¹ Barpi hoo no' hee, Yahudi hinung o' hair mate a' ra horo, Yesus mid Yerusalem lemid. ² Yerusalem mi,sari ho Nub o' se ar mate a' bung ho, sei bari nu a' ra homi, Ibrani o' mateng mi ubang hee Betesda, o' om ha' pa' ifihing. ³ Om ha' a' ri an ho, name mode tar pir: name eng sah, name e'fa sah a' tang sah, med name tu' ung( supi sei bari ho o' farufing od a' danang. ⁴ Fede, sel nunumi hee, Lahtal O' malaikat hel bariho lehel o' sei a' no' farufing. Nameba sotur hel sei farufing am ho lehel honi hee, mang naba mode horo a' ra a' fah midi, sa birang). ⁵ Sari homi ainu mode tun ertow faling turlo am. ⁶ Yesus dun hee, sari ai homi tar eh, med Sa a' hol aiho mode lufang am horo, Yesus a' tan, A birang u i' nung eme a'ai? ⁷ Ai modeho ubang, sei farufing a' ra ham hee, name den e' nara hel sei ho lehel nene, honie na dai nara babat eh hee, name beng mi sotur hel am. ⁸ Yesus a' ra mateng, Ahirtoh! o buh ho tefang honie lame. ⁹ Sel horo mi hee, aiho birang med, sa sobuh ho tefang horo hee, sa lame. Sobo sari sel ho, hair sah o' selmi. ¹⁰ Horofe, Yahudi hinung ai birang am ho a'ra mateng, Fed hoo hair sah o' sel, a haai obuh ho tefang nene. ¹¹ Honi sobo sa ubangho, "Aiba nano' birang horo nara mateng ubang, O buh ho tefang honie lame". ¹² Supi ai birang amho a' tan, "Ai taro soba a' ra mateng ubang, O buh ho tefang honie lame ho? ¹³ Sobo, aiba birang am ho, sa Ai taro so honi ho sa a' hol nene am fede, Yesus name tofang ho a' telang samam. ¹⁴ No' honi hee, sari aiho, Yesus foil Yerusalem bang om mi a' hol, Sa a' ra ateng ubang, Alepang, a birang am. Haai foil doc panen nene honie, na o' sah mimate foil ara ham e! ¹⁵ Sari aiho sam Yahudi hinung a' ra mateng ubang, Yesus so a' no' birang am. ¹⁶ Horofe, Yahudi hinung supi Yesus e' ri ing a' no' sah sah, fede' na ernu ba Sa panen ho hair sah fe a' ra ham. ¹⁷ Honi sobo Yesus supi a' ra mateng ubang, Nimang dai karesang eh sam fed hoo mimeng, horofe Naridi dai karesang eh. ¹⁸ Mateng pa' horo puin Yahudi hinung se' bur lap mang kufa' ta honie, supi Yesus ho a'minefe, haai Yesus hair sah lafang horo solo nene, sobo Lahtal ho Sa a' no' Somang hodi, sari ho o' lel hee, Sa Safah sahir med a' no' Lahtal a' ra ham. LAHTAL O' TUTUNG KUFA' ARA YESUS OM MI ¹⁹ No' hee Yesus supi a' ra mateng ubang, Na a' titino' ira mateng, Ai so bobom sobo' homi nanu panen sah, mang fede' O' mang panen Sa a' hol nene, fede' nabafe O' mang panen hee, horo O' Ai di panen. ²⁰ Fede, O' mang So Ai ukarang, no' hee ernu turlo ba Sa penen ho med So Ai e' tub, med karesang mimate tofang di Sa med E' tub honie, i u ihoir. ²¹ Mang fede' O' mang name min a' no' fetang no' fetang med supi en, ho hee Ai hodi Sa anofe fetang med en uma honi hee, Sa med en. ²² O' mang e' namenu o' a' hal lap nene, sobo a' bul a' hal lap ho, Sa barpi a' lorang med Ai en am, ²³ honie nameno' barpi Ai uada a' hol mang fede' supi O' mang uada a' hol eh honi. Nameba Ai uada a' hol nene honi hee, O' mang ba So Ai tahow hodi supi uada a' hol nene. ²⁴ Na a' bul ira mateng, nameba No