¹ Yesus ba Roh Bolang afeng ho Yordan mi sabor. Horo he'e Roh Bolang Arasam la bo' mate mi ² tareng erut om mi setang ho pate. Sa e naden di ade nene sel om homi. dele sel an om ho mi he'e Sa So malihing ma'eh ham. ³ Horo, setang aramateng," Ari Lahtal Ai so honi he'e foi ho'o ano' roti." ⁴ Yesus eiy abor ubang ho," Ara hul olmeng, nameno' e roti fe u fetang nene.'" ⁵ No' he'e setang foi Arasam doi lafining ta, setang pali' mate o kafac mang u Etub. ⁶ horo setang Ara'mateng ubang ho," Lel madal ernu eleme arian hele ho'o na med En A u'aneng, fede' sobarpi alorang med nenam. honi fe mang ano so di nom m umang he'e na med en. ⁷ Mang fede' a nari u ada' ahol ne'fa fan, barpi ho A ano' o na." ⁸ Horo yesus o mateng abo ubang ho," Ara hul olmeng,' Ariso uil-uil Tuhan Lahtal u ada' hol, Fa horo araham a u afoh u atel.'" ⁹ no' setang foi Arasam Yerusalem mi, Ara tong bang ado ta, setang ara'mateng, Ari Lahtal Ai so he'e A muj hel, ¹⁰ fed' ara hul olmeng,' sariho Eiy araham Lahtal so Malaikat nun ahow Ari buang.' ¹¹ Med supi satang E'pep, honi E'fa ha'ai foi fa'ai ator e.'" ¹² Yesus setang ara'mateng ubang ho," Ara hul olmeng, ha'ai o Lahtal ho apate'e. ¹³ Setang mang Yesus apate no' horo he'e, sa Yesus atain sa sam foi sel beng adanang. YESUS BALETA O A'AINANG MONG GALILEA MI ¹⁴ Yesus sabor Galilea mi Roh o tutung kufa' om afeng, hamoi fa ei araham ho mi te'eng Galilea pali' ho mi pir. ¹⁵ No' he'e Sa mong Yahudi hinung o a'ome bang ari'an, fom pa' mateng pa' bolang u mateng. SO BANG ASEL MI NAME ATETEL ¹⁶ No' horo Yesus sa Nazaret E'mele Sa mi mate ho leam. Ei asala, sel sabat araham, Yesus sam a'ome bang mi satoh sura' ta'an. ¹⁷ Yesaya o sura' name En, Sa during ba'ang nu ahol, o' hul ubang ho'oni, ¹⁸ "Tuhan O Roh ara nara, asel Sa Satang Nari u baring honie, Na na'no' na sah ubang name sah lahal ernun ara mateng, Sa u Nahow hunie il luling u mateng mong name tahang bang mi ara'mateng, name e'fei sah ano no' sa dun na' ahol, name tarofe pahi' om mi ano' il, ¹⁹ Med tun Lahtal O ukarang ho'am ho u mateng u lurung." ²⁰ Yesus sura' ho utel med name ba bang ho u buang ho en, no' horo he'e sa hel mih. Name a'ome bang ho mi barpi, e'fai ari mi toh. ²¹ Horo he'e Yesus sa supi ara hu'tang," Fed ho'o mi, naba fe sura' bolang om mi hul i maeh ham ho'o, ano' an am. ²² Nameno' homi so barpi o abul ubang, supi sahoir fa mateng pa' hir male ang ba At mi hel ho araham. supi ta'ain ubang ho," Ahal Sari e Yusuf o ai nene?" ²³ Horo he'e, Yesus supi ara'mateng," I uil-uil a'papai ho u naramateng,' Lafurung o'bobom ano' birang! Ni maeh , ernu turlo A mong Kapernaum mi panen ho, foil o ng o bang asel ho mi panen. ²⁴ No' Sa ubang ho," Na ira mateng, so atino' nabi nu sa sobang asel mi name e u ada' ahol nene. ²⁵ Na o abul om mi Na u iramateng, Elia o Zamang