¹ Yesus a' hol, sariho Farisi hinung ma eh hee, Sa sakola tofang a' foil Yohanis mi e' mota, ² (masiki Yesus e' name a' foil nene sobo, o' sakola aibar so), ³ Sa Yudea mi hel, Sa foil sabor sam Galilea leam. ⁴ Sobo, Sa u'il Samaria pali' a' lai. ⁵ Yesus sam Samaria mi pali' mura rame nu a' ni Sikhar homi, sari pali' hoo fa ai bo' nu turmi Yakub med so ai Yusuf en ho a' bung. ⁶ Yakub o'sei lafo a' ra homi. No' Yesus di sorac ma eham horo, Sa hel sei lafo a'di ho mimih. Ho a' ra ham maa od ernu faling alo fed sah. ⁷ Samaria obnu ho' sei hung e' ho'. Yesus a' ra mateng," Sei nen honie Na nafe." ⁸ Fede, O' sakola aibar sam don leam namej fel e' samam.) ⁹ Samaria ob hoo, sa Yesus a' ra mateng,"Taro' nife, Ariho Yahudi o' name, nari hoo Samaria ob sobo, A nabang seina?" (Fede, Yahudi hinung med Samaria hinung ho, e' sara a' mang eh nene). ¹⁰ Yesus a' ra mateng ubangho, Mang fede' Lahtal Ei no' ham a a' hol, med anoso a' ra mateng eh hoo a a' hol honie sei Nen na, i a' bang hee Sa sei fetang med en. ¹¹ Ai obho A' ra mateng, Tuang, O' tanib aai, sei lafo hoo u'lbi', A maa taromi sei fetang ho med? ¹² Ni bap Yakub so sei lafo hoo med nien, sari, o' aibar med o' binangta barpi sei hoo na, honife Ariso so mimate ni bap Yakub ho e' mota? ¹³ Yesus a' ra mateng ubang, Nameba sei hoo naho, doro foil taat, ¹⁴ sobo nameba sei Na med enho supi na honi hee, supi o' doro foil taat nene; no' hee seiba Na med supi enho sano' sei eng tapir supi o' bo' mate homi, sari seiho tafoil sei masing sam mong fetang so em ho lefa. ¹⁵ Sari ai obho sa foil Yesus a' ra mateng, Tuang, seiho med nen, honie na haai doro taat e', no' hee na haai foil ho' ho omi sei hung e.' ¹⁶ Yesus a' ra mateng, sam olote o'lofe honie abor ho' ho omi. ¹⁷ Ai ob ubang ho, Nari hoo lote a' ai. Yesus a' ra mateng, A ubang, ari lote a' ai honiho a' bul. ¹⁸ Fede' ariho lote pir ifihing am, med lote pirnu ba fed a' ra ara eh hoo, e' olote nene. Ho hee, omateng ho a' bul. ¹⁹ Ai ob ho sa Yesus a' ra mateng, Tuang, fed na a' hol honi hee, ari hoo Nabi nuso. ²⁰ Ni bap ni bale doi hooro ta ada mahen panen, honi sobo O' bang O' lelang ubang ho, Yerusalem horofe, ada mahen panen eleme. ²¹ Yesus ai ob ho a' ra mateng, No a' tino' bit, hoi ai ob! O' selmi hee, Nimang uada a' hol ho, e' doi hoo dita nene, e' mong Yerusalem hodi mi nene. ²² I o' a'pong a' hol nene horo uada a' hol, sobo niri ho, a' pong a' hol horo ni uada a' hol fede, il luling ho Yahudi hinung fe lol ho'. ²³ Sobo, o' selmi sariho fed, nameba na o' bulfe uada a' holho, roh med na a' bul femi O' mang uada a' hol; fede' Omang na honi horo ubang honie, puin A'ri uada a' hol. ²⁴ Lahtal horo Roh, med supiba A'ri uada a' holho, uil uil roh med na o' a' bul femi, honi amfe A' ri uada a' hol. ²⁵ Ai ob ho A' ra mateng, Na a' hol sariho Mesias ho' eham (Sari horoba Kristus). Sa ho' honi hee, ernu turlo Sa u nira mateng am. ²⁶ Yesus a' ra mateng, Nariba a' ra mateng eh hoo roba Sari Aiho. ²⁷ Seh seh hee, Yesus O' sakola aibar ho' supi omupir, fede' supi dun hee, Yesus ai obnu a' ra hu' tang eh. Sobo name nudi e' A' tan ubang, A naba lap? soeme Naba eife A a' ra hu' tang eh? ²⁸ No' hee, ai ob ho so sei eleme med a' mihing, sa sam bangmi name a' ra mateng, ²⁹ Ma, e' dun, ainuho, sa