¹ No' hee, Yesus lame Galilea fading. Sa Yudea milame usaain am, fede Yudea hinung hemo mi supi om Yesus amine uma. ² Sariho araham, Yahudi o'hair mate Pondok Daun fanangam. ³ Horofe, Yesus O' diailbar ara mateng, "A ho'omi sam Yudea leam, honie sa sakola aibardi O'karesangba A'panen ho a'hol. ⁴ Fede', name den e'natafuning panen nene, mang fede sari aiho name tofang aholfe. Mang fede A na'an anho panen, honi hee, A'fah A'hirho med pali' mate e'tub." ⁵ Fede', Yesus O'diailbardi, e' O'atino' bit nene. ⁶ Yesus supi ara mateng, "Nei sel a'ra dai, sobo iei sel ara sei masing. ⁷ Pali' mate om e' iebune nene, sobo pali' mate om Narife nebune, fede', Na pali' mate umateng, sariho, o'panen atenho sah. ⁸ Isam hair mateho leam. Na e'sam hair mateho leam nene, fede No sel e' ara dai." ⁹ Samateng honi no', Yesus mong Galilea mi somih. ¹⁰ Sobo, O'diailbar sam hair mate homi, Yesusdi sam homi, Sa por por sam, Sa e'bit a'lel nene. ¹¹ Yahudi hinung hair mate homi Ari lap, supi ubang, "Sa ara taromi?" ¹² Name tofang Anai homi, name Ari utama mi ip mi mid. Den ubang, "Sari Aiho no'." Den foi ubang, "A'ai, Aiho name ara se ahal lol." ¹³ Honi sobo, name nudi Ei arahamho, ubang a'lel nene, fede Yahudi hinung elbaroc. YESUS LAHTAL O'BANGMI NAME SAKOLA ¹⁴ Hair mate dai eh, Yesus Lahtal O'bang om lemid, Sa name sakola. ¹⁵ Yahudi hinung sahoir, supi ubang, "Aiho e' sakola nene sohoe, taronife, Sa na'hol dil ma'eh ba honiho?" ¹⁶ Yesus supi ara mateng, "Na'hol dil ma'eh ho, e'ara Narimi nene, honi sobo Aiba Nahow ho' horo femi. ¹⁷ Mang fede namenu Lahtal ei inungho panen, honi hee, No dil ma'eh hoo sa ahol, sariho Lahtal femi ho', eme Nari femi. ¹⁸ Nameba sei sarahamfe umatengho, ada ahol lap sere'eng, sobo nameba ada ahol lap med Aiba name tahow ere'eng, honi hee sa abul, no' hee, na o' ahal den e' ara afah mi nene. ¹⁹ Musa na o' uhap med Sura' Taurat mi med ienam, sobo inai homi name pirnudi e' a'taain nene? Taro' nife i se'bur lap e Namine ubang?" ²⁰ Name tofangho ubang, "Ari roh sah ari halap! Anoso se'bur lap Amine ubang?" ²¹ Yesus supi ara mateng, "Na karesang nu'le panen, no' ibarpi ihoir. ²² Musa ino' bolang, o'abul honi hee, e' Musa nene, sobo bap bale miho', no' hee i hair Sah araham name ano' bolang. ²³ Mang fede' namenu hair Sah om miano' bolang, honi hee, Musa o' hukung e' lafang nene, naba eife i Ne' ri'ing, asel Na hair Sah mi Na name ano' birang? ²⁴ Haai abul ahal lap ho, na o'dun ahol horofe ano' asel e', sobo abul ahal lap ho na o'abulfe ano' asel." YESUS HORO MESIAS? ²⁵ O'ataain hee, name oinu Yerusalem mi ubang, "Biteh Ai ho'oro supi amine eam? ²⁶ Honi sobo, edun, Sa mateng a'lel puin sobo, supi e' naden bit A'raham nene. Maa lafubg ernu ahol abul abulam Sari horo Kristus? ²⁷ Honi sobo, Ai ho'o taro' femi ho' pi aholam. Yesus ho' eham, honi faleng o'sel mi Yesus ho' honi hee', Sa taro' femiho honiho, name nudi ahol nene." ²⁸ Yesus Lahtal O'bang mi name