¹ Tun o ernu fali'ifihing mi, Kaisar Tiberius parenta puin, ho araham Pontius Pilatus Yudea o Gubernur, Herodes afen Galilea mi; Filipus Herodes o diail ho, Iturea med Trakhonitis; med Lisanias ho, ho Abilene o afen, ² Hanas med Kayafas ho araham, Lahtal amang pa' ho' Yohanes ohir, Zakarias o ai lote mong labo' miho aramateng. ³ Horo he'e Yohanes sam mong bang pali' ba Yordan efading seh ho mi, sa sei tuling tow puin som afom honie, doc ahal u hafo' u lam sa u mateng u lurung, ⁴ mang fede' nabi Yesaya o sura' mi honi:" Ho'oro name amang pa' mong la' mate la' l ai mi lofe ideh, Lahtal o se'bur u taro; ano' mulang med ere'eng, se'bur o lakiling labor ano' mulang, se'bur o haloi ne'ne ano' haloi. ⁵ Padung ernu fa'ai mi u'huin, doi bin ernu ano' haloi, ⁶ honie sa Lahtal o il o luling name tofang dun ahol!'" ⁷ Horo he'e name tofang ba ho' olap ho sei tuling tow med feho, Yohanes aramateng," Hoi iri ba mon lakiling lafelang o aibar! Anoso ino' nauma fe i Lahtal o ari'ing fail ho el te'eng? ⁸ Honife, i'om afom o'pir no' horofe u tub u dam sano' orupa a om afom am honi. Ha'ai ibobom iramateng ubang ho,' Abraham ho ni bap ni bale so!' Na iramateng, so ati'tino' hoLahtal foi bung ho'o ano' fetang, ano' Abraham o aibar no'! ⁹ Honi sobo, fed ho'omi ho baling ara mong ti alimang ta'seh ham. Ti el arian ba o pir eno' nene ho, abo'oi feuw afai leam." ¹⁰ Name tofang Yohanes atan ," Honie ma' naba fe ni panen? ¹¹ Sa ubang ho," Name ba o kod pa' alo sa uil-uil dalam, sa uil-uil dalam med name kod a'ai en. Med name ba o namej ara, hodi akala orupa honi." ¹² Name lafung fali med ei di piralo tow hodi ho' sei tuling tow med. Supi Yohanes atan; Guru naba honi horo ma' ni panen? ¹³ Yohanes supi aramateng," Lafung fali med ha'ai mi'alihing e." ¹⁴ Soldaj pirden Yohanes atan," E honi e niri ho'o taro'ni? Naba honi horo fe ni panen?" Yohanes supi ara'mateng; Ha'ai ari'ing fail puin name abang seng med e, eme aba-aba hu'tang name amuj. I latutung o fali horo puin i fetang uta." ¹⁵ Name nun ba Yesus o ho' ma adanang eh ho, barpi som mi Yohanis panep, ma' sari ho'oro Kristus em ene'ne? ¹⁶ Yohanes supi ara'mateng ubang ho," Nari ho'o sei fe puin ifoil. ho ni sobo Ainu ho mi tutung, mi kofa', mid nemota dai ho'eh. O sendal heiy afetang horo di na panen sah. sari Ai ho Roh e med afail fe puin ifoi. ¹⁷ Ba' ara atang mi am, sapuin u'afe' u hor, ala pa' o no' ho sa taunung esel om mi, honi sobo o fah o hapap hosa apew mong afail om lefa." ¹⁸ Fom pahang beng, med sura' habar, Yohanes u'mateng u lurung med name tofang aramateng. YOHANES PEMBAPTIS NAME MED SAPIRI MI ¹⁹ Honi sobo Yohanes sa afen Herodes ho afom, sari ho Herodes panen aten fa herodias araham, aselba panen aten osah fe sa panen, ²⁰ horo he'e Herodes na ho'o med ta, beng tofang foil ta no' horo he'e sa Yohanes tahow sapiri leam. YESUS AFOIL ²¹ Ho araham nameno' barpi so foi, Yesus di sofoi. Sa a'ome eh he'e, burang sari during, ²² horo Roh Bolang hel Ari tahel mang fede' u'lo honi. No' he'e name amang pa' burang ta hel ubang ho," Ari ho'oro no ai lote. Ari ho'oro Na u'inung."YESUS O ASALA USULU ²³ Ho araham Yesus karasang baleta ano' lame ho, O ur ho ma' tun ertow. Nameno' tofang sei tanut he,e, Yesus ho Yusuf o ai. Yusuf Eli o ai. ²⁴ Eli matat o ai. Matat Lewi o ai. Lewi Malkhi o ai. Malkhi Yani o ai. Yani Yusuf o ai. ²⁵ Yusuf Matica o ai. Matica Amos o ai. Amos Nahum o ai. Nahum Hesli o ai. Hesli Nagai o ai. ²⁶ Nagai Maat o ai. Maat Matica o ai. Matica Simei o ai. Simei Yosekh o ai. Yosekh Yoda o ai ²⁷ Yoda ho Yohanan o ai. Yohanan Resa o ai. Resa Zerubabel o ai. Zerubabel seltiel o ai. seltiel Neri o ai. ²⁸ Neri Malki o ai. Malki Adi o ai. Adi Kosam o ai. Kosam Elmadam o ai. Elmadam Er o ai. ²⁹ Er Yesua o ai. Yesua Eliezer o ai. Eliezer Yorim o ai. Yorim Matat o ai. Matat Lewi o ai. ³⁰ Lewi ho Simeon o ai. Simeon Yehuda o ai. Yehuda Yusuf o ai. Yusuf Yonam o ai. Yonam Elyakim o ai. ³¹ Elyakim Melea o ai. Melea Mina o ai. Mina Matata o ai. Matata Natan o ai. Natan Daud o ai. ³² Daud Isai o ai. Isai Obed o ai. Obed Boas o ai. Boas Salmon o ai. Salmon Nahason o ai. ³³ Nahaso ho Aminadab o ai. Aminadab Admin o ai. Admin Ari o ai. Ari Hezron o ai. Hesron Peres o ai. Peres Yehuda o ai. ³⁴ Yehuda Yakub o ai. Yakub Ishak o ai. Ishak Abram o ai. Abram Terah o ai. Terah Nahor o ai. ³⁵ Nahor Serug o ai. Serug Rehu o ai. Rehu Peleg o ai. Peleg Eber o ai. Eber Salmon o ai. ³⁶ Salmon ho Kenan o ai. Kenan Arpaksad o ai. Arpaksad Sem o ai. Sem Nuh o ai. Nuh Lamekh o ai. ³⁷ Lamekh Metusalah o ai. Metusalah Henokh o ai. Henokh Yared o ai. Yared Mahalaleel o ai. Mahalaleel Kenan o ai. ³⁸ Kenan Enos o ai. Enos set o ai. set Adam o ai. Adam horo Lahtal o ai