mateng pa' ma eh alepang, no'hee Aiba Nari tahow ho o' a' tino' bit honi hee, fetang so emho med usei a' no', no' honi hee, supi e' a' ra a' bul a' hal lap o' om homi nene fede', supi min homi sabor fetang lema am. ²⁵ Na a' tino' ira mateng, maa o' sel mi eham, med o' sel miam, name min ernu Lahtal Ai amang der ma eh, med supiba ma eh ho so fetang. ²⁶ Mang fede' fetang a' ra O' mang A' fah a' hir mi, honi hee, Ai hodi Sa fetang med en A' fah a' hir homi, ²⁷ no' hee O' mang kufa' med Ai en honie, a' bul a'hal lap ho a' no' lame,fede' Sariho Nameno' o' Ai. ²⁸ Haai na hoo u ihoir e' fede' o' sel mi hee, name min ernu lafo paka miho, barpi amang ma eh, ²⁹ med supi hel, sariho supi ba nano' panen ho sofetang fa fetang lefa. Sobo supiba a' ri ing fail med nasah fe panen ho, fetang a' bul a' hal lap ho lefa. ³⁰ Na nobo' mate hoo mi nanu panen sah. Na a' bul a' hal lap sobo Na ma eham horo a' ta ain, no' hee Na a' bul a' hal lapho a' bul a' bul, fede' Na Nei nom fe a' ta ain nene sobo, Aiba Nahow ho' horo Ei Om a' ta ain. YESUS HO O' MANG LAHTAL FEMI HO' HO UMATENG ³¹ Mang fede' Na nobo' ei a' raham horo umateng hee no mateng ho a' bul nene. ³² Sobo name bengnu so Nei nara ham ho umateng, honi hee Na a' hol sariho Nei nara ham ba umateng eh ho a' bul. ³³ I tahow Yohanis enam honie, na a' bul ei a' ra ham ho sa umateng am. ³⁴ Sobo, mateng pa' ba Na med hoo e' nameno' mi ho' nene. Na sarina hoo bit honie, i il luling med. ³⁵ Yohanisho, lampu kaai fail eh med lel eh, honie o' lel ho imi bad herang o' kurang. ³⁶ Honi sobo, mateng pa' ba a' ra Nabung ho, so mimate Yohanis ei mateng pa' e' mota. Fede, karesang baleta ba Nimang a' lorang Nen Nahow a' no' an, sari horoba, karesang baleta fed Na panen eh hoo, Nei Nara ham fe bit, sariho Nimang so Nahow ho'. ³⁷ Med, Nimang Nari tahow hodi, Nei Nara ham ho Sa umateng am. Honi sobo, i Amader di ma eh nene, soeme A' fah A' hir hodi idun a' hol dai. ³⁸ Med O' Fom pa' e' a' ra iom mi seh nene, fede' Aiba Sa tahow ho' ho, i o' a' tino' bit nene. ³⁹ I Sura' Bolang om ho usakola, fede' iei tanut honi hee, Sura' Bolang om horomi ifetang so em med; no' hee Sura' Bolang hodi, Nei Nara ham ho umateng, ⁴⁰ sobo, i ma Nolap mae fetang med feho, iom e' uma nene. ⁴¹ Nameno' ei lel madal Na e' med nene. ⁴² Sobo, Na ihol sariho, Lahtal O' ukarang e' a' ra iafah mi nene. ⁴³ Na Nimang A'ni puin ho', sobo i e' itang Nepep Nari med nene. Mang fede' name beng sani puin ho' honi hee, i itang e' pep a' ri med. ⁴⁴ Mang fede' namenu o' tarain pa' fa beng a' ra ham horo i u i' nung, no' hee tarain pa' ba Lahtal tow sano' nu miho' i e' lap nene, taro' nife i o' a'tino' ubang no'? ⁴⁵ I haai tanut ubangho, Na Nimang a' pon a' dang homi ira para kara honi nene, nameba ira para kara feho Musa, ai horofe i udume eh. ⁴⁶ Mang fede' i Musa o' a' tino' bit, o' a' bulta hee,i Narife No a' ti no' bit fede, Nei nara ham horoba Musa hul. ⁴⁷ Honi sobo mang fede' nabafe Musa hul i o' a' tino' bit nene, honi hee maa taro' nife No mateng pa' ho i o' a' tino' ubang?