe ahow toh, supi ubang ho, "Guru! Guru! Pi seiy min eham!" Mang horo Yesus sahirtoh, hamoi mate med bob mate ba la'ol ho' sata'ain ho eari'ing ehap. Hamoi mate ho tining med tang hodi tining. ²⁵ No' Sa supi aramateng, "I udume ara taromi?" Supi baroc empir, supi sahoir, supi sara mateng ara ip ara mid ubang ho, "ai ho ano soba ho'o? Sa hamoi mate bob mate ho, Sa parenta, hamoi bob ei ata'ain." GERSA O NEMNU ROH SAH MI IL ²⁶ no' he'e, Yesus med O sakola aibar sam Garsa hinung o pali' mong galilea o tang den mi leam. ²⁷ Yesus mang hel ta'at ta honi he'e, pali' ho o name lote nu ho' ahol, sari ai ho roh sah om tamang. Ai ho e fen puin nene lufang am no' he'e e bang di mi nene, eiy eleme ho mong dere bung fe mi. ²⁸ Sari ai ho mang dun Yesus ahol, sa beat no' he'e, sa Yesus apong adang mi sefaur muding. Sa samang bolang puin sa ubang ho, "Naba nu ara pinanglo tanai homi, hoi Yesus Lahtal ai so mi lafining? Na abang ha'ai neari'ing nefai e!" ²⁹ Sari na ho ara fede' yesus roh sah ho ahin alol sari ai ho om mi helam. setang sei aiy ho abi'ing araip aramid seiy masing horofe, name rante heiy puin nod, atang hodi name med lahung mate om mi, name buang sobo sa rante heiy ho ahi' no' he'e, setang arasam pali' oh fe mi. ³⁰ Horo he'e Yesus ai ho atan, "Ani naba so?" ai ho ubang ho, "Legion" fede' setang tofang om tamang. ³¹ Setang bungpir ho Yesus abang honie, yeswus ha'a supi ahow sam pe' sah leam ta muj min e. ³² Eleme ho mi ho, boiy bar mate nu doiy ta na'de lame eh. setang nun ho Yesus abang honie, supi boiy bar mate horo om lemid, horo Yesus di u'inung. ³³ Horo, setang nun ho, ai lote om homi hel mid boy bar mate ho om lemid, horo he'e boiy bung ho te'eng amen lol hel muj pong tang ul lehel, horo he'e hol dalim oh. ³⁴ Name boiy buang mang dun naho ahol horo he'e, supi te'eng sam sari naho u mateng bang pali' ho mipir. ³⁵ Horo name tofang sari na ba ara am ho edun. Supi ho' yesus olap ho' supi dun he'e ai ba setang om tamang ho birang am, sa Yesusa e'fa sel ho mimieh, fen puin rupa, o tanut di rupa am. sari na ho' o supi u baroc empir. ³⁶ Supi ba ho' dun ahol ho, supi sam name beng aramateng mang taro' ni fe ai setang tamang ho birang med. ³⁷ horo he'e, name ba Gerasa mi med beng ta ho supi Yesus abanghonie, yesus supi ad meng fede' baroc banibung mate ara supi afah mi. horo fe yesus mid pelang ta hunie sabor Galilea leam. ³⁸ Honi sobo ai ba setang tofang u il am ho yesus abang honie saridi Yesus ara ham-ham lame. Sobo Yesus ahow sabor, ubang ho, ³⁹ "Abor sam bang mi honie, panen aten mate ba Lahtal med araham am ho u mateng u lurung." Sari ai ho so sam pali' arian, fe naba fe Yesus panen araham ho, sa u mateng u lurung. YAIRUS O AI ANO' FETANG, MED AI OB NU ANO' BIRANG ⁴⁰ Yesus sabor ho' galilea mi he'e, name tofang ari u bad empir, fede' supi barpi adanang eh. ⁴¹ Mang homi, ainu ani Yairus ho, ho' Olap ho', sari ai ho aome bang o kapal. Sa Yesus e'fa sel mi faur muding, Yairus abang honie Yesus ho' obang leho' fe, ⁴² Fede' sa ai ob pir nu'ale, o ur ho ma' tun ernu faling alo, honie aika ob ho min eham. Yesus sam seham he'e, name tofang sari putang efading homi. ⁴³ sari homi ho, ai ob nu rac ma'eh, o fuiy tafoiy tun ernu faling alo am, no' he'e name pirnu di ano' birang sah. ⁴⁴ Ai ob ho sa Yesus amot lol sam abung, sa o kod mate o tapor ho ator, mang homi o fuiy tafoiy eh ho suhuin. ⁴⁵ Horo, Yesus u ta'ain, "Ano so nator?" Asel name tofang kalufe, Petrus ubang ho, "Guru, name tofang ta'unung Ari fading, honie sado-do ip eh mid eh sam ari tu'ei!" ⁴⁶ Sobo, Yesus ubang ho, "Namenu nator, fede' na u alepang he'e, kufa' nafah mi den helam." ⁴⁷ ai ob ho mang na ho ahol, no' he'e sa tafuning sah, horo he'e sa baroc bibil sa ma Yesus abung faur muding. Name tofang apong adang mi, sa u mateng naba eiy fe sa Yesus ator, mang no' he'e taro'ni fe sa birang ho, sa ubang. ⁴⁸ Horo he'e, Yesus aramateng, "No ai o udume ano' birang am. No' ham om fe mi puin abor." ⁴⁹ Yesus dai mateng eh he'e, namenu mong a'ome bang mi ho Yairus aramateng ubang ho, "O ai ob minam. Honi fe Guru ano' pusing e." ⁵⁰ Honi sobo, mang na ho maeh he'e, Yesus sadimang Yairus aramateng, "Ha'ai baroc e, o atino' bit honie, o ai ho no' ham ahol." ⁵¹ Ho araham Yesus sam Yairus o bang mi, name tofang ara bang om lemid Sa sa'ain, seilal ho Petrus, yohanes, Yakobus, med ai ho ofo omang. ⁵² Name tofang aika ob ho u morang, sobo Yesus ubang ho , "Ha'ai morang e, sa e min nene, sobo sa nop." ⁵³ Name tofang o asal, fede' supi ahol aika ob ho minam. ⁵⁴ Sobo Yesus aika atang ho mipuin, no' he'e o lofe, " Toh' no'ai!" ⁵⁵ Mang horo, aika o roh sabor, mang no' he'e aika sahirtoh. Yesus parenta honie, aika ho nanu med en ade. ⁵⁶ Ofo omang sahoir, sobo Yesus supi ehap honie sari na ba dun aholam ho, mang ano horo di ara mateng e.