¹ Homi no' hee, Yesus Tiberias tang lol mong Galilea leam. ² Name tofang a'taain, fede natahoir tofang, Sa panen med name mode ernu a'raham ho, supi ahol. ³ No' Yesus sakola aibar ara doi tamid, supi barpi heto mimieh. ⁴ Selhomi, Yahudi hinung o'hair mate paska. ⁵ Yesus dun lame honi hee, name tofang Ari lap ho', Yesus Sa Filipus ara mateng, "Pi maa taromi roti fel honie, sa name hoo ade?" ⁶ Yesus matengho bit, puin Filipus apate, fede Sa ahol, naba honi horo maa Sa panen. ⁷ Filipus ubangho, "Roti o'fali senghir rat alo ei e' supi araham nene, masiki kabingnunu supi a'ri andi e' araham nene." ⁸ O' sakola ainu, sariho Andreas, Simon Petrus o'diail, sa Yesus ara mateng, ⁹ "Hoomi aikanu o'roti pa' ifihing, med ab pa' alo ara, sobo o'naba no' med name tofang meng hoo e'reeng?" ¹⁰ Yesus ubang, "Supi a'how barpi mih." Sari eleme homi, banang bala lafoh, horo name tofangho mih so oh, o'tofang maa lotebar pir rib ifihing. ¹¹ Horo he'e, Yesus rotiho med, o' mahen bit no', Sa dalam name mih pir en; ab hodi Sa panen honi. ¹² Name sobarpi na' de a'to' in, Yesus So sakola aibar ara mateng, "O' ameh i taunung honie sa haai den few." ¹³ Horo sakola aibar ta unung honi hee, roti pa' ifihing med ab pa' alo name ade ato' in ho, o' ameh laatang ernu faling alo. ¹⁴ Nameno' tofangba dun na utahoir Yesus panenho a'hol, supi ubang, "Ai hoo, name natafuning ahol o' nameba upaha' ho' pali' mate taho' horoso." ¹⁵ Sa ahol name tofang sara gahain, honie ho' Abang ahowta supi o'afen, horo hee, Sa hole solo sam doi ta am. YESUS SEI TALAME ¹⁶ Dil dele paka, sakola aibar sam tang ta am, ¹⁷ supi med eita, supi sam Kapernaum leam. Dil paka am sobo, Yesus e' ho' supi o;ap ho' dai. ¹⁸ Seh seh bob mate, fede hamoi mate toh. ¹⁹ No', supi eita sam tang ham, o'let maa da rib tow, supi dun hee, Yesus sei talame supi o'lap maeh horo, supi baroc. ²⁰ Sobo, Yesus supi a'ra mateng, "Nari soba, baroc e'!" ²¹ Supi Yesus ara mid eita faleng hee, seh seh eisam aloi mi dotong am. NAME TOFANG YESUS LAP ²² Midilel hee, name tofang tut taho, dun ei beng ara homi, seilal ei nu' le sakola aibar ta samam. Sobo, Yesus e' ara eiba o' sakola fisamam ho ta nene. ²³ Ei beng Tiberias mi ho' elemeba, Yesus mi roti o' mahen few no', med name tofang en ade homi. ²⁴ Name tofang dun lame hee, Yesus med O'sakola aibar e' ara homi nene, horo supi mid ei beng nun ta horo hee, supi Kapernaum leam Yesus lap. YESUS HOROFE ROTI FETANG ²⁵ Name tofang sam mong tangden mi Yesus a'hol, supi A'tan, "Guru, o'tareng den mi A ho' hoomi?" ²⁶ Yesus supi ara mateng, "Na iramateng, i Nari lap hoo, na tahoir tofangba, idun ahol horo nene, honi sobo, asel i roti ade sam ito' in horoso. ²⁷ Haai karesang namej suhuin no' ho lap e', honi sobo, namej ba, tahang sam fetang so em lefa, horo lap, sariho Nameno' Ai med ien, fede' Nameno' Aiho, Omang, Sariho Lahtal, Sa u inung med Enam." ²⁸ Horo, name tofang Yesus atan, "Maa nabafe nipanen, honife ni karesangho Lahtal om tamuj?" ²⁹ Yesus supi aramateng, "Karesang hooro Lahtal uinung i panen, sariho: Aiba Lahtal tahow ho' ho, i o' atino' ubang." ³⁰ Supi Yesus atan, "Honi hee, na utahoir taro' ni horo A panen, honie ni edun, no' hee, ni O' a'tino' bit? Karesang nabafe maa A panen? ³¹ Ni bap ni bale mong labo' mi namej sorga mihel ade, mang fede hul meng honi, 'Sa roti sorga mi med supi en ade."' ³² Yesus supi aramateng, "Na iramateng abul, Musa so roti sorga mi hel ho med ien nene, honi sobo Nimang so roti so em sorga mi ho med ien. ³³ Fede rotiba Lahtal ei, sari hoo Aiba sorga mi hel, honie fetang med pali' mate en." ³⁴ Supi Yesus aramateng, "Tuhan, sari roti hoo, A med nien sei masing." ³⁵ Yesus supi aramateng, "Nari horo roti fetang; ano No lap ma hee, sa e' malihing