¹ Selnu mi, name tofang Yesus o'lubung e'fading e'falofe honie Lahtal o'fom pa' u alepang. Sel homi, Yesus pong Genesaret o'tut adi mi toh, ² dun he'e, ei alo mong tang adi mi ted eh, o'aneng ei tahel so dalang hafo' eh. ³ Yesus mid ei nu ta, sariho Simon o'ei, no' Sa Simon a'how ei ho ufa' tutho e'let apite. No' Yesus ei ho tamih name tofangho fompa' matengpa' puin supi gur pel. ⁴ Sa mateng no, Sa Simon a'ramateng, "Sam lew leam o' dalangho few honie ab med." ⁵ Simon u'bangho, "Guru, ni atitino' o' karesang pakanu om mi sobo ni e naden med nene! Sobo, A unahow amba, nasam dalang few." ⁶ Supi sam dalang few he'e, ab tofang supi o' dalang om mi, supi o' dalang e'dai peh. ⁷ Supi tenangbar mong ei beng ta supi o' lofe ho' supi eita horo tenang el bar ho' supi eita ab hur med ei alo ho mi afeng, ei aloho e'dai hol. ⁸ Simon Petrus mang naho a'hol horo he'e, sa Yesus ahoi mi fa'ur muding sa u'bangho, "Asam nelet tuang, fede' nari ho'o doc a'hal o' name!" ⁹ Petrus u'bang honi fede', sari med namenoba ara homi eh ho sahoir, fede' ab tofang bi' supi med. ¹⁰ Yakobus med Yohanis, Zebedeus o' aibar Simon a'ra tenang el di honi. Yesus Sa Simon a'ramateng, "Ha'ai baroc e. Fed ho'mi, i namenofe foil puko e' few." ¹¹ Supi so ei nunho baring taat tamid no' he'e, supi an-an tofangho med meng, supi Yesus a'ta'ain. NAME HAPE BURANG ANO' BIRANG ¹² Selnu mi, Yesus a'ra pali' nu mi. Name nu a'ra homi, o'bo a'fah a'hir hape burang afeng. Sari aiho mang dun Yesus a'hol he'e, sa fa'ur muding, lafung a'dimbut apongfa' sam faai ator, sa Yesus a'bang, "Tuang, mangfede' A U'inung he'e, A nano' birang." ¹³ Mang horo, Yesus Satang a'hir aiho a'tor. Ubangho, "Na inungba, a'birang." Mang horo he'e, aiho o' hape burang suhuin. ¹⁴ Sobo, Yesus aiho parenta, honie sa a'ai mang anodi, naho u a'ramateng nene, "A sam o'bo' ho med imam ernu e'tub. Birang-bu uin ho a o' mahen few, mangfede' Musa ubang eh honi, sano' o'hir o'pa' med supi e're eng." ¹⁵ Yesus o'mateng lil ted mangta, horo name tofang ho' ta unung A'ri u'alepang, honie supi o' mode ernuho, supi ubirang. ¹⁶ Honi sobo, e seh-seh he'e Yesus tafuning sam pali' tining leam a o'me. NAME TU'UNG DOH ANO' BIRANG ¹⁷ Selnumi, Yesus name afom apahang eh, Farisisi hinung, Taurat o bengfal ernu, supi bang lelang Galilea pali' mi ho a'ri an ho' Yudea o' name, med Yerusalem, ara homi mi eh. Lahtal o'tutung kufa' Yesus a'ra to huil, Sa name tofang ano' birang. ¹⁸ No', name pirnu alo, supi ai tu'ung nu med o'de ta ara ho', supi panen taroni e, supi a'ra bang om lemid med Yesus a'pong a'dang mimeng. ¹⁹ Sobo, supi aiho a'ra bang om lemid sah fede', nameno' lubung tofang bi', supi a'ra bang a'do tamid, supi ai tu'ung ba de' taho alorang hel ham-ham lehel