YOHANIS O' SURA' ASEL MATE O' MI ALO
1
Hair o' mitow mi hee, Kana ba mong Galilea pali' mi ho, name sari med ta diang puin, honie Yesus o'fo di a' ra hemo mi.
2
Yesus med O' sakola aibar di, name supi e' maring sam diang ho leam.
3
Seh seh hee anggur oh am, Yesus o' fo a' ra mateng, supi o' anggur oh am.
4
Yesus ubang, Ai ob, Nei nara hamow ho naba? No sel e' an dai.
5
Yesus o' fo name baleta nun a' ramateng ubang, "Nabafe Sa ubang hee, horo i panen."
6
Foi kumba pa' talang a' ra homi, s ariho tano' bolang o' hair mate honi hee, Yahudi hinung sei hung mi med sari hair mate ho e' reeng ei. Sari kumba ho, pa' nu hee sei tanib mate ho alo a' ai hee tow leam.
7
Yesus name baleta a' ra mateng, "Kumba nun ho sei med mi." Horo supi sei med kumba nun homi sam afeng.
8
No' hee, Yesus supi a'ra
mateng, No' amba, pite' med fisam diang aneng en.
No'horo supi fisam diang aneng en.
9
Diang aneng seiba sano' anggur amho na, sobo sari anggur taro femi ho' sa a' hol nene ( sobo name baleta eiba sei ho med horo a' hol), horo diang aneng name sari med ho, ai lote sa o' lofe,
10
no' sa a' ra mateng, nameno' nunho, anggur o' no' horo sotur supi en na sam apano' am fe, anggur ba e' no' nene ho foil supi en na. Sobo anggur no' ho ataro' sam fed hoo mimeng.
11
Na utahoir a'ai nang hoo, Yesus mong Kana ba Galilea pali' mi, Sa homi panen puin So lel So madal utub honie, sakola aibar o' a' tino' ubang.
12
No' horo hee, Yesus med O' fo, O' di ail bar, med O' sakola ai bar supi sara ham ham hel Kapernaum lehel. Supi homi tareng nu alo om mi.
YESUS YERUSALEM BANG OM MI
13
Yahudi hinung o' hair mate Paskah fanang am, horo Yesus di mid Yerusalem lemid.
14
Yerusalem bang om mi Sa dun hee, name tofang nub, a' bib med u'lo fail eh, no' hee name seng tiling nun hodi a' ra homi.
15
Yesus heifi' panen a' no lepir horo hee, Sa nameno' nun barpi a' tetel luling lehel a' no' oh, med supi o' nub a' bib nun hodi.
Name seng tiling Sa o' seng nun abuil bahite, supi o' meja nun hodi Sa bakung meng barpi.
16
Name ba u' lo fail nun
Yesus supi a' ra mateng, na ernu hoo barpi fit luling lehel a' no' oh! Haai Nimang O' bang hoo a' no' don bang!
17
O' sakola aibar mi uma, sariho a' ra hul ol meng:
" O bang e' sah honi hee
Nano' fail oh."
18
Horo, Yahudi hinung A' ra mateng, Na utahoir taro'ni horo A nietub am fe, A na hooni nun ho panen?
19
Yesus supi a' ra mateng ubangho, Yerusalem bang hoo a' butung, sobo tareng tow om mi hee Na a' ten pir.
20
Supi ubang ho, Yerusalem bang hoo, a' ten tun erut faling talang om mi, sobo A a' ten tareng tow om mi hee pir no'?
21
Sobo Yerusalem bang Yesus bit eh hoo, Sa sobo' med Safah Sahir horo Sa ubang eh so.
22
Horofe, Yesus name min a' nai homi Sofetang honi hee, O' sakola aibar mateng pa' hoo mi uma; horo supi Sura' Bolang med Yesus O' mateng pa' ho o' a' tino' bit.
23
Paskah o' hair mate a' raham Yesus a' ra Yerusalem miho, name tofang A'ni mi o' a' tino' bit fede' na utahoir tofang Yesus panen ho supi dun a' hol.
24
Honi sobo Yesus e' Sobo' ho supi a' how o' a' tino' bit nene, fede' nameno' Sa barpi a' hol,
25
med Sa e' name den udume honie nameno' ei a' raham umateng nene, fede' naba honi horo nameno' om homi Sa a' hol.