¹ O'ataain Yesus sosakola aibar aramateng, "Foi u u'fit uil ara, honi sobo, nameba foiho ano' araho, sah karang araham. ² Mino' honi hee, baneha foi med a'fa hel, honie fitsam tangmi few, honie sahai sano' foi u'fit med aikabar kaai hoo ere'eng e'. ³ Nauma! Mangfede' idiail nu doc panen iraham honi hee, a'fom; mang fede' sa sodocho asom abole, honi hee ari uampo. ⁴ Mitata mang fede' hair nu om mi sa doc panen araham mi itito, no sabor olap ho' mi itito sa ubangho, 'Na nom abole,' honi hee, ari uampo." UDUME HO O' KUFA' ⁵ Sakola aibar Tuhan aramateng, "Ni udume foil tafe!" ⁶ Tuhan supi ara mateng, "Mangfede' iudume ho o'mate sina falei a'fail honi, itimate tufeh ho aramateng, 'Afaai homi arifet, foil sam tang mitoh,' honi hee, ti ho sa iei ataain." NAME BALETA SOTUANG EI A'LOL ⁷ "Inai homi anoso o' name karesang ei ara, sa faai bingku eh soeme, sa binangta edun eh, no' name karesangho mang butmi ho' hee, sa ara mateng, 'Ma mihe, na'de'? ⁸ Eme, sa so name karesangho aramateng ubangho, 'No namej usadia, fen puin rupa, na na'de seina eh hee, nari ubaleta. No' honi amfe a'foil na'de'? ⁹ Sa maa mahen sah ubang so name karesangho araham eme aai? fede nabafe sa u ahow hee sa panen. ¹⁰ Iridai honi. Mangfede' nabafe u ihow ipanen oham, iubangho, 'Nirihoo name karesang o'fail aai. Niriho seilal nabafe sano' ni karesang, horo nipanen."' NAME HAPE BURANG PIR ERNU BIRANG ¹¹ Salame selailol Yerusalem leamho, Yesus Sa Samaria med Galilea o tohafe lol. ¹² Sasam bang kaai numi, name hape burang pir ernu mong, elelet tufeh Sa ahol, ¹³ no, supi lofe, "Yesus, Guru, niri ukarang!" ¹⁴ Yesus dun supi ahol, Sa supi aramateng, "Isam ibo' med imam ernu e'tub." Supi seham lame eh hee, supi birang so oh. ¹⁵ Sanang ernu om miho, nusedun hee, sabirangam, horo, sasabor sa Lahtal Ani utaraain, ¹⁶ sa Yesus e'fa selmi fa ur muding sa mahen sah' ubang araham. Aiho Samaria hinung. ¹⁷ No', Yesus aiho aramateng, "Inang ernu birang em aai? Sanang tieinu taromi? ¹⁸ Supi anai homi den e sabor Lahtal ani utarain nene? seilalho name empir hooro? ¹⁹ No, Yesus ara mateng, "Toh! honie aborsam, o' udume ano' birangam." LAHTAL O'BANG BOLANG HO' O'SEL ²⁰ Farisi hinung Atan, sariho Lahtal o'bang bolang denfe ho', Yesus supi ara mateng, "Lahtal O'bang Bolang o'selho, o' utub tofang dun ahol nene, ²¹ name den e ubang, 'Edun! Lahtal O'bang ara hoomi!' eme, 'Lahtal O'bang ara hemomi!' fede' o'abultaho, Lahtal O'bang ara i ham-ham homi eh." ²² No', Yesus So sakola aibar aramateng, "Sam sel homi, sel tofang anai homi, i Nameno' Ai o'selho iom edun uma empir, sobo idun ahol nene. ²³ Name tofang maa iramateng, 'Hemo mi edun!' hoomi edun!' Sobo, i haai sam, name tofang o' matengho ataain e'." NAMENO' AI HO' ²⁴ "Sobo mangfede' laai muj, o huring burang o'tapor numi, sam burang o'tapor beng lehel, ho hee, Nameno' Ai o'sel hodi o' rupa honi. ²⁵ Honi sobo, Nameno' Ai maar mahip tofang sotur ahol, med tofang fed ei beh bahut. ²⁶ No' mang fede' selba Nuh ei zamang mi araamhoni, Nameno' Ai o'sel hodi orupa honi. ²⁷ Nameno' tofang na'de seina, sari med sari puin, sam Nuh kapala mate om lemid o'selmi, afe mate hel, sei tang lafoh supi amine bolang. ²⁸ Na an anba ara mong Lot ei zamangmi ho saraham, sel homi, name tofang na'de seina, nafel nafail, nate' na muding bang aten lelang ahome. ²⁹ Sobo, Lot mang Sodom bang homi hel lame ho araham hee, afail med tafiing bune burang muj mangfede noi mate her honie supi min bolang. ³⁰ Nameno' Ai o'ho o'ma ei sel hodi o'rupa honi. ³¹ Selho araham, ano so bang adotae, o' naernu sobang om mi, sahaai hel so naernu med nene; ano mong dil butmi hee, sabor nene. ³² Nabaso Lot o'ob araham, uma no' no'! ³³ Ano panen puin so aeng ugariang hee, o'aeng suhuin. Med ano panen puin o'aeng suhuin, honi hee, o'aeng ilmimuj. ³⁴ Na aramateng, dil paka om homi name piralo de'nu tatar. Honi sobo, nu name ara sam, nu sotar eh. ³⁵ Ob pir alo sara ala banehang eh. Name nu ara sam, nu somieh. ³⁶ [Name pir alo mong dil but mi karesang eh di honi, name nu ara sam, nu somieh."] No' sakola aibar Yesus atan, "Taromi, Tuhan?" Yesus supi aramateng ubangho, "Nahar tamaain ara taromi, honi hee, e'l mate marubain homi lubungeh." ³⁷ Horo sakola aibar Yesus atan, "Tuhan, taromi?" Yesus supi o mateng abor, "taromi na har bone ara, homi he'e el fiu sara ta'unung."