¹ Name Farisi nu a'ni Nikodemus. Sari ho, Yahudi hinung ho o' name tur. ² Dil paka om numi, sa ho' Yesus a' bung a' ra mateng, Guru, ni ahol Ariho Guru Lahtal mi ho' fede' name pirnu di, na utahoir ernu ba A panen eh hoo supi panen sah, sobo Lahtal a' ra tohuil hee supi panen no'. ³ Yesus a' ra mateng ubang ho, Na a' bul a' bul a' ra mateng, mang fede' namenu foil a' fain nene honi hee, sa e' dun Lahtal O' bang mate a' hol nene. ⁴ Nikodemus A'tan, Maa taro' nife namenu sa tumo' am foil a' fain no'? Sa maa foil sabor mid sofo om lemid ai lafeng mie, o' fo foil a' fain no'? ⁵ Yesus a' ra mateng, "Na a' ra mateng a' bul, mang fede' namenu sei med Roh mi a' fain nene honi hee, sa Lahtal O' Bang Bolang om lemid sah. ⁶ Nabafe hir mi a' fain honi hee hir ei, sobo nabafe Roh mi a' fain honi hee, sariho Roh ei. ⁷ Haai ahoir e' fede' Na ara mateng, "Ariho a foil afain fe. ⁸ Hamoi toh tarofe lol ei i' nung a' ta ain, honie o' da' udfe i ma eh, sobo sa tarofe lol ho' med sa taro leam i a' hol nene. Nameba Roh mi a' fain hodi o' rupa honi. ⁹ Nikodemus A' tan, Naba eife maa no hoo barpi a' ra no'? ¹⁰ Yesus ei a' bor, Taro' ni sofe, ariho Israel hinung o' guru sobo, na ernu hoo a barpi o' lel a' hol nene? ¹¹ Na a' bul a' bul ara mateng, sariho nabafe ni a' hol horo ni bit, med nabafe ni dun a' hol, horo ni umateng, sobo ni mateng pa' ho i med nene. ¹² Mang fede' na ernu pali' mate ei horo Na u ira mateng sobo, i o' a' tino' bit nene, naba eife na ernu sorga ei Na u ira mateng, maa i o' a' tino' bit eme aai? ¹³ Name pirnu di e' mid sorga lemid dai, sei lal ho Ai nuba tong sorga mihel am horo, sariho Nameno' Ai. ¹⁴ Mang fede' Musa mong la ham mi mon a' tel a' no'lafining, ho hee Nameno Ai hodi a' no' lafining o' rupa honi, ¹⁵ honie sa nameba O' a' tino' bit ho, fetang so em ho med. ¹⁶ Fede Lahtal pali' mate hoo ukarang empir, Sa So Ai pirnu ho tahow hel, honie anoso O' a' tino' ubang hee, min tabang a' hol nene, sobo fetang so em ho med. ¹⁷ Fede' Lahtal So Ai tahow pali' mate tahel ho, e' pali' mate o' a' hal lap nene, sobo honie sa pali' mate ho a' no' il a' no' luling O' Aife a' lai. ¹⁸ Nameba O' a' tino' bitho, e' hukung med nene, sobo nameba e' O' a' tino' bit neneho, a' ra hukung om mi am, fede' Lahtal O' Ai lote pirnu ho, sa e' O' a' tino' bit nene. ¹⁹ Hukung ba hoo: Lel ho' pali' mate mi am sobo, nameno' paka horo apano' fede' nabafe supi panen ho a' ri ing fail sah karang. ²⁰ Fede nameba na o' sah panen, ho hee sa lel ho e' riing, med lel hodi sa e' leho' nene, honie o' panen a' ten ernuho, haai fara ain lap nene. ²¹ Honi sobo, nameba na o' a'bul panen ho, sa ma lel ho lema, honie sa o' panen a' ten ernu ho lel, fede' o' panen a' ten ernuho Lahtal Om femi panen. YESUS EI A' RA HAM HO, YOHANIS UMATENG ²² No' hee, Yesus med O' sakola aibar sam Yudea pali' leam. Sa hemomi supi a' ra ham ham So sel a' no' an med name a' foil. ²³ Yohanis di Ainon ba Salim a' bung homi name a' foil, fede' homi sei tofang. Name tofang ho' homi sa a' foil. ²⁴ Sariho a' ra ham Yohanis name e' med sapiri mi dai. ²⁵ Homi, Yohanis o' sakola aibar med name Yahudi pirnu, supi bolang manep ei a' ra ham ho u sara tetang. ²⁶ Supi ho' Yohanis a' hol a' ra mateng,"Guru, Aiba ara ham ham mong Yordan mol denmi, sari Aiho ei a' ra ham a umateng eh ho, e' dun, Saridi name a' foil, no' hee name tofang o' lap ho' am." ²⁷ Yohanis o'a'bor, Nameno' mang naba horodi med sah, sobo sari naho name tong sorga mi med en honi hee sa med no'. ²⁸ Iridi umateng no' sariho na ira mateng am, Nari hoo e' Mesias nene, sobo nari hoo name nahow notur ho' honi amfe Sari Aiho foil ho'. ²⁹ Nameba ob med ho, lote bar; sobo ai lote ho o' tenang el, sa toh alepang, med sa so lote amader ho ualepang apano' empir. Honife, napano' hoo a' no' afeng am. ³⁰ Sari Aiho mate mang ta, sobo nari hoo ka ai hel mang ta. ³¹ Aiba tong lafining mihel ho, ernu tulo Sa barpi e' mota, Aiba pali' mate taho, na ernu pali' mate taho sa umateng. Aiba sorga mihel ho ernu turlo Sa barpi e' mota. ³² Nabafe Sa a'hol ma eh sa umateng, sobo name tofang o' mateng pa' ho med som mimeng nene. ³³ Nameba o' mateng pa' med ho, o' a' titino bit ubangho, Lahtal ho a' bul. ³⁴ Fede, nameba Lahtal tahowho, sa Lahtal O' mateng pa' umateng, fede' Lahtal Roh med en o' alomang o' tapor a' ai. ³⁵ O'mang So Ai ukarang an tofang Sa med a' tang mi meng am. ³⁶ Nameba O' A'tino' bitho, fetang em med usei a' no', sobo nameba Aiho a' lol a' ta ain nene ho fetang a' hol nene, sobo Lahtal O' a' ri ing fail so a' ra sari name hota.