mi ho ob alofe lafoh Israel mi, sariho araham burang saritel o lufang tun tow ul talang, ho araham malihing mate hel pali' arian. ²⁶ Honni sobo, Elia Lahtal e ahow sam ano horodi olap sam nene, seilal ho, ob alofe nu mong Sarfat mi, sariho Sidon pali' mi. ²⁷ Med Nabi elisa o samang mi, name habeburang Israel mi di tofang, honi sobo o anai ho mi pir nudi birang nene, seilal ho Naaman Sira o name horo solo." ²⁸ Mang na'ho maeh horo he'e, name ba a'ome bangmi barpi ari'ing oh. ²⁹ Horo he'e supi toh Yesus baring luling lehel bang pali' ho elet sam pe' ado ta, supi om ho darut med pe' sah ta'amuj. ³⁰ Honi sobo Yesus supi o anai lol hel sam. AI LOTE NU SETANG O ROH OM HALUP HO ANO' IL ³¹ Yesus sam Kapernaum leam sari bang ho Galilea o pali' mi, hair bolang araham, Sa name tofang gur pel au atang ta. ³² Supi o matengpa' ho, u sahoir, fede' O mateng pa' ho tutung kufa' ara om mi. ³³ A'ome bang ho, ai lote nu roh setang ei ho om tamang, ai ho atino' o beat. ³⁴ " sohait ta ni sei nilo' le! A nabanu panen niraham, hoi Yesus name Nazaret? Ahal A ho' nisaha hain ere'eng so? Na ahol Ari ho Anoso, Ari ho Bolang Manep Lahtal mi ho'!" ³⁵ Honi sobo, Yesus roh setang ho o'rang, ubang ho," Por! Sari ai ho'o mi hel!" Setang mang name ho foh fa'ai ta' par no' he'e, name'lafoh apongfa' araham ho mi, sa name o bo' homi hel sobo sa e'ano' ma'ar nene. ³⁶ Name tofang ba ara homi eh ho atino' o sahoir,supi u'satan ho," Naba mateng pa' soba ho'o? Aselba malang mate med tutung kufa', Sa puin roh sah nun ho ahin alol supi hel." ³⁷ Horo he'e Yesus o panen aten ho, O hamoi lil pali' mipir. PETRUS O' OB OFO MED NAME TOFANG BIRANG MED ³⁸ Mang no' horo he'e, Yesus a'ome bang, homi hel sam Simon o bang leam. Sariho araham Simon o' ob ofo taso' mate, horo he'e supi Yesus abang honie, Yesus ano' birang. ³⁹ Horo Yesus Sa Simon ofo abung homi toh, taso' mate ho Sa e'hap, mang horo he'e taso'mate ho suhuin. So horo he'e Simon o' ob ofo toh supi u baleta. ⁴⁰ Fed dele muj he'e', name barpi so ob so ai ba mode afang-afang tamuj ho ara ho' Yesus olap ho'. Yesus Satang supi tameng arian, med supi ano' birang. ⁴¹ Setang ernu di name tofang om homi hel, supi beat ati'tino' ubang ho," Ari ho'o Lahtal Ai!" Honi sobo Yesus supi orang, Sa e supi ahow mateng nene, fede' supi ahol sariho Kristus. YESUS BANG PALI' BENG NUN DI MI FOM PA' U MATENG LURUNG ⁴² Mi dil lel lalami he'e, Yesus sam solo afaling pali' oh nu mi. name tofang Ari lap, ho'araham supi mang Ahol he'e, supi satiting O se'dang toh honie, Sa ha'ai supi e'let e. ⁴³ Honi sobo Sa supi ara'mateng," Na musti Lahtal o mateng pa' Sorga Bang bolang ei ho, foi fit sam bang pali' beng mi u mateng, u lurung, fede' horo ei fe Sa u Nahow." ⁴⁴ Horo he'e, Yesus mong Yudea mi a'ome bang arian fom pa' mateng pa' u mateng, u lurung.