¹ Sel o a'aiy nang mi minggu om ho mi, Maria Magdalena mang lalami sam Yesus o dere leam, ho araham dil daiy pana eh, dun he'e foiy ba dere atelang eiy ho name a hod dere ho e letam. ² Horo, sa te'eng Simon Petrus med sakola aiy ba Yesus ukarang bi' ho ahol supi ara hu'tang, "Supi dere mi Tuhan medam, ni e ahol nene supi med taromi meng." ³ Horo, Petrus e med sakola aibar beng ho sam dere leam. ⁴ Sonang lo ham-ham te'eng, sobo sakola aibar beng ho te'eng mi ber Petrus emota horo misotur sam dere ho mi. ⁵ Sa safa atel na om ho mi dun, dun he'e napah lenan Yesus o benj baloiy eiy hemomi oleh, sobo sa e na om ho lemid nene. ⁶ horo he'e. Simon Petrus ho', ataain ho', horo dere om ho lemid sa edun napah lenen benj baloiy eiy hemomi oleh. ⁷ Napah ba Yesus apongfa' med elafung baloiy eiy ho e mong napah lenen ba puin benj baloiy eiy ho ara oleh nene, sobo laol eleme arian oh ham. ⁸ Horo he'e, sakola aibar beng fede' ho, ba mi sotur ho deremi, hodi na om lemid. Sa edun o atino' bit. ⁹ Asel, na ho e ara daiy he'e, supi e sura' bolang ho pahang daiy, bite Yesus uil min e sofetang. YESUS SARI MED MARIA MAGDALENA O PETANG, Horo sakola aiy alo ho sabor bang leam. ¹¹ Honi sobo, Maria dere abung luling mi toh ahain. Ahain eh bo safa atel dere om ho mi dun eh, ¹² Sa edun he'e malaikat alo fen afel teuw Yesus o benj eleme ho mi mieh. Nu ho elafung araham ho mi mieh no' foiy nu ho e'fa abung ho mimieh. ¹³ Malaikat alo ho Maria atan " Ob bar, mi taro'ni eiy fe a ahain?" Maria malaikat o mateng abor ubang ho, "Supi no Tuhan o benj medam na e ahol nene supi taromi meng." ¹⁴ Mang naho bit no', Maria samot mi dun Yesus homi tufeh, sobo e ahol nene bite sari ho Yesus. ¹⁵ Yesus atan, "Ob bar, taro'ni fe ai ahain? Ano fe i lap eh so?" Asel eiy om bite name na ho buang eiy so, Maria ara hu'tang ubang ho, "Tuang, ahal tuang so aluil am so huni he'e, u nara mateng tuang taromi meng, hunie na med." ¹⁶ Yesus aramateng ubang ho, "Maria." Maria di sadimang horo Ibrani o mateng mi Ara hu'tang ubang ho, "Rabuni", Olel huni he'e bite "Guru". ¹⁷ Yesus ara hu'tang ubang ho, "I ha'aiy napuin e asel na e nabor sam Nimang abung daiy. Honi sobo, sam no uding bar abung supi ara mateng, 'Na uil sam Nimang olap med Imang olap, sam no Lahtal olap med o Lahtal olap.'" ¹⁸ Maria Magdalena sam horo he'e sakola aibar ara hu'tang, "Na Tuhan aholam," Fe bite Yesus so naho u ara mateng. YESUS SARI MED SO SAKOLA AIBAR O PETANG ¹⁹ Ho araham dilpana am, sariho sel a'ainang don ho om mi, hunie sear ba sakola aibar mi taunung eh ho sariutel meng asel supi Yahudi hinung elbaroc, Yesus ho' supi o anaiy ho mitoh ubang ho, "Il luling med ira ham!" ²⁰ Mang hu'tang honi no', Yesus satang e med sato' mate med supi etub. Sakola aiybar nun apano' bad herang empir ho' araham sipi Lahtal edun. ²¹ Horo he'e, Yesus supi foiy ara hu'tang, "Il luling med irita. Mang fede Nimang u nahow am huni, hunin sobo fed Na u ihow." ²² Fe sa mang naho bit no', Yesus supi apu med ubang ho, "Roh bolang ho med! ²³ Mang fede' i name den o doc u ampo, he'e name ho sa o u ampo med. bo name den odoc i e u ampo nene, he'e supi e o u ampo ho med nene." YESUS SARI MED TOMAS O PETANG ²⁴ Tomas sakola ai pir ernu faling alo ho o nu, ba name ubang ho Didimus, Yesus ho' sa e supi ara ham-ham nene. ²⁵ Horo, sakola aibar beng u arahu'tang "Ni Lahtal ahol am." Sobo Tomas supi ara mateng, "Mang fede' na paku falu Atang mi ho natang pa' med om mi ahod, no' natang med Ato' mate ho mi ahod, na e o atino' bit nene." ²⁶ Mi tareng turlo he'e, sakola aibar nun foiy bang homi ta'unung, fe Tomas di supi ara ham-ham. masiki sear nun sari utel, Yesus ho supi o anaiy homi toh, horo he' e ubang, "Il luling iri ta!" ²⁷ Horo, Sa Tomas ara mateng, "Atang pa' ho ahir ma ho'o mi hunie natang ho'o edun; no' atang ho ahir ma ho'omi e med nato' mate ho'o tameng. Ha'aiy e oatino' bit nene bo o atino' bit!" ²⁸ Tomas Yesus o mateng abor ubang ho. "O, no Tuhan med no Lahtal!" ²⁹ Yesus ara mateng ubang ho, " Ahal fed a o atino' bitam asel a dun Naholam? Hal tafoiy supi ba e dun nahol nene bo o atino' bit ho ta." YOHANES SURA' BOLANG HUL HO'O O U TOH ³⁰ Afang rat o empir ba Yesus panen So sakola aibar apong adang daiy ara eh, ba e hul sura' bolang om ho'o mi meng nene. ³¹ Honi sobo, barpi ho'o hul hunin e i o atino' bit bite Yesus horo Kristus, Lahtal Aiy, hunin e a' O atino' bit om ho mi, i Ani om fe mi fetang ho med.