no panen a' ten ernuho sa u nara mateng. Ai horo maa Mesias? ³⁰ Horo hee, supi hel sam Yesus a' hol. ³¹ Horo O' sakola aibar a' ra mateng, "Guru, na'de." ³² Sobo, Yesus supi a' ra mateng, Nei namej a' ra sobo i e' a' hol nene. ³³ Horo sakola aibar satan, "Maa name den namej fit ho' en Sa a' de am so? ³⁴ Yesus ubangho, Nei namejho, Aiba Nari tahow Ei i' nung horo panen, med O' karesang ho a' no' an. ³⁵ I e' ubang ul ut ta honi hee, hor lap o' sel honi nene? E' dun, Na ira mateng, ie' failho a' lel honie e' dun, dil but tofang ba' oir taat oham, honie hor lap o' sel am. ³⁶ Fed horo, ai na hor lapho sei fali med, no' hee sa o' pir ta' unung med fetang so em e' re eng honie, name nahor lap med name na te' muding sara ham ham bad herang. ³⁷ Na hoo ei a' ra ham ho, mateng pa' hoo a' bul, sariho Namenu te' muding name beng hor lap. ³⁸ Na iri tahow honie, i e' nanu ukaresang nene, name beng so ukaresang sobo i hor lap honi hee, iridi a' ra supi o' karesang om homi am. ³⁹ Samaria o' name tofang bang pali' homi Yesus O' a' tino' bit fede, ai ob ho sa ubang, na ernuba na panen amho, Sa unara mateng. ⁴⁰ Horofe, Samaria o' name tofang sam Yesus a' hol, supi a' bang honie Yesus supi a' ra ham ham homi, horofe Yesus supi a' ra homi tareng alo. ⁴¹ Med, Nameno' o' a' tino' bit foil mi tofang, fede' Yesus O' mateng pa'. ⁴² Supi ai ob ho a' ra mateng, Haai o mateng pa' horofe ni o' a' tino' bit nene, sobo ni nibobom ma eh, med ni a' hol honi hee, Sari Ai horofe, so a' titino' pali' mate o' il luling ho Sa o' uling puin. NAME AFEN O' BANG MI KARESANG HO, O' AI BIRANG MED ⁴³ Tareng alo a' lai hee, Yesus sari e' leme homi hel, Sa sam Galilea leam. ⁴⁴ (Dai ehta hee, Yesus ubangho, nabinu sobo, o' bang o' pali' mi hee, name e' uada a' hol nene.) ⁴⁵ Yesus mang sam Galilea mi honi hee, Galilea o' name tofang satang E' pep A' ri med, fede' na ernu ba Paskah o' hair mate om mi Yesus panen ho supi dun a' hol, asel supidi sam hair mate ho leam. ⁴⁶ Horofe, Yesus foil ho' Kana ba Galilea pali' mi ho leho', sari eleme horo Sa mi sei panen a' no' anggur. Kapernaum homi ho, name afen o' bang mi karesang nuho, o' ai lote mode eh. ⁴⁷ Sari aiba afeng o' bang mi karesang eh ho, ma eh hee Yesus mong Yudea mi ho' Galilea mi am horo, sa sam a' hol sa Yesus a' bang honie, Sa ho' o' ai ho a' no' birang fede' o' ai min eham ⁴⁸ Horo Yesus a' ra mateng ubangho,"Mang fede i e' dun utub ernu med nau tahoir ernu a' hol nene honi hee, i o' a'tino' bit nene. ⁴⁹ Ai afen o' bang mi karesang ubang, Tuang, no ai e' min dai hee A ho' am. ⁵⁰ Yesus a' ram mateng, Abor sam, o ai fetang am! Sari aiho Yesus O' mateng pa'ho o' a' tino'bit horohee sabor sam ⁵¹ Aiba afen o' bang mi karesang eh ho dai seham hee, nameba o' karesang eh nun ho ho' a' hol a' ra mateng ubang, O ai lote sofetang am. ⁵² Aiho supi a' tan, sariho od den hee o' aiho pac pac birang med. Supi ubang,u' fang mi maa od itito honi hee o' taso' mate ho suhuin. ⁵³ Aika ho o' mang a' hol, sari sel horo a' ra ham honi hee, Yesus a' ra mateng ubang, O ai fetang am. Mang homi, aiba afen o' bang mi karesang med o' ob o' ai barpi Yesus O' a' tino' bit. ⁵⁴ Sari hoo ro na utahoir o' mialo mi Yesus panen,Sa mong Yudea mi Sabor Galilea leho' a' ra ham.