¹ Yesus so sakola aibar aramateng, "Ai kafac nuho, o'name baleta ei kapal ara. Ai kafac ho name aramateng ubangho, oname baleta ho, sa okafac nun sa mang tanai o' iphel midhel eh. ² Horo, ai kafac soname baleta o'kapal o'lofe aramateng, 'Ei araham ho nabafe apanen? Ei karesang ei arahamho, ubang na maeh, fede na ahow nona taro' saham.' ³ Name baleta o' kapalho tanut, 'Nabafe maa napanen, meng fede' name no karesang homi nadam? Na faai bingku sah, na nano name nabang lame hee, na mala. ⁴ Na aholam, nabafe maa napanen honie, nataro' o' nameho namiholong honi hee, name beng foil nari med sobangmi.' ⁵ Horo hee, nameba o' tuang o' natupingho sa olofe barpi. Name aainangho sa atan, 'A notuang o'natupingho tofang den?' ⁶ Aiho ubangho, 'Iping zaitun butiling ratnu.' O' tuping o' 'Sura' hoo med, hanoang mih honie hul ano' butiling erifing.' ⁷ No name baleta o' kapalho foil name tuping bengnu atan, 'Ei tupingho tofang den?' Aiho ubang, 'Ala balek ratnu.' No' ai nataroho aramateng, 'O' tuping o' sura' hoo med, hul ubang balek erturlo.' ⁸ Horo hee, ai kafacho, sa soname baleta o' kapal e' abul neneho utarain, fede' o' ladimang femi. Fede', pali' mate ei aibar o' ladimang fa namebeng arahamho, somi lafining lel aibar eiho emota. ⁹ Na iramateng, maro' makakang a'bul neneho ara tenang el, honie maro' makakangho, oh honi hee, name iri med bang em mi ad. ¹⁰ Mang ano horo sa na o' kaai alol ataain honi hee, na o' mimatedi sa alol ataain. Med, mang ano horo sa na o'kaai mi e'abul nene, honi hee, na o' mimatedi sa mi abul nene. ¹¹ Honife, mangfede' name iri udume ihow pali' mate o'kafac taro', honi hee, maa ano kafac so em ho med ien? ¹² No mangfede' name beng o' kafac name ihow a'dimang sobo, name e'iri udume nene, anoso maa naba o' ieiho med ien? ¹³ Name baletanu sa tuang piralo o' baleta sah, fede sanu e'ara no' nene, sobo nuho sa esah. Eme, nuho sa ei alol, sobo, nuho sa e' ei alol nene. I Lahtal med maro' makakang sobarpi u baleta sah." FARISI HINUNG AHOW NAUMA ¹⁴ Farisi hinungba seng e'sah ho, sarina hoo maeh horo hee, supi Yesus e'bit. ¹⁵ Yesus supi aramateng, "Iriho, ibobom iabul bit nameno' araham homi, sobo Lahtal iom o' abultaho ahol, fede' nameno' anaimi a'foh a'tel eho, Lahtal afah aloil araham homi. ¹⁶ Sura' Taurat med nabi ernu o'sura' mi, umateng ulurung sam Yohanis ho mimeng; Yohanis homi, Lahtal O'bang Bolang, o' Hamoi No' barpi ubang oh, nameno' tofang u salolom honie om lemid. ¹⁷ Sobo, o' abulta, burang faai suhuin no', sobo Taurat sura' om miho, laan pite'di suhuin sah. NAME SAD HO EI ARAHAM ¹⁸ "Nameba so ob ad, foil ob beng ara nikaho, sa ob bar o' a'hal. Med nameba sa obbarba o'lote adho ara nika, saridi obbar o' ahalho sa panen." NAME KAFAC MED LAZARUS ¹⁹ "Ai kafac nuho, fen duil ow med napah lel madal horo puin sei masing, sa kafac mi bad herang sel arian. ²⁰ Ai kafac o' sear matehomi, ai sah lahalnu ani Lazarus homi tareh, a'fah a'hir eme o' bo' mateho bah panaking afeng. ²¹ Sa udumeho, naba namej horo ai kafac o' meja hota laher hel honi hee, sa ade; no' hee bel tofangdi ho' o'bah ho laleng. ²² Selnumi, ai lahalho min, malaikat tofang ara sam Abraham apot ta amihing. Name kafac hodi min, name apot. ²³ Pong lafo pakami, name ari asara, ai kafac dun mid hee, Abraham mong letsah mieh, Lazarus a'pot tamieh. ²⁴ Horo, ai kafacho lofe, 'Nimang Abraham, nari ukarangfe, Lazarus a'how satang pa' med sei mie, med nalibung ano' harfe, fede na afail huring om hoomi na rac ma eh.' ²⁵ Sobo, Abraham ubangho, 'No ai, adai fetang om mi ho uma, na o' no' ham amed, sobo Lazarus sah karang tofang med; fed hoo, Lazarus bad herang, sobo ariho maar mahip. ²⁶ No' hee, mol ulnu ara tanaihomi, satabaang, honie name hoomi, molho lefa elemeho, lefa feho, fa sah, med name eleme homi ma niolap mafe honi ho, sa molho la ma sah.' ²⁷ No' ai kafacho ubang, 'Ho hee, na abang Nimang, Lazarus ahow sam nimang o' bang leam, ²⁸ fede' no diail lotebar pir ifihing dai. Honie Lazarus supi ano' uma, honie sel maeh supi haai maar mahip eleme hoo leho' nene.' ²⁹ Sobo, Abraham ubangho, 'Supiho Musa o' sura' bolang med nabi tofang o' sura' ara, barpi maa supi homi e'dun a'holam.' ³⁰ Ai kafac foil ubang, 'Aai, Nimag Abraham. Mang fede name min nuso ho' supi abung, honi hee supi som afom.' ³¹ Abraham ai kafacho aramateng, 'Mang fede o'diail nunho Musa o' Sura' bolang med nabi tofang o' sura' ho supi alepang nene, supi o' atino' bit nene, name min anai homi pirnu sofetangdi supi e' o' a'tino' bit nene."'