¹ Yesus lame eh om mi, Sadun aiba afainta engsah ho ahol. ² Yesus o'sakola aibar Atan, "Guru, anoso doc, ai hooro eme ofo omang sofe, aihoo afain hee engsah?" ³ Yesus ubang, "Ai hoodi aai ofo omangdi doc nene, sobo honie sa Lahtal o' karesang ara pali' mate hoota. ⁴ Pi uil-uil Aiba Nahow ho' hoo, o'karesang ernuho, dil dai lel ehta panen; sobo dilpakaam hee, name nudi karesang saham. ⁵ Na dai pali' mate hoo taeh honi hee, Nari horo pali' mate o'lel." ⁶ Sa mateng honi no', Sa sat malei faai tapuj Sa ano' parot, Sa med aiho e'fail abir, ⁷ sa ara mateng, "Sam, Siloam mi foil." Siloam o'lel ho hee Tahow." Horo, ai sam sapong harang, aiho sabor ho' hee, sadun na'holam ⁸ Name a'bung nunba, turmi ahol sariho engsah, supi ubang, "Ai horoba sel a'rian mih nabang eh hoe?" ⁹ Den ubang, "A'bul, sari horo nabang o'name." Den ubang, "E'sari nene, ai ho o'araham so." Sobo, aiba fede engsah ho ubang, "Abul nari horo name nabang eh ho." ¹⁰ Horo, name atan, "Taro' nife e'fail dun na aholam?" ¹¹ Aiho ubang, "Ainu ani Yesus Sa sat malei puin faai ano' har Samed ne' fail abir. Sa nahow, 'Sam Siloam mi foil', horo nasam foil hee, nadun na'hol." ¹² Supi atan, "Aiho taromi?" Sa ubang, "Na ahol nene." ¹³ Horo, supi aiba turmi engsaho ara sam Farisi hinung abung. ¹⁴ Sari sel Yesus mi ai engsah ano' dun na'hol ho, hair Sah. ¹⁵ Horo, Farisi hinung foil aiho atan taro' nife sadun na'hol. Sa supi ara mateng, "Aiho sat malei puin faai ano' har med ne'fail abir, Sa nahow sam foil, nasam foil horo nadun na'hol." ¹⁶ Horo, Farisi oinu ubang, "Aiho e' Lahtal miho' nene, fede sa hair Sah e' ataain nene, Sa lafang." Name beng ubang, "Honi sobo, name doc honi hee, naba eife natahoir hooni sapanen no'?" Horo hee, sel teeng sari few supi anai homi latel. ¹⁷ Horo, supi foil ai engsah ho atan, "Ei tanut mi Sari Aiho taro'ni, fede Sa e'fail ano' lelam?" Sa ubang, "Aiho nabi nuso." ¹⁸ Ai engsah ba dun na'holamho, Yahudi hinung o'atino' bit nene. fede aiho engsah sobo fed sadun na'holam, sam supi foi ai engsah ofo omangdi foi olofe, ¹⁹ Supi foil aiho ofo omang atan, "Ho'oro i aiba i ubang afainta engsah ho? honie mitaro'ni fed sadun na'holam?" ²⁰ Ai engsah ofo omang supi ara mateng, "Ni ahol ho'oro ni aiba afainta engsah, ²¹ Sobo taro' nife fed sadun na'hol, niri ahol nene; eme anoso e'fail during, ni ahol nene. Sarife atan, saridi mateam, sa maa sobobom sari bitam." ²² Aiho ofo omang bit honi, asel supi Yahudi hinung ubaroc. Fede, Yahudi hinung somnu, honie anoso Yesus o'atino' bit ubang sari horo Kristus, honi hee supi aome bangmi ebit eng el. ²³ Horoba ofo omang ubang, "Saridi om ara amba, sarife atan." ²⁴ Horo hee, Yahudi hinung ai engsah foil olofe omi alomi, supi ara mateng, "Lahtal a'foh a'tel, ni ahol Ai hoo name doc." ²⁵ Sa o'abor, "Aiho doc soem aai, na ahol nene; nanu' le na ahol, sariho turmi ne'fail sah, sobo fed nadun na'hol." ²⁶ Supi aiho atan, "Nabafe Sa panen araham? Taro' nife Sa e'fail ano' lel?" ²⁷ Sa nameho ara mateng, "Na iramatengam, sobo i e' alepang nene; taro' nife iom foil alepang uma? Iridi ino' O'sakola aibar uma?" ²⁸ Horo, supi aiho e'bit ubang, "Ariso Aiho o'sakola, Niriho Musa o'sakola. ²⁹ Ni ahol Lahtal Musa ara matengam, sobo sari Aiho, Sa taromi ho' so hee ni ahol nene!" ²⁸ horo he'e supi ano' sah-sah , "iri horo name ho o sakola aibar ho, sobo niri ho Musa o sakola aybar. ²⁹ Ni ahol he'e Lahtal Musa ara hu'tang am, sobo sari aiy ho , taromi ho' ni e ahol nene ³⁰ Ai engsah fede' supi ara mateng, "So empir atino' Aiho taromi ho' i ahol nene, faleng Sa ne'fail ano' lelam. ³¹ Pi ahol Lahtal name doc ei ma'eh nene, honi sobo mang ano horo Lahtal el baroc med Ei om sa alol panen, Lahtal ei alepang. ³² Mong turmi sam fed ho' mimeng, namenu sa name afainta engsah ano' lel ho pi ma'eh dai. ³³ Mang fede' Sari Aiho e' Lahtal miho' nene, honi hee Sa nanudi panen sah." ³⁴ Yahudi hinung aiho ara mateng, "Ariho doc tofang mi afain hoe, a'nira sakola?" Horo, supi aiho atetel. ³⁵ Yesus ma'eh hee Yahudi hinung ai engsah ho atetelam, horo hee seh-seh Yesus sam ahol, Yesus ara mateng, "A Nameno' Ai o'atino' bitem aai?" ³⁶ Aiho ubang, "Aiho ano, Tuhan, honie na O'atino' bit?" ³⁷ Yesus ara mateng, "Adun Aiho a'holam. Sari Ai horo ara mateng eh hoo." ³⁸ Aiho ubang, "Tuhan, na O'atino' bit!" No', sa E'fa selmi fa ur muding. ³⁹ Yesus ara mateng, "Abul lap ahal lap fe horoba, Na pali' mate taho' honie supi dun na'hol nene dun na'hol, med supi dun na'hol, ho e'fail sah." ⁴⁰ Farisi o' name oinu a'bung homi sari naho ma'eh, supi A'ramateng, "Honife Niridi nie'fail sah?" ⁴¹ Yesus supi ara mateng, "Mang fede' ieng sah, honi hee idoc aai; sobo iubang, 'Nidun na'hol', honidi idoc so ara eh."