1 Sel nu miho, hair Bolang a'raham, Yesus lame ala dil nu a'lai. Sariho a'raham, O'sakola aibar ala pa' oinu hi', supi satang puin luh ano' bolang supi ade. 2 Farisi hinung pir nu alo ta'ain, "Naba ei sofe naba hair Bolang a'raham panen e' ho i' panen?" 3 Yesus supi ei abor u'bangho, "Nabafe Daud panen ho i' e taan dai, selnu mi name ara tohuil ho malihing, 4 sariho taro'ni sa Lahtal O'bang om lemid, imam ernu o'roti sa med, rotiho sa a'de, sa den med so name ara tohuil ho en, supi roti a'de sah sei lal ho imam ernu so ade no?" 5 No he'e, Yesus Farisi hinung ho a'ramateng ubangho, "Nameno Ai' ho hair Bolang ho o' Lahtal." YESUS HAIR BOLANG OM MI NAME ANO' BIRANG 6 Hair Bolang o' a'taain, Yesus sam a o me bang mi name sakola. Sari homi ai nu di a'ra, atang ara ho moleng. 7 Taurat o'bengfal ernu med Farisi hinung, supi Yesus se'fail ta baring, supi edun ma'a Sa hair bolang homi name ano' birangem e'nene, honie sa supi o'pilang a'ra, supi Yesusho o' a'hal lap. 8 Honi sobo, Yesus supi o' tanutho a'hol. Sa ai a'tang min ho a'ramateng, "Toh fa ham mi toh." No' horo he'e, ai ho sahir toh fa ham mitoh. 9 Yesus supi a'ramateng, "Na itan fe, taro' ni horofe hair Bolang mi panen sah: no' panen eme, sah panen? A eng ano' il eme, a eng ho amine?" 10 Supi e' fadingho Sa midun no' horo he'e, Yesus aiba a'tang minho a'ramateng, "Atangho a'hir." Horo he'e, ai ho satang a'hir, horo he' a'tang no' 11 Honi sobo, Farisi hinung med Taurat o'name na' hol nun a'riing empir, supi sara gahain honie, nabafe supi ma' panen Yesus a'raham. SAKOLA PIR ERNU FALING ALO TARA' 12 Sel ho a'raham, Yesus doi tamid a o me, doi ho ta Sa a o me Lahtal a'ramateng sam dil talel. 13 Midilel lalami, Sa so sakola aibar o'lofe, supi o' anai mi, Sa pir ernu faling alo tara' sariho o' ubang he'e fompa' bit o' name: 14 Simon sobo ano' "Petrus", Andreas sariho Petrus o' diail, Yakobus, Yohanis, Filipus, Bartolomeus, 15 Matius, Tomas, Yakobus, Alfeus o' ai, Simon, o' ubangho selot o' name, 16 Yudas, Yakobus o' ai, Yudas Iskariot ba Ari failho. YESUS O' AJARAN 17 Mang no' Yesus med o' sakola nunho hel, Sa buir bo' nu mitoh. Sakola lubung mate, med name tofang Yudea pali' mi ho', Yerusalem o' name, foil med name ba Tirus med Sidon tut ta, barpi o' lap ho'. 18 Supi barpi ho' honie Yesus o' matengpa' u'alepang, med mode adi' ernu supi o' birang med. No' he'e, supiba roh sah om mi nun hodi birang bu'uin med. 19 Supi barpi se'bur lap honie Yesus a'torfe, fede' tutung kufa' Yesus mi hel ho', supi ano' birang sobarpi. 20 Yesus sakola aibar a'ramateng, "untu ada i'ri sah lahal i'raham fede' Lahtal O' bang Bolang ho' i'na. 21 Untu ada i'ri hil malihing om mi i'raham ede' selnu mi, ata'ain doro alel i' med. Untu ada iri ba fed a'hain a'fe' eh i'raham fede' selnu mi loil asal i' med. 22 Untu ada i'riba name om ita'ain, i'no sah mareh, i'ebit i'eng el, med a'ni no' ho asahain fede' Nameno' o' Ai. 23 Selnu mi sari ho'o i'holdang i'rupa', i'loil asal, bad herang, do' muj, fede' ei umung baang so mi mate ara bang Bolang mi; fede' horo eileba, supi o' bap bale nabi ernu ano' karang. 24 Honi sobo, i'ri kafac ho, sah karang i'raham, fede' fetang no ham i' medam. 25 Sah karang i'ri fedba i'to in doro alelho i'raham fede' sel nu i' hil malihing doro taat sah karang i'ri fedba asal eh ho i'raham fede' sel nu mi he'e, susa lala i' med. 26 Sah karang i'raham, mang fede' na an an o'no' name tofang bit med i' ho' mate a'raham fede' honi horoba, supi o' bap bale nabi aba kalufe ernu u'mateng." U'KARANG MED O FALEFANG A'RAHAM 27 "Honi sobo, i'riba Nei ma'eh Nei a'lepang ho, Na i'ramateng. U'karang med o falefang eme name ara sah a'raham, no' panen med name ara sah a'raham. 