Yesus So Bo'med Sosakola aibar pir itito e'tub. ¹ O'a'taain, Yesus foil pong Tiberias tut ta So bo'mate med So sakola aibar e'tub. Sa So bo' utub ho,hooni: ² Simon Petrus,Tomasba o'ubang Didimusho, Natanael ba Kana mong Galilea miho o'name, Zebedeus o' aibar, med sakola beng piralo foil ta,supi sara ta'unung. ³ Simon Petrus supi a' ra mateng, Na sam ab lap. Supi a'ra mateng ubangho, niridi ara sam. Supi barpi hel horo hee sam eita, sobo dil paka om homi supi foil nanu med di a'ai. ⁴ Pali' madal no'dai hee, Yesus tong tut ta tufeh, sobo sakola aibar e' a'hol bite sariho Yesus so honi nene. ⁵ Yesus supi a'ra mateng, Aikabar, iab den med em aai? Supi ubangho a'ai. ⁶ Yesus supi a'ra mateng, idalangho med ei tani lol homi a'muj honi hee ina medam. Horo supi dalang ho foil few, sobo supi baring ei om lemid sah fede' ab tofang bi'. Horo hee,sakola aiba Yesus sona ukarang bi'ho Petrus a'ra mateng, Sari heto Tuhan so! Simon Petrus mang ma'eh bite sari heto Tuhan so horo hee,sa sofen puin,fede' karesang eh ho sa kod hing,sa do'tang lehel. Sakola aibar bengho ei puin, dalang ba ab afengho baring a'taain. Fede' supi e' tut pa' e'let nene, maa da rat alo ni. Supi sam tut ta supi dun hee, afail fail eh,ab ta o'leh, no'hee rotidi a'ra. Yesus ubangho, ab ba idai medho den fitma. Simon Petrus mid ei om mi dalang ba ab afengho baring ta'at tamid hee, ab pa' ratnu erifihing faling tow dalang om mi. Masiki ab tofang bi' sobo, supi o' dalang e' peh nene. ¹² Yesus supi a'ra mateng ima honie na'de. Sakola aibar pirnu ubarani a'tan Ari anoso? honidi a'ai, fede' supi a'hol sari Tuhan. ¹³ Yesus ma horo hee,roti med supi en, ab hodi honi. ¹⁴ Ho'oro Yesus So Bo' med sakola aibar e'tub o'mi towmi,Sa name min a'nai homi so fetang om homi. Yesus Sa Petrus a'bang honie, O' nub aibar ho bu'ang. ¹⁵ Supi na'de no'hee,Yesus sa Simon Petrus a'ra mateng, Simon Yohanis o'ai, a so Nari ukarang mid beng ernu hoo e'mota eh em a'ai? Petrus Ei a'bor ubangho, A'bul Tuhan, A a'hol na so Ari ukarang eh. No'Yesus a' ra mateng ubangho,No nub aibar ho bu'ang. ¹⁶ Yesus foil a'ra mateng o'mi alomi, Simon Yohanis o' ai, a so Nari ukarang eh eme a'ai? Petrus ubangho,A'bul Tuhan, A a'hol na so Ari ukarang eh. Yesus a'ra mateng ubangho, No nub aibar ho bu'ang. ¹⁷ Yesus foil a'ra mateng o'mi tow mi, Simon Yohanis o'ai, A so Nari ukarang eh eme a'ai? Petrus om muj fede' Yesus a'tan o'mi tow mi ubangho, A so Nari ukarang eh eme a'ai? Horo Petrus A'ra mateng ubangho, Tuhan, ernu turlo A a'hol. Nari hoodi A nahol na so Ari ukarang eh. Yesus a'ra mateng ubangho, No nub aibar ho bu'ang. ¹⁸ Na na o' abul u ara mateng, a dai a'for eh honi hee,a o bobom aheng a'pec, om taro lol sam uma hee, a ho lol sam, sobo asam tumo' honi hee, a atang a'hir,honie name bengso aheng pec, no' hee name ara sam e'leme ba om e' uma nene horo leam. ¹⁹ Yesus sari na hoo ubangho, min tabangho o'utub,honie Petrus Lahtal utarain ho mang fede' naba honi. Sa na ho ubang no' hee,Sa Petrus a'ra mateng ubangho, Ma Nata ain! Sakola aiba Yesus sona ukarang bi' ho, maa nabaso a'raham? ²⁰ Petrus sadimang dun hee, sakola aiba Yesus sona ukarangbi' ho supi ataain eh. Sari sakola ai horoba, mong paka supi na'de arahamho, sa Yesus a'del abung mih, sa Atan, "Tuhan, anoso maa Ari fail?" ²¹ Dun a'hol horo hee, Petrus sa Yesus atan, "Tuhan, sariho maa taro'ni?" ²² Yesus ubangho', "Mangfede' Na u inung sa sofetang eh sam Na so ho', a e' utaro' nene. Ariho mae Nataain!" ²³ Horo, Yesus o' matengpa' ho tabite diail bar nun homipir, o' ubang honi hee, sari sakola aiho e' min neneam, honi sobo Yesus e' ubang aiho e' min neneam honi nene sobo, Yesus ubangho, "Mangfede' Na u inung hee, sa sofetang eh sam Na so ho', a e' utaro' nene." ²⁴ Sari hooro na anan hoo ei arahamho umateng, no' hee hul meng barpi, honie pi ahol ubangho, o' mateng ernuho abul. ²⁵ Nabeng tofang Yesus panen sobo, hul barpife honi hee, na u tanut pali' mate hoodi kapuh, Sura' ernuba hulfe honiho, eleme aai.