¹ Name lafung fali med ei, med name doc ho' Yesus abung O' mateng alepang. ² Horo hee, Farisi hinung med Taurat o' name omhul nun ma' urung manac, "Ai hoo name doc ahal ara taunung, o' mitata ara na'de." ³ Horo Yesus upapain hoo usupi aramateng, Sa ubang ho, ⁴ "I nai homi ano so o'nub pir ratnu, honie pirnu suhuin, sa pir ertieinu faling tieinuho med admeng nene? Honie sam pirnuho lap sam aholem aai? ⁵ No sasam ahol honi hee, sa sonub ho a'foh sabareta, apa no' empir. ⁶ Sasam bangmi, sa sodiail bar, nameba o'bang abung nun ho sa emaring, ubangho, 'I'ho' nara loil asal, bad herang, fede' no nub suhuin ho nalap aholam.' ⁷ Na iramateng, name doc pirnu, sa pir ertieinu faling tieinu o'anai homi som afom, honie hee, bad herang somimate ara sorgami. SENG HIR PA'NU SUHUIN ANO' UPAPAIN ⁸ Eme ob bar taroso o'seng hir pa' ernu, mangfede pa'nu suhuin, maa sa lampu a'lel, bang omho sona parin honiamfe sa kilang-kilang sengho lap sam aholem aai? ⁹ Salap ahol horo hee, sa sodiailbar med name o'bang abung nun sa aramateng, 'I'ho' nara bad herang fede, noseng hir suhuin ho, nalap aholam.' ¹⁰ Na iramateng, name doc pirnu som afom honi hee, malaikat tofang bad herang empir." AI LOTE PIR ALO ANO' UPAPAIN Aidi' Somang Admeng ¹¹ Yesus foil ubangho, "Ai tumo'nu o'ai lote piralo. ¹² O'ai di'ho somang aramateng, 'Nimang, kafacba o'neiho dalam nen.' Horo, omang kafac ho dalam sonalo en. ¹³ Lufang nene hee, ai di' sei naernuho taunung, safisam pali' let leam homi puin bahite sanang-sanag. ¹⁴ Sahemomi so naernu med dilbang mibahite oh honi hee, pali'ba samiho malihing mate hel, honie safasah masaham. ¹⁵ Horo, sasam name homi nu o'karesang, sari aiho ahow sam but leam soboi ah. ¹⁶ Tipir boi en eiho, om ade uma sobo, nameden e'med en nene. Aidi' Sabor Somang O'lap ¹⁷ Ai di'ho om midil uma, sa ubangho, 'Nameba nimang o'karesangho tofang o'sah, supi na'de seina a'lihing a'ban, sobo na ho'omi dele malihing min. ¹⁸ Natoh, nabor nimang olap sam. Sam na nimang aramateng ubangho: Nimang, na doc panen sorga bang, med araham homi am. ¹⁹ A nolofe o aiho, e sari neneam, honiba A nano' oname baleta ei namenu.' ²⁰ Horo satoh, sa sam somang o'lap. Sobo sa sam dai let hee, omang dun ahol, omang om esah empir, omang teeng sam afakok amuning. ²¹ Horo, aikaho somang aramateng, 'Nimang, na doc panen sorga araham med Aridi araham. Anolofe oai fehoniho, e tamuj neneam.' ²² Sobo, omang soname baleta nunho aramateng, 'Hano ang! Kod mate o'no' horo med en mang. Il med atangpa' mi, sendal med e'fa tamang. ²³ Sapi o'ai ma un ho amine. Mae pi bad herang, ²⁴ fede, no aiho minam sobo sofetangam! Sa suhuinam sobo, fed aholam! Horo hee, supi bad herang." Ai Matu Somang E' ri'ing ²⁵ Selhomi, ai matu mong dilmi, horo sa ho' bang abung, sa alepang hee, na amang-amang ernu, med name sabea honiho o'amang o' ba ab sa maeh. ²⁶ Horo sa name baletaho nu o'lofe atan, nabaso ara bangmiho utaain. ²⁷ Name baleta aramateng ubangho, 'Odi' ho'am, no' imang sapi ai maun amine, fede sa no' ham puin sabor.' ²⁸ Sobo ai matu ariing bang om lemid nene, horo omang hel a'hen a'mone. ²⁹ Sobo, sa somang aramateng, 'Na okaresang tun arian, oparenta na e'den lafang nene, sobo a abib ainudi e' nen napuin no tenang el bar ara diang puin dai. ³⁰ Sobo, oai sei naernu fisam obbar ara sah panen oh, sabor honi hee, asapi ai maun dang med ereeng.' ³¹ Horo, omang aramateng ubangho, 'No ai, ariho nara sel ari an, no kafac ernu na ona. ³² Sobo, fed hoo pi sodiang, pi sobad herang, fede odi'ho minam, sobo sofetangam; sa suhuin am, sobo fed aholam.'''