¹ Honin sobo, Yesus Zaitun doi taam. ² Mang lalami, Sa ho' Lahtal O'bangmi, name tofang olapho'. Samih nameho ara sakola. ³ Horo Taurat o' name omhul, med Farisi hinung, supi ai ob nu ara ho'. Ai ob ho ahal panen eh supi ahol, supi med ham mi atuhuin, ⁴ Supi Yesus ara mateng, "Guru, ai ob hoo, nasah panen ehfe, ni ahol apuin. ⁵ Hukungba Musa o'sura' Taurat miho, uniri parenta, nihow foi puin ob bar o' ho'oniho od. Ei tanut taro' ni? " ⁶ Supi bit honi puin Yesus apate, honie ano' supi o'kufa, supi puin Yesus ano' ahal. Honin sobo, Yesus li' hel Satang pa' puin faai hul. ⁷ Sobo supi A'tan sei masing horo, Yesus satel toh supi ara mateng, "Nameba inai homi doc panen neneho, sa sotur foi med puin ai ob ho'o od." ⁸ No' Yesus foil li' hel faai hul. ⁹ Supi mang na hoo ma'eh horo hee, supi nusam nusam, o'sotur saborho, tumo'bar, honie Yesus med ai ob fede ham mi tufeh horo solo dai. ¹⁰ Yesus sahir toh, ai ob ho ara mateng, "Hoi ai ob, supi taro' lol sam oham?" Nameden e' ari hukung nene?" ¹¹ Ai ob ubang, "Aai, Tuhan." Yesus ubang, "Naridi e' ari hukung nene. Abor sam, honie fed ho'omi, haai doc panen e'." YESUS PALI' MATE O' LEL ¹² Horo, Yesus name tofangho ara mateng, "Nari horofe pali' mate o'lel. Nameba Nataainho, sa e' pakami lame nene, sobo aiho ei lel fetang ara." ¹³ Horo, Farisi hinung Yesus ara mateng, "Ei araham horofe Aubang, honife O'matengho e'abul nene." ¹⁴ Yesus supi o'mateng abor ubang, "Na Nei Nafah Nahir horo Na ubang sariho abul, fede' Na ahol Na taromi ho' med Na taro leam, sobo Na taro miho, med Nataro leam, i e' ahol nene. ¹⁵ I bo' mate puin a'bul ahal lap, sobo Nari hoo, e' name o'abul ahal lap nene. ¹⁶ Sobo, mang fede' Naridi so abul ahal lap feso, honi hee Na abul ahal lapho atino' fede' Na e' nolo abul ahal lap nene, sobo Nimangba Nahow hodi ham-ham ara Nara. ¹⁷ Omitata, o' Sura' Taurat hul ubang, Name alo ta a'hol ta ma'eh ho abul. ¹⁸ Na Nafah Nahir hoo umateng, asel Nimang u Nahow." ¹⁹ Horo, supi Atan, "Imang ara taromi?" Yesus ubang, "I naridi nahol nene Nimangdi i ahol nene, mang fede' i Nahol, Nimangdi i ahol." ²⁰ Yesus na taro' eleme abung femi mateng pa' hoo bit, sobo nameden Apuin nene, fede' e' O' selmi dai. YESUS SOMANG EI ARAHAM UMATENG ²¹ No', Yesus foil supi ara mateng, "Na maa iad meng, i maa Nari lap, sobo i maa idoc omho mimin. Na taro lol sam, i Nataain sam sah." ²² Horo, Yahudi hinung ubang, "Aiho om samine umaso afah? Fede' Sa ubang, 'Na taro lol sam, i Nataain sam sah'?" ²³ Honi sobo, Yesus supi ara mateng, "Ipong lamangmi madong, sobo Nari tong lafining mihel. Iri pali' mate ei, sobo Nari e' pali' mate ei nene. ²⁴ Honife Na iramateng, i doc om mimin, fede i No atino' bit nene, honi hee i doc ernu omho mimin." ²⁵ Horo, supi Yesus Atan, "Ariho anoso?" Yesus supi ara mateng, "Miturmi Na uira matengam. ²⁶ Natofang iei iraham Na uil iramateng med uhu' utimba, sobo Aiba Nahow ho abul med nabafe Na Abung ma'eh, horo Na ubang med pali' mate en ma'eh." ²⁷ Yesus Somangfe usupi ara mateng eh sobo, supi o'lel ahol nene, ²⁸ Horo Yesus ubang, "O'selmi i Nameno' Ai ano' lafining, sel homi horofe i ahol Nari horo sari, mang naba horodi, Na Nobobom panen sah, sobo nabafe Nimang u Netub, horo Na ubang. ²⁹ Med, Ai Nari tahow ara ham-ham Nara, Sa e' nolo nad nene, fede naernuba Napanen sei masingho om araham." ³⁰ Yesus naernu barpi umateng eh om mi, name tofang O'atino' bit. ABRAHAM O'AIBAR MED SETANG O'AIBAR ³¹ No', Yesus sa Yahudi hinungba