¹ Name pir nu alo ara homi, supi Yesus ara mateng sariho, Galilea hinung o foi Pilatus med supi o'naernu fitho' Lahtal en eiho, ara taunung ei araham ho ubang. ² Yesus supi aramateng; i utanut ho, Galilea hinung hoo, o doc mimate Galilea hinung beng ei emota, fede supi maar mahip a,hol hooni? ³ Na iramateng; aai. sobo mangfede ie iom afom nene, iridi barpi min. ⁴ Eme, name pir ernu faling turlo ei araham, supi min asel bang ai lebang mong sei bari siloam abung ho ol supi tahel, i utanut ho, supi o, doc somisah name mong Yerusalem miho, o, doc mi emota? ⁵ Na ira mateng; aai. sobo i iom afom nene, i barpi min. TI BA E HIL NENE ⁶ Yesus foil upapain hoo ubang; Ainu a, ong sel nu med so anggur dil mi muding. Sobo o selmi sa ho'aong ho o'pir lap he, pir aai. ⁷ Horo sa name dil bu'ang ara mateng; na ho ti hoo o'pir lap tun towam, sobo pir nu di Na e ahol nene. Ti ho abooi few! Taro'ni faai ho ano'na mangtanai med ti'ho e'reeng? ⁸ Honi sobo, name dil buang u'bangho; Tuang, ti'ho u'ad foil tun'nu ta honi e sa hil. Dai sei honi, na faai efading ho arung e dafang mi, ⁹ maa tun'nu he'e,ti ho hilam. Sobo foil hil nene he'e, Tuang a'booi. HAIR SAH ARAHAM,YESUS NAME ANO'BIRANG ¹⁰ Minumi hair sah araham, Yesus a'ome bang mi name afom' apahang. ¹¹ Name ob nu homi,roh sah tamang horo'fe,sa mode tun ernu faling turlo am. Ai ob ho amot turung sa abul toh sah. ¹² Yesus dun ahol horo sa o'lofe ara mateng, "Hoi, name ob, o mode ho a u ilam". ¹³ No' Yesus satang arita puin, mang homi ai ob ho a'bultoh, sa Lahtal ani utarain. ¹⁴ Honi sobo, a'ome bang o'buang a'riing, asel Yesus hair sahmi name ano' birang. Sa name tofang ara mateng; Tareng talang om mi horo karesang. Honife, sari tareng talang ommi horo name ano'birang, haai hair sah ommi e'. ¹⁵ Sobo Yesus aiho aramateng; Iriho name ladimang labor o'name.! Isapi eme, inub fomi, hair sah om mi isam baring hel a'rasam sei en na eme aai? ¹⁶ Ai ob hoo Abrahan o'bap o'bale, setang apec tun ernu faling turlo ommi am, honie sari hei hoo hair sah ommi afetang few sah? ¹⁷ Yesus mang u'bang honi he'e, o'Ari lafang barpi mala, name tofang bad'herang, a'sel Yesus natahoir tofang panen. SINA FALEI A'FAIL MED ROTI O'NA A'FAIL A'NO U'PAPAIN ¹⁸ N'o Yesus u'bang ho; sorga bang ho mang fe'de naba honi? Naba honi horo ma'a na med a'no u'papain? ¹⁹ Sorga bang ho mang fe'de sina falei a'fail honin, name med so but mi te;sa abouw madong sa'no'ti mate, hiw lelang aer'nu abale ta so barang pec. ²⁰ Sa foil u'bang; naba fe Na a'no bang bolang o'upapain? ²¹ Lah'tal O'bang bolang ho, mang fe'de'roti o'na'fail honi, name ob nu med tarigu kilo tow ara a'bal, sam tarigu so'barpi latel. KURANG'ALE IL'LULING MED ²² Yesus lame bang mate lelanglai, med bang ka'ai lelang kurang, Sa barpi mihul mihanang, Sa fom pa bolang u matenglame, sam yerusalem u talel. ²³ Horo name nu Atan; Tuhan, name il'luling med ho o'kurang'le? Yesus supi aramateng barpi u bang ho; ²⁴ Atino' lap honi'e se'ar kapuh ho lol mid'no; honi'fe Na i'ramateng, name tofang sari s'ar ho lap te'eng honi sobo supi med sah. ²⁵ Mang fe'de bang a'neng toh so se'ar tel, sobo i'ri ho luling mi toh, se'ar afaw u bang ho; Tuang, niri u'karang se'ar during ni'en. Sa u'bang ho;i taromi ho'so fe, Na e'ihol nene. ²⁶ No' iu bang honi A'ra ham-ham na'de sei'na.A ni'no na'ahol mong ni bang o'se'bur a'rian. ²⁷ Honi sobo Sa u'bang ho; Na e ihol nene,no' i taromi ho'Na e'ahol nene. Na'pong fa'araham homi toh'e'ba sam, i'ri barpi na'sah fe panen! ²⁸ I'dun Abraham, Isak, Yakob med nabi ar'nu so barpi ahol, supi ara Lahtal o bang bolang mi'eh honi' he'e, i ahain i'fing'ir, name i'ri few luling le'hel. ²⁹ No' honi he'e, name'no tofang fed'po' fed'muj, fi'ing lol tani lol'ho; supi Lahtal o'bang bolang om mi'mih na ade. ³⁰ So ati'no; name so'fe' foil so tur, name so'tur'ho foil so'fe; YESUS UIL SAM YERUSALEM LEAM ³¹ Selhomi, Farisi hinung oi'nu ho' Yesus Abung Ara'mateng; A'sam pa'li ho'o e let, fe'de Herodes A'mine u bang eh. ³² Yesus u'bang ho; A'sam, ai'ba sah karang fe panen o'mame'ho aramateng; Fed med dil'lel ho, Na roh sah tofang atetel, med name mode a'no birang, med hair o'mi tow mi'ho, Na No karesang an'o an. ³³ Honi sobo, fed, dil'lel, med a'lo, Na'no lame u'hamow, fe'de nabi'nu, sa yerusalem a'mot mi'min nene. ³⁴ Yerusalem, yerusalem! Nabi ernu i'amine, med name ba tahow i'en ho i'od! o'ai bar Na ta'unung nom u'ma ta'lame'lol, mang fe'de hiw ow so ai med safitang far honi. ³⁵ Fed i'bang so'oh tining rameng.Na ira'mateng; i foil dun Nahol nene, sam o'sel mi, i'ma'a ubang ho; Ai'ba Lahtal ani miho' ma'ho, untu ara arham.