¹ Selnumi, Yesus Lahtal O'bang om mi fompa', med Sura' habar om, uname tofang ara mateng eh he'e, imam hinung o'kapal, Taurat o'name omhul, med tumo'bar ara, supi Yesus olapho'. ² Supi Yesus A'ramateng, "A niramateng, naba o'kufa'fe Apuin nanun hoo panen? Eme, ano so kufa' hoo med En?" ³ Yesus supi aramateng, "Naridi nanu uitanfe. Nei abor, ⁴ Yohanis name a'foilho taromi ho? Sorga miho' eme, nameno' miho'?" ⁵ Naho supi usara gahain, supi ubang, "Mang fede pi ubang, 'Sorga miho',' ho he'e, Sa ubang, 'Honi so he'e, inaba eife, Yohanis o' atino' bit nene?' ⁶ Honi sobo, mang fede' pi ubang, 'Nameno' miho',' honi hee, nameno' tofang tod tamine fede' supi o' atino' bit, sari Yohanisho, nabi nu." ⁷ Horo supi ubang, sari name afoilho, taromi ho'so he'e, ni a'hol nene. ⁸ No', Yesus supi aramateng, "Mang fede' honi he'e, naba o'kufa'fe Napuin na ernu hoo panen hodi, Na e' ubang ien maeh nene." NAMEBA ANGGUR DIL SEFAHO ANO' UPAPAIN ⁹ No', Yesus upapain hoo, puin name tofang ara mateng, "Ai nuho, sa so anggur dil muding te' no', samed maad o'name oinu en sefa, sasam pali' let leam lufang. ¹⁰ Anggur hil ten o'selmi, sa soname baleta ahow sam, name maad ho olap sam, honie anggur dil o' na'fail habuden ba eiho, fit ho' en. Sobo, maad o' nameho, supi name baleta eiho beh bala, aralil ahow sam, horo sari aiho sotang oh sam. ¹¹ No' safoil name baleta beng ahow sam, sobo name maad foil aiho beh, ano' sah-sah, ara ril ahow sotang oh sam. ¹² No' dil anengho foil soname baleta omitow ahow sam, sobo name maad aiho ano' bamed no', aralil ahow hel. ¹³ Dil aneng ubang, 'Maa nabafe napanen? No ai na ukarang empir horo na ahow sam honi hee, maa supi uada ahol.' ¹⁴ Name maad mang dun dil aneng o' aiho ahol, supi sara gahain, 'Sang so den dai hee, dil hoo uaneng, mapi amine honie o'dil hoo pi ano' tei!' ¹⁵ Horo hee, supi aikaho a'hel few fo amot lehel, supi amine. No', naba honi horo dil aneng panen supi araham? ¹⁶ Sa ho' name maadho amine, no' hee, sa sodilho foil med name maad beng en. "Name tofang upapain hoo maeh, supi ubang, "Seseh, sari na hoo haai ara!" ¹⁷ Sobo, Yesus supi edun ara mateng, "Mang fede' honi, baang kaai hoo o'lel taro'ni?: 'Foiba name bang aten ei a'hel few'amho, sano' alang foi'? ¹⁸ Nameba foiho ta olho, po' tamaain kari' kari', nameba sari foi hoo muj tahel, honi hee halal botang!" ¹⁹ Taurat o'name med imam o'kapal ahol, sari upapain hoo supi ei arahamfe ubang eh horo, supi om selhomi Yesus apuin. Honi sobo, supi name tofang elbaroc. LAFUNG FALI MANA O' UTAAIN ²⁰ O' ataain, Taurat o'name omhul, supi se'fail Yesus tabaring, supi name pirnu alo ahow sam, supi aba-aba sano' om no', honie supi taain pa' puin Yesus o'se'bur lap, honie Yesus apuin arasam Gubernur atang om mi. ²¹ Nameba name a'howho, supi Yesus atan, "Guru, ni ahol, A mateng o'abulfe bit, na o' abulfe u name etub. A e' name a'le' nene