¹ Horo, Yesus lame madong Yeriko bang alai. ² Hemomi ai lote nu ani Zakheus, ai ho lafung fali med o kapal sari name kafac nu. ³ Sa panen taro'ni Yesus edun faleng bo so sah name tofang atelang; asel o bo' toang. ⁴ Horo, Zakheus te'eng sotur name tofang alai fa a'ong el nu lol honi e Yesus edun no' fede' Yesus se'bur horo lolfa. ⁵ Ho araham Yesus mang sam Zakheus eleme homi, Sa seng atel dun mid Sa ara mateng, "Zakheus, hanoang hel, fed ho'o na musti omeng mi aer." ⁶ Horo, Zakheus ber-ber hel sapang no' puin Yesus med. ⁷ Sobo, ho araham name barpi dun na ho ahol, supi maurung med ubang ho, "Sa name doc ahal obang fe mi aer am." ⁸ Horo, Zakheus sahirtoh sa Tuhan aramateng, "Tuhan, edun ema, no kafac ho'o na den med name sah lahal en, no' mang fede' na name den o na' an-an utetel am so honi he'e, na ona holong alihing mi ut." ⁹ Horo, Yesus Zakheus aramateng, "Fed ho'omi, il luling ho' bang ho'o ta am asel ai ho'o di Abraham o ai. ¹⁰ Honife, Nameno Ai ho' ma name su huin lap med ano' il luling." BALETA O NAME BALA AMONE ALOL ATA'AIN MED BALETA O NAME ARI'ING FAIL TETANG HASU ¹¹ Supi na ernu ho barpi u alepang eh he'e, Yesus foil u hamouw, sariho sa u papain nufe u mateng asel sa ho' Yerusalem abung am med asel supi eiy ombite Lahtal O Bang Bolang hanoang ho' ma so. ¹² Horofe Sa ubang ho, "Name anita nu sam pali' let leam honie name afoh ano' afen, mang no' honi he'e sa sabor. ¹³ No horo he'e, tuang ho, so name baleta pir ernu ta'unung med sa seng o tofang rupia ernu supi edalam. Sa supi aramateng, seng ho o' puin dagang sam na so nabor,' ¹⁴ Honi sobo, name ba ara bang pali' nu ho, om e bune, horo sa mang lame supi name nu ahow tangfal sam ubang ho, 'Nipang sah name ho'o sano' ni afen.' ¹⁵ Name afoh ano' afen no' horo he'e sa sabor, sa so name baleta pirden ba sa seng en ho olofe ho' solap ho' honie sa seng ba supi en puin dagang ho o untu ahol. ¹⁶ Name baleta a'ainang ho' ubanh ho, 'Tuang o seng rupia nu ho, o untu foi rupia ernu.' ¹⁷ Afen ho aramateng, 'No' bi', kae ari name baleta no'! Fede' a karasang ka'ai homi alol ata'ain rupa honi fe, a bang ernu o parenta puin.' ¹⁸ Name baleta o mialo di ho' ubang ho, 'Tuang, o seng rupia nu ho o untu rupia ifihing.' ¹⁹ Horo, sari afen name baleta ho aramateng, 'A bang ifihing u aneng.' ²⁰ Horo he'e, name baleta nu foi ho' ubang ho, 'Tuang, ho'o o seng rupia nu ba na tatang luh o napah om mi taro ho. ²¹ Na el baroc asel ari ho ari'ing karang. A na ba e taro' nene bo a med, a na ba e te' muding nene di hor lap.' ²² Horo he'e, afen ho ara mateng, 'na o mateng pa' ho ata'ain ara parakara, hoi ari name baleta bo tetang karang! honie, a ahol bite nari ho'o name ari'ing karang, fe na ba na e taro' emed te' nene ho di na med? ²³ Mang fede' honi so, taro' ni a e noseng ho med name seng ano' lame eh ho mi meng nene, honie ho araham na nabor he'e, na no seng ho o untu sara med?' ²⁴ Horo, afen name homi toh pir ho ara mateng, 'Seng ho abung med honi e name rupia ernu puin ho en.' ²⁵ Sobo, supi sari afen ho ara mateng, 'Tuang sari name baleta