¹ Ho araham Yesus dun heto lemid, Sa edun name kafac pirde'den so persembahan med persembahan eleme mi. ² Saridi name alofe lahal nu edun he'e seng tembaga keping alo med om mi ³ Yesus ubang ho, "Na na'o abul fe bit iraham, alofe lahal ho'o sa sei mi lafoh med en name kafac nun eiy ho emota. ⁴ Asel, supi so kafac o lafoh ata'ain persembahan med en, sobo alofe ho'o sa kurang bo' fe puin persembahan med en, mang fede' o na an-an ba puin so fetang u'hamou eiy." PALI' DOD O USULU ASALA ⁵ Ho araham sakola aibar oin nu Lahtal O Bang ba foi o rupa bi nun fe puin pasagi, med Persembahan nun ho supi u hu'tang eh honi he'e, Yesus ubang ho, ⁶ "Sam osel mi honi he'e, na barpi ba i edun eh ho'o tama'ain oh. Foi nun ba sari ta tuh-tu feh ho ha ai bite e tarutung nene." ⁷ Horo, Sakola aibar Atan, "Guru den fe naho ara? med naba usulu-asala so sano se'bur nu fe naho ara?" ⁸ Yesus o abor, "Uma-ma eh honie i ha'ai osah mi muj e asel name lafoh ho' nani puin e ubang ho, 'Nari horo Sari, med 'osel fanang am,' ha'ai i supi ata'ain e. ⁹ honi sobo, ho araham i maeh he'e bite mali eh med so harofan eh, i ha'ai baroc e asel usulu-asala horo musti sotur ara fe, sobo o noam ho e hanoang ma daiy." ¹⁰ Horo he'e Yesus supi ara hu'tang, "Pali' mate sahirtoh sari lafang med bang pali' sahirtoh sari lafang. ¹¹ Pali' mate di musti ladi'din empir', malihing sah, med mode afang-afang pali' arian. Sobo na o empir nun ba tano' baroc tafah u'aloiy eiy ho med usulu-asala mate tong burang ta hodi musti ara. ¹² Sobo, na' ho'o barpi e ara daiy he'e, name no' nun musti i'puin iri beh par. Supi musti ilorang med a'ome bang arian no' iri med hukung bang nun arian. Supi di iri med fisam afen mate nun med afen ka'ai abung asel ba Nani ho. ¹³ Sobo, sari na ho,o sano' se'bur nu honi ea'u hu'tang ei. ¹⁴ Honin fe, om ho ano' tining ha'ai na'an-an ba u tanut e bit ari u alang fe ho utanut e, ¹⁵ asel Na ma' mateng, med no' ham ba name lafang sah med o falefang nun u tetang sah ho med en ¹⁶ Iri ho ife imang, diail lote bar, lelang bar med i tenang el bar musti ira sah, med supi pasti i nai homi, iname nun hodi amine. ¹⁷ Name barpi musti ira sah asel ba Nani. ¹⁸ Honi sobo, o ari' nemang pa'nu di e elafung homi muj nene. ¹⁹ A om tahang fe mi, a musti o fetang ho med am." YERUSALEM BUTUNG BALA O MARING PA' ²⁰ "Honi sobo, ho araham I Yerusalem o kota edun soldaj lubung-lubung ho' fading, i musti ahol o butung bala ma' fanang am. ²¹ Ho araham, name nun ba Yudea pali' mi supi musti te'eng doiy tamid, name nun ba kota om mi supi musti kota homi hel luling lehel, med name nun ba desa ari'an ha'ai kota Yerusalem lemid e. ²² horo haer hukung o sel honie na an-an ba hulam ho ano' an. ²³ Ob bar nun ba afo'oi eh med to ai en na eh ho ma'ar mahip med sel ho mi, asel susa malo mate ara pali' ho'o ta, med ari'ing fail mate bang pali' ho'o ta. ²⁴ supi ho name neiy puin amine med bang pali' nun supi tahang. Yerusalem bang pali' ho bang pali' beng so ho' ano' seiy sam supi o rupa senang ho so lamouw." NAMENO' AI LEL MADAL MI HO' ²⁵ "O usulu asala ara mong fed mi, ul mi, med ibing nun mi. Pali' mate mi, bang pali' baroc banibung om mi fa tang o ari'ing fail med bob mate araham. ²⁶ Nameno' nun tasibung asel baroc fa afang rat ba ara pali' ho'o ta, asel malang ernu ba burang mi barpi od farufing. ²⁷ horo he'e, supi Nameno' Ai edun ho'ma malang med lel mate ara tafi'ing om mi ho'. ²⁸ mang fede' afang rat ho'o ara am, toh e elafung atel, asel sel ano' il eiy ho ho' fanang am." TI ARA O UPAPAIN ²⁹ Horo he'e Yesus o u papain nu u supi ara hu'tang: "Edun ema ti ara med ti beng nun barpi. ³⁰ Mang fede' ti nun ho obeh nun abow am, i pahang no' fede' i ahol he'e fed dang osel fanang am. ³¹ honin di mang fede' i edun barpi ho ara am, i musti ahol bite Lahtal eleme elafeng ho' fanang am. ³² O abulta ho Na u ira hu'tang, eka'bar fed ho'o e min nene sam afang rat ho'o barpi ara. ³³ Burang med pali mate sa suhuin no', sobo No mateng pa' ho'o e sam suhuin nene." BUANG SADIA HORO SEI MASING ³⁴ "U bu-buang honie, om ho ha'ai afang rat ba o om uma ei fa diang mi, tabur labow mi, med om panep fa fetang mi, ha'ai om ho afeng e. Asel sel ho, ho' ma' orupa behang meng honi. ³⁵ Asel, sel ho ho' ma afang rat ho ta med oba pali' mate ta fetang eh ho' o mi. ³⁶ U bubu'ang sei masing sel arian med a'ome horo bit honie i kufa' med ino' il luling fa afang rat osah barpi ba ma' ara fe ho, med Nameno' Ai apong adang toh." ³⁷ Dil lel om mi, Yesus nameno lafoh gur pel Lahtal o Bang om mi, sobo dilpana he'e Sa kota elet sam Zaitun doiy ta. ³⁸ Med, lalami, nameno' barpi ho' Abung ma Bang bolang om mi O hu'tang alepang.