sakola eh hee, Sa lofe ubang, "I Napong ahol, med Na taro miho' i aholho abul. Sobo, Na e' Nobobom ho' nene, sobo Ai abulba Nahow ho', i e' Apong ahol nene, ²⁹ sobo Na apong ahol, fede Na Sari horo miho', no' hee, Sariso Nahow ho'." ³⁰ No', supi se'bur lap Apuin, sobo name nudi A'tor nene, fede' e' O'selmi dai. ³¹ Sobo, name homi tofang Yesus O'atino' bit. Supi ubang, "Den daita Kristus ho' hee, maa Sa natahoir panen mitofang fa Aiba panenam hoo e'mota?" YAHUDI O'KAPAL SE'BUR LAP YESUS APUIN ³² Name tofang Yesus ei arahamho umateng, Farisi hinung ma'eh, horo imam-imam o'kapal, med Yahudi hinung, supi Lahtal O'bang bu'ang o'name ahow sam Yesus apuin. ³³ Horofe, Yesus ubang, "No sel Na ira ham-ham fetangho to'angam, no' honi hee, Nasam Aiba Nahow ho' ho olapsam. ³⁴ I Nari lap, sobo e' nahol nene. Med, Na ara taromi honiho, i Nolap sam sah." ³⁵ Yahudi hinung sara mateng araip aramid, "Ai hoo taro lol sofe pisam Olap sam sah? Sa maa sam Yahudi hinungba, Yunani hinung ara fetang horo olap sam, honie Sa Yunani hinung ara sakolaso? ³⁶ Sa ubang, 'i Nari lap sobo e' Nahol nene. Med, Na ara taromidi, i Nolap sam sah, honi ho o'lel taro' niso?"' YESUS ROH BOLANG UMATENG ³⁷ Sel o'amujmi, sariho hair mate o'tapormi, Yesus toh lofe Sa ubang, "Mang fede' name den doro taat, ma Nolapma seina. ³⁸ Nameba No atino' bit, mang fede' Sura' Bolangmi ubang eh honi, sei fetang ara a'fah a'hir homi tafoil." ³⁹ Sari na Yesus ubang eh, sariho Roh, nameba Yesus o' atino' bitho, Roh hoo supi med. Roh hoo e' med supi en dai, asel Yesus e'ano' mate lafining dai. YESUS NAME USARA TETANG ⁴⁰ Supi mateng pa' hoo ma'eh, horo hee supi pirnu alo ubang, "Ai hoo so abul name natafuning ano' lel O'name." ⁴¹ Name beng ubang, "Sari horo Kristus." Den ubang, "Maa Kristusba Galilea o'name horo? ⁴² Sura' Bolang maa e'ubang, Kristus ho Daud o'fol o'heb, mong Betlehem Daud o'bang o'lelang miho' nene?" ⁴³ Horo supi tabite, asel Yesus ho ei. ⁴⁴ Supi anai homi pirnu alo Yesus apuin uma, sobo namenudi A'tor nene. YAHUDI O'KAPAL OINU O'ATINO' BIT NENE ⁴⁵ Horo hee, Lahtal O'bang bu'ang o'name sabor sam imam-imam o'kapal med Farisi hinung abung, supi taany, "Naba eife i Yesus ara ho' nene?" ⁴⁶ Lahtal Bang o' bu'ang ubang, "Name pirnudi e' mateng Ai honi nene!" ⁴⁷ Farisi hinung ubang, "Iridi sa ira se ahal lolam? ⁴⁸ Lafung ernu med Farisi hinung o'anai homi den O'atino' bitam? ⁴⁹ Honi sobo, name tofangba Hukung Taurat om mi ahol neneho, sah karang med!" NIKODEMUDI A'TELANG TOH ⁵⁰ Honin sobo, Nikodemus, saridi nameho o'name, turmi sa sam Yesus aholam, sa sobengbar ara mateng, ⁵¹ "Maa Hukungba pi Taurat om miho, puin name o' abul ahal lap. Sobo nabafe sa bit pi ma'eh dai, med naba sa panen pi ahol dai, honi maa pi hukung hoo puin o'abul ahal lap no' eme aai?" ⁵² Supi ubang, "Aridi Galilea o'name? Lap edun, nabi den e'mong Galilea miho' dai." AI OBNU AHAL PANEN NAME APUIN ⁵³ Horo hee, supi sabor sobang a'ri an.