ho o seng rupia ernu ara am.' ²⁶ Afen mateng abor bite, 'Na ira hu'tang, name ba na ara ho foi med en mi lafoh, sobo name ba nanu di e ara nene, o na an-an abung ho musti med. ²⁷ Honi sobo, fa no falefang nun ba na supi o afen faleng u sa'ain ho, supi ara ho' ma napong fa' araham homi supi amine.'" YESUS NAME U BAD ARI MED ANO' AFEN ²⁸ Yesus naer nun ho mang u hu'tang no' he'e, sa mi sotur lame fa Yerusalem leam. ²⁹ ho araham Sa mang sam fanang Desa Betfage med Betania, doiy abung ani doiy Zaitun, Sa so sakola ai pir alo tahow. ³⁰ sa supi aramateng ubang ho, "Fa mong desa ba iraham hemo ho mi. Fe i sam hemo mi am he'e, i ma' keledai ai nu nod meng ho edun am, sari ho name den e mid ta di dai. Keledai o aiy ho o heiy afetang e fit ma ho'o lema. ³¹ Mang fede' name den itan, 'Naba eiy fe i keledei ho fit sam?', Ubang ho'oni: Tuhan keledai ho perlo." ³² Horo, sakola ai piralo ba Sa ahow ho sam, supi na an-an ho ahol mang fede' ba u supi ara hu'tang am honi. ³³ Supi dai keledai o ai ho o heiy afetang eh he'e, o aneng supi atan ubang ho,"Taro'ni fe i' keledai o aiy ho oh heiy afetang?" ³⁴ Supi di mateng abor ubang ho, "Tuhan keledai ho'o perlo." ³⁵ Horo, keledai o aiy ho fitsam Yesus en no' ofen ho med amot sel tameng, no' he'e supi yesus ara mid ta' amihing. ³⁶ Ho araham Yesus se'bur ho lol lame, name lafoh so fen med se'bur mi pep. ³⁷ Med ho araham dele Yesus ho' yerusalem abung, sari ho se' bur Zaitun doiy lol hel, o Ataain nun ho barpi bad herang puin Lahtal ani u tarain tale lil. Supi Lahtal o no' bit ani u tarain fa Mukjizat barpi ba supi aholam ho araham. ³⁸ Supi lofe id ubang ho, "Untu ada Araham fa Ai ba ho' sano' afen Tuhan ani om mi, tining talaj no' ham ara sorga mi, lel madal ara eleme so mi lafining mi!" ³⁹ Farisi hinung pirden name tofang lubung o anai homi Yesus aramateng ubang ho, "Guru O sakola aibar ho e hap." ⁴⁰ Honi sobo Yesus o'abor ubang ho, "Na iramateng, mangfede' supi por, foy nun ho'o ro lofe id." YESUS YERUSALEM U MORANG ⁴¹ Ho araham Yesus ho kota Yerusalem ho abung am, sa kota ho edun, Sa u ahain. ⁴² Sa ubang, "Mang fede' sel fed ho'o nabaso no' ham fito' irita. honi sobo, fed na ho'o dai ie'fai el tafuning. ⁴³ fede' sel nu ma eh honi he'e i falefang ernu fo mate pec iri fading, supi eleme barpi ari'an lol ho' iri mimuj. ⁴⁴ Ari e med o'ai bar nun ba i fo pec puin i telang ho, Supi a tari' aberang ano' butung bala. med supi e foi pa'nu di med foi beng ara taping meng nene iom homi, asel i e Lahtal o ho' ma iri malil ho, o sel ahol nene." YESUS NAME LAHTAL O BANG OM MI DON LANG EH HO ARALIL ⁴⁵ Horo he'e, Yesus mid Lahtal O bang Om lemid, name don lang eh ho ara lil luling lehel. ⁴⁶ Sa supi aramateng ubang ho, "hul olmeng: No bang ho'o aome bang,' sobo i ano' tot kalipang barang am!" ⁴⁷ Horo, Yesus Lahtal obang om mi name gur pel dil lel arian. Sobo, imam-imam okapal, taurat o name om hul ernu med bang pali' ho olafung, se'bur lap honie Amine bit. ⁴⁸ Honi sobo, taro'ni panen fe ho supi e ahol nene, fede' name tofang Yesus o mateng pa' ho apuin dume.