o' Atino' bitam ho ara mateng, "Mang fede' iso ara No fompa' om mi, iri abul-abul No sakola aibar, ³² na o'abul i ahol, med na abulho, ino il, ino' luling." ³³ Supi ubang, "Niri hoo Abraham o'fol o'heb, nifoil namebeng ubaleta nene. Sobo taro'nife A ubang, 'I il luling?"' ³⁴ Yesus supi ei abor ubang, "Na iramateng, name doc panen, honi hee sa doc ubaleta. ³⁵ Name baleta ei, honi hee, sa e' bang om homi so em nene, sobo bang om ho o'ai, sa ara bang om homi so em. ³⁶ Honi, mang fede' Ai ino il, i atino' il med. ³⁷ Na ahol iriho Abraham o'fol o'heb, sobo iom Namine uma, fede' Na iri sakolaho e' ara iom mi nene. ³⁸ Na ernuba Nabit eh hoo, Na Nimang ara ham-ham ahol, iridi horo'ni, nabafe imang abung ma'eh, horo panen." ³⁹ Supi A'ra mateng ubang, "Abrahamho niei nimang." Yesus ubang, "Iri Abraham o' aiso, honi hee, nabafe Abraham panen, iridi horo panen. ⁴⁰ Honi sobo, i se'bur lap Namine bit, nameba na abul bit iemaring, horo Na Lahtal abung ma'eh. Abraham e' naho panen nene. ⁴¹ Honife, nabafe imang panen, horo solo ipanen." Supi A'ra mateng. "Niri hoo e bul taufe mi nifain nene. Niei Nimang nu'le, sariho Lahtal." ⁴² Yesus supi ara mateng, "Mang fede' Lahtal horo Imang, honi hee, i Nari ukarang, fede' Nari hoo Lahtal miho'. Med, Na ho' hoo, e' Nei nom nene, sobo Aiba Nari tahow horo ei om. ⁴³ Naba eisofe, No mateng pa' hoo, i e' pahang nene? Sariho fede' i No fom pa' e' alepang nene. ⁴⁴ Iriho imang miho', sariho setang med imang om naba uma iridi horo panen iom uma. Sariho mong turmi name a' mine a'tubing, no' hee, na o' abul e' ahol nene, fede na o' abul e' ara a'fah mi nene. Mang fede' sa nakalufe ubang, sa sei asala ei a'lol bit fede sariho kalufe aba o'name, med kalufe aba omang. ⁴⁵ Honi sobo, Na na abul bit ira mateng, sobo i e' No atino' bit nene. ⁴⁶ Ano honi horo, maa inai homi ubang Nari hoo doc honi? Na na abulfe ubang, sobo naba eife No atino' bit nene? ⁴⁷ Ano horo Lahtal miho', sa Lahtal o'fompa' alepang; horo eiba i e' ma'eh nene, fede iriho e' Lahtal miho' nene." YESUS SOBOBOM SAFAH SAHIR MED ABRAHAM UMATENG ⁴⁸ Yahudi hinung supi Yesus ei abor ubang, "Abul em aai, mang fede' ni ubang Ari Samaria o'name, no' hee setang Ari tamang?" ⁴⁹ Yesus ubang, "Roh sah e' Nari tamang nene, sobo Na Nimang uada ahol, sobo i e' Nari uada ahol nene. ⁵⁰ Honi sobo, Na e' mate lafining lap Nere'eng nene; Ainu solo naho lap, sari horo hu' botang dasing ap puin. ⁵¹ Na iramateng, Nameba No fom pa' alol ataainho, sa e'dun min ahol nene." ⁵² Yahudi hinung Yesus ara mateng, "Fed ni ahol, Ariho so abul setang Ari tamang! Fede', Abraham med nabi tofang min oham. Sobo, A ubang, 'Nameba No fompa' a'lol a'taain, ho e' min nene.' ⁵³ Ariso mimate nimang Abraham minam ho e'mota? Nabi ernudi min oham; honife Afah Ahir maa Amed ano eife araham?" ⁵⁴ Yesus ubangho, "Mang fede' Na Nobobom Nafoh Natel, honi hee o'hir aai; Nimang so nafoh natel, horo iubang sari horoba ni Lahtal honi eh."' ⁵⁵ Sobo, i e' Apong ahol nene, honibo Na apong ahol; mang fede' Na ubang Na e' apong ahol nene, honi hee Na kalufe, mang fede' iri honi, sobo Na apong ahol o'fompa' Na alol ataain. ⁵⁶ Imang, Abraham, apano' o'sah fede sa Nosel ahol. Sadun ahol apano'." ⁵⁷ No', Yahudi hinung ara mateng, "Ourdi e' tun erifihing dai hoe, sobo Adun Abraham ahol?" ⁵⁸ Yesus supi ara mateng, "Na iramateng abul, Abraham ara dai honi hee, Na araam." ⁵⁹ Horo, supi foi med Yesus od faleng, sobo Yesus supi eltafuning Lahtal o'bang sa mihel sam.