Yesus a'pong a'dang mi ²⁰ Homi Yesus supi o' udume a'hol, Yesus ubangho, "Hoi, No di'ail, o' docho u'ampo am." ²¹ Taurat o'bengfal ernu, med Farisi hinung ta'ain ara ip ara mid, "Aiho' A'nosofe Lahtal e'bit? A'noso name o'doc u'ampo no? Lahtal so no!" ²² Yesus supi o'tanut mang a'hol, Sa ubangho, "Naba ei fe i iom mi ta'ain honi? ²³ Taro horo somino, 'O'doc ernu u'ampo am' eme 'Toh e lame'? ²⁴ Honi sobo, i'ridi a'hol Sariho, name no' o'Ai'di o'kufa ara pali' mate ta puin name o'doc uampo," Yesus ai tu'ung ho a'ramateng, "Na a'ramateng: Toh, o'de' ho tefag e, abor."' ²⁵ Mang horo he'e, ai ho sahirtoh name tofang a'pong a'dang homi, so de' tatar eh ho tefang, lame sabor, sa Lahtal ani u tarain. ²⁶ Name bu'ang ho barpi sahoir, supi Lahtal u tarain. Baroc banibung supi a'fah mi fa Lahtal o' tutung kufa'ho a'raham, supi ubangho, "Fed ho' mi ni na o empir a'titino ni dun a'hol!" LEWI FA YESUS A'TA AIN ²⁷ Mang no' Yesus hel, Sa dun he'e, ai lafung fali med ei ani Lewi ho, mong lafung fali med eleme mi mi eh. Yesus a'ramateng, "Ma e Nata'ain." ²⁸ Horo he'e Lewi sahirtoh, an tofang ho med meng, sa fa Yesus a'ta'ain. ²⁹ O' hamow ho, Lewi sobangmi diang panen med Yesus a'raham. Lafung fali o'name tofang, med name beng, supi barpi A'ra na' de seina. ³⁰ Honi sobo, Farisi hinung med Taurat o'bengfal ernu, supi Yesus o'sakola aibar abung Yesus O' a'hal lap, "Naba ei sofe i name lafung fali med ei, med name doc a'hal ara na'de seina?" ³¹ Yesus abor u'bangho, "Name birang e lafurung lap nene, name modeso lafurung lap. ³² Na ho' ho'o, e name a'bul o'lofe nene sobo, name doc a'halfe Na o'lofe, honie supi som a'fom." FARISI HINUNG SUPI YOHANIS EI SAKOLA AIBAR MED YESUS EI SAKOLA AIBAR SARA A'LE' ³³ Supi Yesus a'ramateng, "Yohanis Pembaptis ei sakola ai'bar ho, supi puac med a'ome sei masing, Farisi hinung eidi. Honi sobo, Ei sakola aibar ho, na'de sei'na sei masing." ³⁴ Yesus supi a'ramateng u'bangho, "Mang fede' name lotenu nika honie o'ata'ain ho i'a'how puac, sobo ai loteba nikafe ho dai sari ho a'ra ham-ham eh ho no' em a'ai? ³⁵ Sobo, sel ho a'rafanang, honie ai loteho name supi a'bung med, sari selho a'raham horo i'puac." ³⁶ Yesus na upapain u supi a'ramateng, "Name nudi e so fen habar apite' apeh puin fen pah bulang nene. Mang fede' honi, ho he'e, sari aiho fen habar asahain, no' he'e, napah bulang habar ho, fen pah ho a'ra salahain. ³⁷ O' a'raham honi he'e, name nudi ei anggurba dai no' eho, med tanib tiing peh-peh am ho mi aw eh nene. Pane'ta he'e sari tanib ho peh anggur hufa' asel tanib ta ma ain. ³⁸ Anggur dai no' dai rupa eh ho, med tanib habarfe mi taro'. ³⁹ Ano name sa anggur em na'am, om foil anggur no' anggur habar na, supi u'bangho, 'Anggur em so mino'."'