nene, med ano No a'tino' bit hee, o' doro e' taat nene. ³⁶ Honi sobo, Na iramateng, idun Naholam sobo, i e' No a'tino' bit abul dai. ³⁷ Barpiba Nimang Nenam ho, No lap ho', no' hee, o' No lap ma hoo, Na atetel nene. ³⁸ Fede, Na sorga mihel hoo, e' Nei tanut nene sobo, Aiba Nahow hel horo Ei tanut, Ei inung. ³⁹ Med, hooro Aiba Nahow helho Ei om: sariho, na an anba Sa med Nenam ho, den haai suhuin e', honi sobo, zamang o' amuj mi hee, Na ano' fetang. ⁴⁰ Fede', Nimang Ei inung, sariho nameba dun Ai ahole, O'a'tino' ubang, o'selmi fetang, so em med, no' honi hee, zamang o' amuj mi hee, Na ano' fetang." ⁴¹ Horo hee, Yahudi hinung oinu Emaurung, fede' Sa ubangho, "Nari horo roti fetang sorga mihel." ⁴² Supi ubang, "Sari hooro Yesusba Yusup o'aiho? ofo omang pi aholho? Taro' ni sofe Sa ubangho, 'Na tong sorga mihel?"' ⁴³ Yesus supi ei abor ubang, "Haai iema urung e'. ⁴⁴ Namenudi Nolap ma sah, sobo mang fede' Nimang Nahow a'biing med, no' hee, zamang o' amuj mi Na ano' fetang. ⁴⁵ Name natafuning ano' lel o' sura' mi hul: 'Supi sobarpi Lahtal ara sakola. Nameba Nimang a'bung ma eh, med usakola amho, Nolap ma. ⁴⁶ Sari na hoo, honie nameden Nimang a'holam honi nene, sei lalho, Aiba sorga miho, Sari horo Omang aholam. ⁴⁷ Na iramateng, 'Nameba O' a'tino' bitho, fetang em med usei ano'.' ⁴⁸ Nari hooro roti fetang. ⁴⁹ Ibab ibale mong labo' mi namej sorga mihel ade, sobo supi min. ⁵⁰ Hooro roti sorga mihel, honife, ano roti hoo ade honi hee, e' min nene. ⁵¹ Nari hooro roti fetang sorga mihel. Anoso roti hoo ade hee, sa fetang so em; med rotiba Na ien sa pali' mate fetang feho, No bo' Nafah Nahir." ⁵² Yahudi hinung sara tetang, supi ubang, "Taro' nife Ai hoo So bo' med name en ade no'?" ⁵³ Yesus supi ara mateng, "Na atitino' iramateng, mangfede' Nameno' Ai O'hir ade nene, med o'fui e'na nene, honi hee, fetang e' ara ibo' homi nene, ⁵⁴ Nameba No hir ade med No fui na ho, fetang em sa usei ano', med mong zamang o' amuj mi hee, Na ano' fetang. ⁵⁵ Fede', No hir ho namej so em, med No fui ho, sei so em. ⁵⁶ Anoso No hir ade, No fui na hee, sa ara Nom mi, Na ara om mi. ⁵⁷ Mang fede Nimang fetang u Nahow, med Na fetang asel Nimang, honi hee, aiba No hir ade hodi honi, aiho fetang asel Nari. ⁵⁸ Hooro roti sorga mihel, e' mang fede ibap ade ba min honi nene, sobo nameba roti hoo ade, sa fetang em so em." ⁵⁹ Yesus na hoo barpi umateng mong Kapernaum mi, Sa aome bang mi name ano' na'hol dil ma'eh araham. NAME YESUS ATAAINHO, TOFANG YESUS AD ⁶⁰ Sakola aibar tofang na hoo ma'eh, supi ubangho, "Mateng pa' hoo bune. Ano maa tahang toh med no?" ⁶¹ Sa ahol hee, name A'taain nun ho, na hoo u ma urung, Yesus supi ara mateng, "No mateng pa' hoo iom alahain? ⁶² Mang fede' honi, Nameno' Ai sabor mid Seleme tur lemid, maa i taro'ni edun? ⁶³ Roh so fetang, sobo hir ho e' no' di aai. Mateng ernu ba Na uira mateng eh hoo, roh med fetang. ⁶⁴ Honi sobo, inai homi den e' o'atino' bit nene." Fede', turmi Yesus ahol, anoso e' O'atino' bit nene, med anoso om A'mine A'tubing uma. ⁶⁵ Yesus ubang, "Horoba Na iramateng, name nudi No lap ma sah, sobo mang fede' sari naho Nimang med Nen." ⁶⁶ Mang homi hee, name o' A'taain ho tofang sari holong, ataain nene am. ⁶⁷ Horo hee, Yesus So sakola pir ernu faling alo ara mateng, "Iridi iom sam uma?" ⁶⁸ Simon Petrus O' mateng abor, "Tuhan, ni maa sam ano o'lap sam? A'ri horo fetang em o'mateng pa' ara A'bung. ⁶⁹ Ni O' atino' bit, ni aholam, A'ri horo bolang Lahtal mi ho'." ⁷⁰ Yesus supi ara mateng, "Inang ernu faling alo hoo, Nangso e' iri med nene? Honi sobo, iham homi pirnu sano' setang." ⁷¹ Yesus O' tanut miho Yudas, Simon Iskariot o'ai, fede hodi, O'sakola pir ernu faling alo horo, o' pirnu, sobo sari horo sano' om sah med Yesus araham.