¹ Yesus ubangho,Na ira mateng a'bul,nameba fo om lemadong ho sa e'fo sear lol nene,sa fofe lol madong fo om lehel,honi hee'sariho ta'u dur tot kalaping o'name. ² . Sobo nameba fo se'ar lol fo om lemadong honi hee'sari ai horo nub o'bu'ang. ³ Name se'ar bu'ang se'ar during ere'eng,nub tofang amader ma'eh,no he'e,Sa sonub ani ulofe a'ri'an,Sa e'puin atang puin luling lehel. ⁴ Sa sonub barpi ara hel,no'hee' Salame sotur o'nub ata ain,fede' nub ernu amader ma eh. ⁵ Name empir supi e'a'taain nene,supi el te eng,fede'name empir nunho,supi amader ahol ma eh nene. ⁶ Upapain hooro Yesus usupi a'ra mateng,sobo nabafe Yesus usupi a'ra matengho,supi o'lel a'hol nene. ⁷ Horofe, Yesus foil supi a'ramateng; Naatitino'iramateng, Nari horo nub tofangho o'se'ar. ⁸ Nameba Na e' ho' dai honi hee sotur ho',sari nameho ta'u dur tot kalaping o'name,sobo nub ernu e'supi ei ma'eh nene. ⁹ Nari horo se'ar. Mang fede'namenu fo om lemid sa Nalai, honi hee,sari aiho il luling med, bno'hee sa mid e' hel e' ho, sa labala ahol. ¹⁰ Ta'u dur o'name ho'ho, ta'u dur amine a'tubing uho'. Na ho' honie, supi fetang med sei ano' somi alihing aban. ¹¹ Nari horo bu'ang no'; bu'ang no' so a'eng a'lorang med sonub tofang e're eng. ¹² Name seng lap,e'nubho o' bu'ang nene, med e'nubho o'aneng nene,supi dunfe binangta a'riing maeh honi hee,supi nub nunho med admeng, supi te eng horo hee,binangta ariing nub nunho mimuj, nub nun tabite te eng oh. ¹³ Sa te eng fede' sa sengfe lap,sobo nub nunho sa e' edun nene. ¹⁴ Nari horo bu ang no. Na nonub ernu nona ahol,nonub ernudi Nahol, ¹⁵ o'a'raham mang fede'Nimang Nahol, Na Nimang a'hol, no'honi hee,Na no aeng a'lorang med Nonub nunho e're eng. ¹⁶ Nonub bengdi a'ra, sobo supi e'fo om hoo mi nene,hodi Nasam lap ara ho' honi supi Namang ma eh, honi supi nub beng a'ra tohuil med supi o'bu angho nu'le. ¹⁷ Hooro eiba, Nimang Nari ukarang, asel Na no aeng a'lorang, honie Na foil nona med no'. ¹⁸ Nameden Naputang med sah,honi sobo Nariso a'lorang Notanutho a'ta ain. No aeng Na a'lorang, no'Na foil nona med,barpi a'ra natang om mi. Hooro Nimang o'parenta Na a'bung med. ¹⁹ Tari' tabite foil a'ra Yahudi hinung o'a'nai mi latel,asel Yesus o'mateng pa'hoo ei a'raham. ²⁰ Yahudi tofang ubangho,roh sah Ari tamange sa taburam so.Nabau i ei alepang? ²¹ Name beng ubangho; Nameba roh sah tamang o'mateng e' honi nene. Roh sahdi name e'fail sah ano' dun na'hol no? YESUS MED OMANG NU'LE ²² Sari selho a'raham Lahtal o'dor ano' bolang o'hair mate,Yerusalem mi panen. Selhomi noi her, ²³ Yesus a'ra Yerusalem bang om mi,sariho bang om hataden Salomo eihomi. ²⁴ No' Yahudi hinung ta'unung Ari fading,supi ara mateng; A ni laman a'no' lafefa' maa o'lufang den ta? Mang fede' Ariho Kristus so honi hee,A bit a'no' lel ni ma eh. ²⁵ Yesus supi a'ramateng; Na bit ira mateng am sobo, i e'o'a'tino' bit nene. Karesang ernuba Na Nimang animi panen, sari horofe Nei narahamho umateng eh. ²⁶ Honi sobo i o'a'tino'bit nene,bfede' iriho,e'Nei nub aibar a'ra ta an nene. ²⁷ Nei nub aibarho supi Namang ma eh, Na supi a'hol, no' supi Nata ain. ²⁸ Na fetang so em med supi en, suhuin aai supi a'hol nene,med name nudi Natangmii utot med sah. ²⁹ Nimang supi med nen somi mate beng e'mota,no'hee ano horodi Nimang a'tangmi supi utot med sah. ³⁰ Nimang ninanglo ho,namenu. ³¹ Yahudi hinung foil foi med Yesus od minuta. ³² Sobo Yesus supi a'ra mateng ; Na Nimang o' karesang no'tofang Na ietubam,karesang taroso anai homi iom a'lahainba,ifoi med nod eham? ³³ Yahudi hinung a'ramateng ; E'karesang no'nu ei a'rahamfe,ni od nene sobo,sah mareh bit,med Ariho nameno' nu sobo,afah ahir A'ano' Lahtal. ³⁴ Yesus supi a'ra mateng; A'ra isura' Taurat mihul ubang,Na fompa'mi ubangam,iri horo lahtal honi eme aai? ³⁵ Mang fede' Lahtal ubang,supi fompa' medamho lahtal,honi faleng, sura' bolangmi a'no' suhuin sah, ³⁶ maa Aiba Omang a'no' bolange, tahow pali' mate en horo iubang Lahtal e'bit, asel Na iramaten ubang, Nari hooro Lahtal o'ai honi horo? ³⁷ Mang fede' Nimang o'karesang Na panen nene,honi hee ihaai No a'tino' bit. ³⁸ Honi sobo mang fede' karesangba Napanen,i e'No a'tino' bit nene,honi hee'karesang ernu horo i o' a'tino' bit,honie i a'hol, Na a'ra Nimang om mi,med Nimang a'ra Nom mi. ³⁹ Supi foil Yesus a'puin usapate sobo,supu a'puin sah, Yesus il. ⁴⁰ Horo Yesus foil sam Yarden mol denle leam,sari hoo, tur Yohanis eleme sami name a'foil o'aainang,sahomi seleme med. ⁴¹ Name tofang o'lap ho' supi ubangho ; Masiki Yohanis natahoir den panen nene sobo,Ai hoo ei a'rahamba, Yohanis ubang eh ho barpi a'bul. ⁴² Horo name tofang hemomiho,o'a'tino'bit.