¹ No' Yesus upapain nu u' sakola aibar ara mateng honie, supi au, aome sei masing med som ano' ka'ai e. ² Sa ubang bite, "Kota nu mi ho, hakim mate nu sa Lahtal di u baroc nene, name beng di sa u ada ahol nene. ³ Kota ho mi ho, ob alofe nu sa hakim olap ho' sei masing, sa ara mateng, 'Na o abul nu med nen fa name nari lafang araham.' ⁴ Sel o mi den-den om ho mi ho, sari hakim apainsah ob alofe ho eita nene. Honi sobo, o ata'ain he'e, hakim som mi ubang ho, 'masiki na Lahtal u baroc nene, med mang ano horo di na u ada ahol nene sobo, ⁵ ob alofe ho'o sa ho' natutu' nalolom sei masing fe, na ano' abul honie sa ha'ai ho' nana' susa sei masing e."' ⁶ No', Tuhan ubang ho, "Nabafe hakim ba abul nene ubang eh ho u'alepang. ⁷ Iom bite Lahtal e na o'abul med supi ba Sa Sona u'tara' supi u O lofe dil lel dil paka ho en nene? Ahal sa ma' sel ho aluil fe sa supi ukarang? ⁸ Na ira mateng, Sa uil hanoang na o abul med supi en. honi sobo Nameno' Ai ho' ho araham he'e, sa ahol udume ara pali' mate ho'o ta em a'ai?" FARISI HINUNG MED LAFUNG FALI TAUNUNG O NAME ANO' UPAPAIN ⁹ Yesus Sa upapain ho'o foi ubang name oinu aramateng, name ba sano' orupa name abul honi med name beng supi edun he'e lamang. ¹⁰ "Ara name piralo sam Lahtal o bang om mi a'ome. O nu ho Farisi hinung med foi o beng ho lafung fali ta'unung o name. ¹¹ Farisi hinung ho toh a'ome saraham ubang ho, 'O, Lahtal, na ada mahen ubang Araham asel nari ho e name beng honi nene; orupa name o na an-an u alang med, ladimang labor, labui la'ete, ha'ai honi he'e name lafung fali ta'unung honi. ¹² Don nu om mi na puac mi alo, nei adi'mang o untu ho nu o habuden ernu na med en.' ¹³ Honi sobo, ai lafung fali taunung eiy ho mi let toh, sobo e burang di edun nene. mi te' bor, sa sadel ho mi beh-beh no' ubang ho, ' O, Lahtal. O ukarang ho ma nari doc ahal ho'o araham.' ¹⁴ Na iramateng, lafung fali ta'unung o name ho'o sa sam sobang mi, sano' name ba mi abul fa farisi hinung ho emota asel name ba sano' lafining ho name ano' lamang, med name ba sano' lamang ho name ano' lafining." YESUS MED AIKABAR ¹⁵ Horo, namenun so aiy bar ba dai ka-ka ai eh ho ara ho' Yesus abung honie Sa supi ator. Honi sobo, ho'araham sakola aibar ta' ahol, supi name nun ho foi e'ariing. ¹⁶ sobo, Yesus aikabar ho olefe Solap ma Sa ubang ho, "So honie sa aikabar ma nolap ma, ha'ai supi ehap atelang e asel Lahtal O Bang Bolang ho supi honi horo ona'. ¹⁷ Na abul-bul ira hu'tang, ano so om e Lahtal O bang Bolang ho med umang nene mang fede' aikabar ka'ai ho oni, sa e o om lemid nene." NAME KAFAC MED LHTAL O BANG BOLANG ¹⁸ Supi o kapal nu Yesus atan, "Guru om no', naba fe musti na panen honi e fetang so em ho med no'?" ¹⁹ Yesus omateng abor ubang ho, "Naba ei fe a ubang nariho no'? Name pirnu di taro di e no' nene seiylal ho Lahtal solo. ²⁰ I hukung nun