28 Untu ada bang med name i'futungho ta, a o me med nameba i'no' ma'ar mahip ho a'raham. 29 Name i'dung habuden mi beh he'e, i'dung habuden foil med en. Name anoso o' kod mate utot, o' kod ka'ai hodi med eita. 30 Name i'bang nabafe bang he'e i' med en, name ara i'nanu med honin he'e, i' a'ai foil bang eh. 31 Panen aten med name beng a'raham, mang fede' supi panen i'raham honi. 32 Mang fede' i' u'karang med name ba i'ri u'karang horo solo a'raham, naba tarain pa' honi horo name med i' en Fede', name doc a'hal u'karang med nameba supi u'karangho a'raham. 33 Mang fede' i' no' panen med nameba i'ri no' panen i'raham horo solo a'raham, no' em a'ai i'tarain pa' med? Fede', name doc a'hal sobo sa naho panen. 34 Mang fede' i' nanu med name en tuping, i' o'abor o'den bit, naba tarain pa' honi horo i' med? Fede', name doc di na an-an med name doc beng en tuping, o' abor o'den supi medho e' mi a'lihing nene. 35 Honi sobo, u'karang fa i' falefang a'raham, med no' ham fe panen, i' na an-an med name beng en tuping, ha ai o' uta u' pot bang. Honie sa, i' o umung mate med, no' he'e i'riho i'no' aikabar so mi Lafining, fede' Lahtal Sa no' panen med nameba mahen no' bit sah, med na sah panen hodi a'raham. 36 Honife, i'ri u'karang fa nu a'raham ma nu a'raham, mang fede' i'Mangba u'karang o' asel honi." HA AI NAME O' A'HAL LAP 37 "Ha' ai name o' a'hal lap, honie i'ridi name i' a'hal lap e. Ha'ai name hukung, honie i'ridi name ha'ai i'ri hukung. Name u ampo, honie name i'ridi u ampo. 38 Med name en, honie, i'ri di med: hu' no' nu, ano' afeng aodang, sam afeng her, ma'a uil ipot ta hufa'. Fede', sari hu' ba i'puin name hu' horofe name foil puin i'ri hu'." 39 Yesus upapain ho'o puin supi a'ramateng, "Name e'fail sah nu, sa name e'fail sah atang puin lame no'? Sanang alo ma'a e lafo boi mi muj nene? 40 Sakola ai nu sa so guru e' mota sah. Honi sobo, ano name so gur pel medam, supi di mang fede' supi o guru honi. 41 Naba eife bitang mong i' di'ail miho i'dun a'hol, sobo tibalok mate i' e'fail miho i' e'ahol nene? 42 Nabafe ma'a i'puin di'ailho a'ramateng, 'No di'ail, sei lame eh ba kilang e na bitang e'fail miho med,' ho e, tibalok i' e'fail miho i' e'ahol nene? Hoi name pule pale! Tibalok e'fail mi ho sotur med a'ra hel. Honi sa e'fail lel dun bitangba o' di'ail e'fail miho a'hol, honi amfe med a'ra hel." TI NO' HO, O' PIRDI NO' 43 "Ti no' ho, sa e pir sah puin hil nene, ti sah ho, sa e pir no' puin hil nene. 44 Ti ho sel a'rian pi o' pir fe mi a'hol. Name a'ong pa' ta'unungho, e namang bung mi nene, med name anggor pa hi' ho e' burang om mi nene. 45 Nameba no' ho, na o'no'fe som mi a'ra hel, sobo nameba sah ho, na o'sah fe som mi a'ra hel. Nabafe name nunu at mihel, honi he'e sari nahoro a'ra om afang." PILANG A'FANG ALO 46 "Naba ei sofe i'Nolofe 'Tuhan, Tuhan,' sobo nabafe Na u' i'ramatengho i' e panen nene? 47 Na ma'a u i'etub, mang fede' naba honi, nameba Nolap ho' No mateng pa' alepang, no' he'e a'lol panen. 48 Sariho mang fede' name bang bakug honi, sa fa'ai arung ul-ul, o' pilang ho foi ta a'tuhuin. Selnu mi afe mate ma bangho putang sobo, bangho e od farufing nene, fede' bangho atuhuin dume bi. 49 Sobo, nameba No mateng pa' ho a'lepang no' e a'lol a'ta ain nene, sariho mang fede' name bang bakung, o' pilang a'ai, bangho med fa'ai fe ta a'tuhuin. Selnu mi afe mate ma bangho putang honi he'e, bang ho ol tari' taberang mate bi'."