sobo, Lahtal o'se'bur abul horofe usupi etub. ²² Honife maa ni lafung fali mana med Kaisar en no' eme sah?" ²³ Honi sobo, Yesus supi o' ladimang ahol horo hee, Sa supi aramateng, ²⁴ "Idai seng hirnu med Netub. Ano o'gambar med nahulso ara sengho ta oleh?" supi ubang, "Kaisar o'gambar med Kaisar o'nahul." ²⁵ Horo, Yesus supi aramateng, "Honiso hee, Nabaso Kaisar ei med ona en, nabaso Lahtal ei hee, med Lahtal ona en." ²⁶ Mang honi hee, sari nameho, supi Yesus o'matengpa' ano' asel, honi puin Yesus o' ahal lap tofang apong adang homi sah; sobo supi Yesus o' abor pa' ho usahoir, supi por tining no'. SADUKI HINUNG O' TAAIN PA' ²⁷ No' hee, Saduki hinung ho' Yesus olapho'. Name min sofetang ho, sari name hoo, e' o' atino' bit nene, supi Yesus atan, ²⁸ "Guru, Musa hul med tere engho, name lotenu min, o'obho ai aai, honie lote minamho o' diail lote sofoil obho medfe, honie ai afain med sodiail minam e'reeng. ²⁹ Hooni, name diail pir itito. Matu nikano' ai aai minam. ³⁰ O'diail o'mialo foil obho ara nika sobo, ai aai minam. ³¹ No' diail o'mitow obho foil ara nika sobo, hodi ai aai, minam. Sarina hoo, name diail pir itito panen sam, diail o' mi ititoho mimeng sobo, barpi ai aai. ³² O'amujmi, ai ob hodi min. ³³ Honie, sam hu'botang dasing ap o'selmi hee, anoso ai obho o' lote horo abul? fede' supi diail pir ititoho, barpi ai obho ara nika am." ³⁴ Yesus supi ei abor ubang, "Zamang fed hoomi, nameno' nika, med sara nika, ³⁵ sobo nameba mong pali' maeh ho med no', med name min anaimi sofetangho, nika, med sara nikaho panen sah. ³⁶ Supi e' min neneam fede' supi malaikat araham. Supiho Lahtal o'aibar fede' min om homi Lahtal supi ano' fetangam. ³⁷ Musa name min sofetang ho utubam, sariho mong banang som alol fail eh om mi. Sari hoomi, Tuhanho o'ubang, 'Abraham o' Lahtal, Isak o' Lahtal, med Yakob o' Lahtal.' ³⁸ Sariho e' name min o' Lahtal nene, sobo name fetang o' Lahtal, fede' name fetang ernu ara Apong adangmi. ³⁹ Horo, Taurat o'name omhul ubangho, "Guru, O aborpa' ho abul." ⁴⁰ No' horo, name den foil Atan neneam. KRISTUS HORO TUHAN ⁴¹ No', Yesus supi aramateng, "Taro'nisofe, name ubang Kristus ho, Daud o'ai no'? ⁴² Honi faleng, Daud o'dal pa' Mazmur mi Daud ubangho, Lahtal no Tuang ara mateng, "Natang tani lol mih, ⁴³ sam ofalefang tofang Na med E'fasel mi meng."' ⁴⁴ Mang fede' Daud sa Kristusho ubang ano' 'Tuang,' honi hee mang taro'nife Kristusho Daud o'ai?" TAURAT O'NAME OMHULHO, UBUANG NO' NO' ⁴⁵ Name tofang alepang eh hee, Yesus so sakola aibar ara mateng, ⁴⁶ "Taurat o'name omhulho uiri buang no'no', lame hee kod lai mang horo supi apano', don mi name supi uada ahol horo apano', aome bang a'rian mih eleme milafining horo lap, diang den honi hee, name supi uada ahol lap. ⁴⁷ Supi a'lofebar o'bang utot ukalaping, supi aome lai-lai honie name supi e'dun. Name hooni hukung salang mitarofe med."