ho'o ahol: "Ha'ai labuiy laete e, ha'ai name amine, ha'ai na ta'u e, ha'ai hu'tang aba kalufe e, med imang ife u ada' ahol.'" ²¹ Name ho o mateng abor ubang ho, "Afagrat ho na dai aforta alol ata'ain oh ham." ²² Ho araham Yesus na ho mang ma'eh, Sa ai ho ara'mateng, "Nanu daiy kurangbo' eh. O na an-an nun ho faiy ano' oh honie med name sah lahal ho edalam, he'e o kafac ara sorgami; honiam fe, ma e nat'ain." ²³ Ho araham sa mang Yesus o hu'tang ho ma'eh, om susa bi asel sari kafac bi. ²⁴ no' Yesus ai ho edun horo he'e ara hu'tang, "Name kafac nun supi Lahtal O Bang Bolang med feho karak empir! ²⁵ O mi no' bi', unta nu batig o boiy lol fa, so bo mi karak empir bite name kafac nun fa Lahtal O Bang Bolang ho lefa." NAME YESUS ATA'AIN NUN HO FATENG SO EM MED ²⁶ Name tofang ba mateg pa' ma'eh ho ubang bite, "Honie, anoso il luling ho med no'?" ²⁷ Yesus ubang ho, "Naba nameno' om upir ho Lahtal Om e upir nene." ²⁸ Horo, Petrus ubang ho, "Edun ema, ni nina an-an tofang ho meng oh ham fe ma Ata'ain so." ²⁹ Yesus supi ara mateng, "Na na o abul u ara hu'tang, namenu di e`so bang, so ob, so diailbar, sofo somang, eme so aibar med ad meng, fede' Lahtal O Bang Bolang eiy araham, ³⁰ ba e na afang rat ho med nene alihing aban fed ho'o mi, sobo sel ma'eh ho' o, sariho fetang soem med." YESUS MIN MED FETANG O MARING PA' ³¹ Horo, Yesus So sakola aibar ernu faling alo ho taunung ara hu'tang, "Alepang, Pi sam Yerusalem leam honie afangrat ba nabi nun hul olmeng fa Nameno' Ai eiy araham ho ano' an. ³² Sari name alorang med name ba e Lahtal ahol nene ho en. Sari name saming o adu' sat o a'horang, name ano' maar ano' mahip, med malei o pahur. ³³ Med name beh par no' he'e name Amine. Honi sobo, mi tareng tow he'e Sa foi Sofetang." ³⁴ Sobo, sakola aibar foi nanu di pahang nene fa afangrat ho eiy araham. Mateng pa' ho o lel supi el tafuning meng, horofe nabafe Yesus ubang eh ho supi e pahang nene. YESUS NAME ENGSAH ANO' BIRANG ³⁵ Ho araham Yesus edai sam Yeriko bang mi he'e, name engsah nu se'bur adi mimih na bang eh. ³⁶ Hoaraham name engsah alepang he'e name tofang lame alai, sa u'ta'ain nabaso ara am. ³⁷ Horo name tofang ho aramateng, "Yesus Nazaret mi ho' fa eh." ³⁸ Horo, ai engsah ho beat, "Yesus, Daud o ai nariu karang!" ³⁹ Name nun ba barmate mi lame sotur ho, ai engsah ho e'ari'ing, ahow por. Honi sobo, Sa foi beat mi kufa'ta, "Daud o ai nariu karang!" ⁴⁰ Horo yesus toh, Sa name ahow ai engsah ho ara olap ma. Ho araham ai engsah ho mang ma Olap ma, Sa atan ⁴¹ "Om naba umang e na panen ara'ham?" Ai engsah ho ubang ho, "Tuhan neiy inung ho ne'fai foi dun na'ahol." ⁴² Yesus ara mateng ubang ho, "Dun ema, o udume ano' birang am." ⁴³ So horo he'e, sa dun na'ahol, sa Yesus ata'ain, Lahtal ani utarain. Ho araham name tofang di dun na ho ahol horo he'e, supi di Lahtal ani utarain